பெட்ரோல், டீசல் விலை அதிகரிக்கும்: அடுத்த மாதம் 13ம் தேதி முக்கிய முடிவு

அரசு எண்ணெய் நிறுவனங்களின் நிதி நிலைமை குறித்து ஆய்வு செய்ய, பிரதமர் மன்மோகன் சிங், மத்திய நிதியமைச்சர் பிரணாப் முகர்ஜி மற்றும் மத்திய பெட்ரோலியத்துறை அமைச்சர் முரளி தியோரா ஆகியோர், அடுத்த மாதம் 13ம் தேதி முக்கிய ஆலோசனை மேற் கொள்கின்றனர். பெட்ரோல், டீசல் விலை நிர்ணயத்தை அரசின் கட்டுப்பாட்டில் இருந்து விடுவிப் பது குறித்து விவாதிக்கப்படும் பட்சத்தில், அவைகள் விலை அதிகரிக்கும் . இந்த கூட்டத்தில், திட்டக் கமிஷன் துணைத் தலைவர் மாண்டேக் சிங் அலுவாலியா மற்றும் திட்டக் கமிஷன் முன்னாள் உறுப்பினர் கிரிட் எஸ்.பாரீக் ஆகியோர் கலந்து கொள்ள உள்ளதாக அதிகாரிகள் தரப்பில் தெரிவிக்கப்பட்டது.

இதுகுறித்து அதிகாரிகள் வட்டாரங்கள் கூறியதாவது: பெட்ரோலியத் துறை குறிப்பாக அரசு எண்ணெய் நிறுவனங்களின் நிதி நிலைமை குறித்து ஆராய, இந்த கூட்டத்திற்கு ஏற்பாடு செய்யப் பட்டுள்ளது. இந்தியன் ஆயில், பாரத் பெட்ரோலியம் மற்றும் இந்துஸ்தான் பெட்ரோலியம் ஆகிய நிறுவனங்கள், பெட்ரோல், டீசல், சமையல் எரிவாயு மற்றும் மண்ணெண்ணெய் ஆகியவற்றை குறைந்த விலைக்கு விற்பதால், நஷ்டத்தை சந்தித்து வருகின்றன. இந்த நஷ்டத்தை ஈடுகட்ட, அரசு வழங்கும் எண்ணெய் கடன் பத்திரங்களை கொடுக்காததால், இரண்டாவது காலாண்டில் நஷ்டம் ஏற்பட்டுள்ளதாக இந்நிறுவனங்கள் தெரிவித்துள்ளன. எனவே, பெட்ரோல் மற்றும் டீசல் ஆகியவற்றின் விலை நிர்ணயத்தை அரசின் கட்டுப்பாட்டில் இருந்து விடுவிப்பது குறித்து, இந்த கூட்டத்தில் விவாதிக்கப்படுமென எதிர்பார்க்கப்படுகிறது.


இதற்கிடையில், ரிலையன்ஸ் இண்டஸ்ட்ரீஸ், எஸ்ஸார் ஆயில் ஆகிய தனியார் எண்ணெய் நிறுவனங்களும், பெட்ரோல் மற்றும் டீசல் விலை நிர்ணயத்தை அரசின் கட்டுப்பாட்டில் இருந்து விடுவிக்க கேட்டு வருகின்றன. பெட்ரோல் மற்றும் டீசல் விலை நிர்ணயம் அரசின் கட்டுப்பாட்டில் இருந்து விடுவிக்கப்பட்டால், பெட்ரோல் விலை லிட்டருக்கு 3.49 ரூபாயும், டீசல் விலை லிட்டருக்கு 2.38 ரூபாயும் அதிகரிக்கும் வாய்ப்பு உள்ளது. பெட்ரோல், டீசல், சமையல் எரிவாயு மற்றும் மண்ணெண்ணெய் ஆகியவை தொடர்பாக அரசின் விலை நிர்ணய கொள்கை குறித்து ஆய்வு செய்த குழு, அடுத்த மாதம் இறுதியில் தன் பரிந்துரைகளை சமர்ப்பிக்கும் என எதிர்பார்க்கப்படுகிறது. இவ்வாறு அவர்கள் கூறினர்.

நன்றி : தினமலர்

பெட்ரோல், டீசல் விலை மேலும் உயர்கிறது

பெட்ரோல் விற்பனையாளர்களுக்கு அளிக்கப்படும் கமிஷன் தொகையை மத்திய அரசு உயர்த்தியுள்ளது. இதுவரை பெட்ரோலுக்கு, ஒரு கிலோ லிட்டருக்கு ரூ.1028 கமிஷன் வழங்கப்படுகிறது. இனி அது ரூ.1098 ஆக உயர்த்தப்பட உள்ளது. இதேபோல் டீசலுக்கு தற்போது, ஒரு கிலோ லிட்டருக்கு ரூ.630 வழங்கப்படுகிறது. இனி அது ரூ.670 ஆக உயர்த்தப்பட உள்ளது. இதனால் பெட்ரோல் லிட்டருக்கு 7 காசும், டீசல் லிட்டருக்கு 4 காசும் அதிகரிக்கும். இந்த விலை உயர்வு நாடு முழுவதும் நுகர்வோரிடம் வசூலிக்கப்படும். இந்த விலை உயர்வு இன்று நள்ளிரவு முதல் அமலுக்கு வரும் என மத்திய அரசு தெரிவித்துள்ளது.

நன்றி : தினமலர்

பெட்ரோல், டீசல் விலை உயராது

'சர்வதேச அளவில், கச்சா எண்ணெய் விலை உயர்ந்த போதும், பெட்ரோலியப் பொருட்களின் விலையை உயர்த்தும் திட்டம் எதுவும் அரசுக்கு இல்லை' என, பெட்ரோலியத் துறைச் செயலர் ஆர்.எஸ்.பாண்டே தெரிவித்தார். இந்தியன் ஆயில் கார்ப்பரேஷன் மற்றும் இந்தியன் ஆட்டோமொபைல் தயாரிப்பாளர்கள் சங்கம் இணைந்து ஏற்பாடு செய்திருந்த கூட்டம் ஒன்றில் பேசிய பாண்டே கூறியதாவது: சர்வதேச அளவில், தற்போதைய எண்ணெய் விலைகள் சாதகமானதாக இல்லை. ஆனால், அதற்காக, எரிபொருள் விலையை உயர்த்தும் திட்டம் எதுவும் அரசுக்கு இல்லை. சர்வதேச அளவிலான கச்சா எண்ணெய் விலை, தற்போது பேரல் 3,750 ரூபாயாக(டாலர் மதிப்பில் 75) விற்கப்படுகிறது. இதனால், வாகன எரிபொருள் விற்பனை செய்யும் சில்லரை வியாபாரிகளுக்கு, அதிக நெருக்கடி ஏற்பட்டுள்ளது. இவ்வாறு பாண்டே கூறினார்.

நன்றி : தினமலர்

சர்வதேச சந்தையில் விலை குறைந்தால் இந்தியாவிலும் பெட்ரோல், டீசல் விலை குறைக்கப்படும் : தியோரா

சர்வதேச சந்தையில் கச்சா எண்ணெய் விலை பேரலுக்கு 50 முதல் 60 டாலருக்குள் இருந்தால், இந்தியாவில் கடந்த வாரத்தில் கூட்டிய பெட்ரோல் மற்றும் டீசல் விலை குறைக்கப்பட்டு விடும் என்று பெட்ரோலிய அமைச்சர் முரளி தியோரா தெரிவித்தார். சர்வதேச சந்தையில் கச்சா எண்ணெய் விலை பேரலுக்கு 70 டாலர் வரை வந்ததால் மத்திய அரசு, பெட்ரோல் விலையை லிட்டருக்கு ரூ.4 ம் டீசல் விலையை லிட்டருக்கு ரூ.2 ம் உயர்த்தியது. ஆனால் கச்சா எண்ணெய் விலை கடந்த சில நாட்களாக குறைந்து வருகிறது. இந்தியா வாங்கும் பேஸ்கட் குரூட் ஆயில் விலை நேற்றைக்கு பேரலுக்கு 61.58 டாலராகத்தான் இருந்தது. ஜூலை மாதத்தின் அதன் சராசரி விலை பேரலுக்கு 61.12 டாலருக்கும் குறைவான விலையில்தான் இருக்கும் என்று சொல்கிறார்கள். இந்தியாவின் பெட்ரோலிய தேவையில் 75 சதவீதத்தை நாம் இறக்குமதிதான் செய்கிறோம். இந்தியாவில் பெட்ரோலிய பொருட்கள் மானிய விலையில் கொடுக்கப்படுவதால், இந்திய எண்ணெய் நிறுவனங்களான இந்தியன் ஆயில், பாரத் பெட்ரோலியம் மற்றும் ஹிந்துஸ்தான் பெட்ரோலியம் ஆகியவை 2008 - 09 நிதி ஆண்டில் ரூ.4,870 கோடி வரை நஷ்டம் அடையும் என்று எதிர்பார்க்கப்படுகிறது. எனவே பெட்ரோல்,டீசல் விலை உயர்வு அவசியமானதுதான் என்றார் முரளி தியோரா.
நன்றி : தினமலர்

பெட்ரோல் டீசல் விலை உயர்வு : இன்று நள்ளிரவு முதல் அமலுக்கு வருகிறது

பெட்ரோல் விலை லிட்டருக்கு ரூ.4ம், டீசல் விலை ரூ.2ம் உயர்வடைகிறது. இந்த விலை உயர்வு இன்று நள்ளிரவு முதல் அமலாகிறது. டில்லியில் பிரதமர் மன்மோகன் சிங்கை பெட்ரோலியத் துறை அமைச்சர் முரளி தியோரா சந்தித்து பேசினார். சர்வதேச சந்தையில் கச்சா எண்ணெய் விலை உயர்ந்து வருவதால் பெட்ரோல், டீசல் விலையை உயர்த்துவது தொடர்பாக இருவரும் ஆலோசனை நடத்தினார். பின்னர் செய்தியாளர்களிடம் பேட்டியளித்த முரளி தியோரா பெட்ரோல் விலையை லிட்டருக்கு ரூ.4ம், டீசல் விலை ரூ.2ம் உயர்த்துவதாக அறிவித்தார். இந்த விலை இன்று நள்ளிரவு முதல் அமலுக்கு வருவதாகவும், சமையல் எரிவாயு மற்றும் மண்ணெண்ணெய் விலையில் எந்த மாற்றமும் இல்லை என்று கூறினார்.

நன்றி : தினமலர்

பெட்ரோல், டீசல் விலை உயர்வு உடனடியாக இல்லை : முரளி தியோரா

எல்லோரும் எதிர்பார்த்திருக்கும் பெட்ரோல் மற்றும் டீசலின் விலை உடனடியாக உயர்த்தப்பட மாட்டாது என்று மத்திய பெட்ரோலிய துறை அமைச்சர் முரளி தியோரா தெரிவித்தார். சர்வதேச சந்தையில் கச்சா எண்ணெய்யின் விலை எவ்வாரெல்லாம் மாறுகிறது என்பதை நாங்கள் தீவிரமாக கண்காணித்து வருகிறோம். அதன் அடிப்படையில்தான் இந்தியாவில் விற்கப்படும் சில்லரை விலை பெட்ரோல் மற்றும் டீசலின் விலையில் மாறுதல் செய்யப்படும் என்றார் அவர். அவர் மேலும் தெரிவித்தபோது, நாம் வாங்கும் பேஸ்கட் குரூட் ஆயிலின் விலை வெள்ளிக்கிழமை அன்று பேரலுக்கு 68.54 டாலராக இருந்தது. அது உயர்ந்து கொண்டுதான் இருக்கிறது. இருந்தாலும் அந்த விலை மேலும் உயருகிறதா என்பதை நாங்கள் பார்த்துக்கொண்டிருக்கிறோம். எப்படி இருந்தாலும் இந்தியாவில் பெட்ரோல் மற்றும் டீசலின் விலையை உயர்த்தும் முன், மத்திய அமைச்சரவை கூடி விவாதித்துதான் முடிவு செய்யும் என்றார். இப்போது இந்திய எண்ணெய் கம்பெனிகள், ஒவ்வொரு லிட்டர் டீசல் விற்கும் போதும் ரூ.2.96 நஷ்டம் அடைகின்றன. பெட்ரோலி விற்கும் போது ரூ.6.08 நஷ்டம் அடைகின்றன.

நன்றி : தினமலர்

பொதுத்துறை எண்ணெய் நிறுவனங்கள் இந்த வருடம் அடைய இருக்கும் வருமான இழப்பு ரூ.38,700 கோடி

இந்திய பொதுத்துறை எண்ணெய் நிறுவனங்களான இந்தியன் ஆயில், பாரத் பெட்ரோலியம் மற்றும் ஹிந்துஸ்தான் பெட்ரோலியம் ஆகியவை, பெட்ரோல், டீசல், எல்.பி.ஜி. மற்றும் மண்ணெண்ணெய் விற்பனையால், இந்த வருட வருமானத்தில் ரூ.38,700 கோடியை இழப்பார்கள் என்று கணக்கிடப்பட்டிருக்கிறது. இந்த மூன்று நிறுவனங்களுமே ஒவ்வொரு லிட்டர் டீசல் விற்பனையின் போதும் ரூ.2.96 ஐ இழக்கிறார்கள் என்கின்றனர் அதிகாரிகள். சர்வதேச சந்தையில் கச்சா எண்ணெய் விலை பேரல் ஒன்றுக்கு 70 டாலர் வரை உயர்ந்து விட்டதால், ஏற்கனவே இந்திய எண்ணெய் நிறுவனங்களுக்கு ஒவ்வொரு லிட்டர் பெட்ரோல் விற்பனையின் போதும் ஆகிக்கொண்டிருந்த ரூ.3.68 நஷ்டம், இப்போது ரூ.6.08 ஆக உயர்ந்து விட்டது. இதன் மூலம் எண்ணெய் நிறுவனங்கள், பெட்ரோல், டீசல், எல்.பி.ஜி.மற்றும் மண்ணெண்ணெய் விற்பனையால் நாள் ஒன்றுக்கு ரூ.135 கோடி நஷ்டம் அடைந்து வருகின்றன.

நன்றி : தினமலர்

கட்டுமான பொருட்களின் விலை வீழ்ச்சி: டீசல் கட்டண குறைப்பு எதிரொலி

டீசல் விலை குறைவு மற்றும் கட்டுமானத் தொழிலில் நிலவும் மந்தநிலை காரணமாக, கட்டட கட்டுமானப் பொருட்களின் விலையும் படிப்படியாக குறைந்து வருகிறது. மணல், ஜல்லி, இரும்பு விலையில் 10 சதவீதம் வரை குறைந்துள்ளது. சர்வதேச அளவில் பொருளாதார வளர்ச்சி ஏற்பட்டபோது, அனைத்து பொருட்களின் விலையும் கடுமையாக உயர்ந்தது. இரண்டு, மூன்று மடங்குகளில் விலை ஏற்றம் காணப்பட்டது. சர்வதேச பொருளாதாரத்தில் மந்த நிலை ஏற்பட்டதை தொடர்ந்து, கச்சா எண்ணெய் விலையும் குறைந்தது. கோவையில் கட்டுமானப் பொருட்களின் விலையில் தற்போது சரிவு ஏற்பட்டுள்ளது. இரு மாதங்களில், ஒவ்வொரு பொருளும் 10 சதவீதம் வரை சரிந்துள்ளது.
ஸ்டீல் கம்பி விலை, கடந்த ஆண்டு ஆகஸ்டில் அதிகபட்சமாக கிலோ 53 ரூபாய் வரை விற்பனையானது. சமீபகாலமாக, விலை படிப்படியாக குறைந்து, தற்போது 31- 33 ரூபாயாக குறைந்துள்ளது. ஐ.எஸ்.ஐ., முத்திரையிடப்பட்ட கம்பிகளின் விலை 31 -33 ரூபாய் என்ற அளவில் உள்ளது. 'பிராண்டாட்' கம்பி விலை, 33 ரூபாய் அளவில் விற்பனையாகிறது.
மணல் விலையும் கணிசமான அளவு சரிந்துள்ளது. ஒரு யூனிட் கரூர் மணல் அதிகபட்சமாக 2,400 ரூபாய் வரை விற்றது; இப்போது, 2,000 முதல் 2,100 ரூபாயாக உள்ளது. செங்கல், 'டேபிள் மோல்டேட்' 3,000 எண்ணிக்கை, 9,000 முதல் 9,500 ரூபாய் வரை விற்பனையாகிறது.
செங்கல் விலையில் பெரிய அளவில் மாற்றம் இல்லை. டீசல் விலை குறைந்தாலும், லாரி வாடகையில் மாற்றம் இல்லாதது பொதுமக்களிடையே அதிருப்தியை ஏற்படுத்தியுள்ளது. கோவையின் சுற்றுப்புறங்களில் இருந்து சப்ளையாகும் செங்கல், தரத்தைப் பொறுத்து விலையில் மாறுதல் ஏற்பட்டுள்ளது. கருங்கல் (போல்டர்ஸ்) விலை இரண்டு யூனிட் 2,100லிருந்து 1,900 ரூபாயாக குறைந்துள்ளது. ஜல்லி விலையிலும் மாற்றம் ஏற்பட்டுள்ளது. 'சைஸ் ஸ்டோன்' எனப்படும் சதுரகல் ஒன்றின் விலை ஏழு ரூபாயில் இருந்து 6.50 ரூபாயாக ஆக குறைந்துள்ளது. டீசல் விலை குறைப்பால், சிறிய அளவில் விலை மாற்றம் இருந்தாலும், கட்டுமான துறையில் ஏற்பட்டுள்ள மந்த நிலை, தன்னிறைவு நிலையால் கட்டட பொருட்களின் விலையில் 10 முதல் 20 சதவீத அளவுக்கு விலை சரிவு ஏற்பட்டுள்ளது.
இருப்பினும் பல வர்த்தகர்கள், மணல், கல், சப்ளையர்கள் விலையை குறைக்க பெரிதும் தயக்கம் காட்டி வருகின்றனர். மரங்களின் விலையிலும் இதே போன்று மாற்றம் ஏற்பட்டுள்ளது. தேக்கு மரம் ஒரு சதுர அடி 4,500 ரூபாயிலிருந்து 3,500 ரூபாயாக இறங்கியுள்ளது. நாட்டு மரங்களின் விலையும் 1,500 ரூபாயிலிருந்து 1,250 ரூபாயாக குறைந்துள்ளது. அனைத்து கட்டுமானப் பொருட்களின் விலை குறைந்தாலும், சிமென்ட் விலை மட்டும் இறங்கவே இல்லை. ஓரிரு நாட்களில் சிமென்ட்டும் மூட்டைக்கு 10 ரூபாய் வரை விலை குறைய வாய்ப்புள்ளதாக வர்த்தகர்கள் கூறுகின்றனர். தற்போது, நல்ல தரமான சிமென்ட் 50 கிலோ மூட்டை, 270 ரூபாய் முதல் 275 ரூபாய் வரை விற்பனை செய்கின்றனர்.
டீசல் விலை மீண்டும் குறைக்கப்பட்டிருப்பதால், இன்னும் கட்டுமானப் பொருட்களின் விலையில் சரிவு ஏற்படும் வாய்ப்பு உள்ளது. பல முன்னணி கட்டுமான நிறுவனங்கள், அடுக்குமாடி குடியிருப்பு வீடுகளை வாங்குவோருக்கு சிறப்பு சலுகை காட்ட ஆரம்பித்துள்ளன; விற்பனையை துரிதப்படுத்தவும் முயன்று வருகின்றன.

நன்றி : தினமலர்

பொது தேர்தலுக்கு முன்னதாக பெட்ரோல், டீசல் விலை குறைப்பு

பொதுத்தேர்தலுக்கு முன்னதாக பெட்ரோல், டீசல் மற்றும் சமையல் எரிவாயு விலை குறைக்கப்படலாம் என, பெட்ரோலிய அமைச்சக உயர் அதிகாரி ஒருவர் கூறியுள்ளார்.அவர் மேலும் கூறியதாவது:தேர்தல் அறிவிப்பு
களுக்கு முன்னதாக பெட்ரோல், டீசல் மற்றும் சமையல் எரிவாயு விலைக் குறைப்பு குறித்த அறிவிப்பு வெளியாகலாம். இப்போது விலையைக் குறைத்தால், கச்சா எண்ணெய் விலை கூடும் போது மீண்டும் விலையைக் கூட்ட முடியாது என்பதால், தற்போதைக்கு விலைக் குறைப்புக்கு வாய்ப்பு இல்லை.இவ்வாறு உயரதிகாரி கூறினார்.
இம்மாத முற்பகுதியில் பெட்ரோல் விலை லிட்டருக்கு ஐந்து ரூபாயும், டீசல் விலை லிட்டருக்கு இரண்டு ரூபாயும் குறைக்கப்பட்டன. இதன் பின்னும், பொதுத்துறை எண்ணெய் நிறுவனங்கள் பெட்ரோல் விற்பனையில் லிட்டருக்கு 9.98 ரூபாயும், டீசல் விற்பனையில் லிட்டருக்கு 1.03 ரூபாயும் லாபம் ஈட்டி வருகின்றன. கச்சா எண்ணெய் விலை மேலும் குறைந்தால், இந்த லாபம் 11.48 ரூபாய் மற்றும் 2.92 ரூபாயாக உயரும்.இருந்தாலும், கெரசின் விற்பனையில் லிட்டருக்கு 17.26 ரூபாயும், சமையல் காஸ் விற்பனையில் சிலிண்டர் ஒன்றுக்கு 148.38 ரூபாயும் எண்ணெய் நிறுவனங்கள் நஷ்டத்தை சந்தித்து வருகின்றன.

நன்றி : தினமலர்

பெட்ரோல் விலை குறைப்பு : இழுபறி பதில் தந்தார் தியோரா

எத்தனை கேள்விகள் கேட்டாலும், பெட்ரோல், டீசல் விலை குறைப்பு எப்போது என்பது பற்றி மத்திய பெட்ரோலியத்துறை அமைச்சர் தியோரா வாய்திறக்க மறுத்துவிட்டார். கடந்த ஒருவாரமாகவே பெட்ரோல், டீசல் விலை குறைப்பு பற்றி அதிகம் பேசப்படுகிறது. மத்திய அமைச்சரவை, பெட்ரோல், டீசல் விலை குறைப்பு பற்றி ஆறு மாநிலத் தேர்தல்கள் முடிந்த பின் முடிவு செய்யும் என்ற கருத்து பேசப்பட்ட போது, நேற்று முன்தினம், பெட்ரோல், டீசல் விலை குறைப்பு விரைவில் வரும் என்ற கருத்தைக் கூறியிருந்தார் தியோரா. பொருளாதார ஆசிரியர்கள் மாநாட்டில் மத்திய அமைச்சர் தியோரா, அத்துறையின் செயலர் பாண்டே, துணைச் செயலர் சுந்தரேசன், ஓ.என்.ஜி.சி., தலைவர் உட்பட பலரும் சேர்ந்து நேற்று இப்பிரச்னைக்கு விளக்கமளித்தனர். குறிப்பாக பல தொழில் நுட்ப கேள்விகளுக்கு அந்தத் துறையைச் சேர்ந்த செயலர்கள் பதிலளிக்க அனுமதித்ததால், இப்பிரச்னை குறித்து ஒரு மணி நேரம் விளக்கம் தரப்பட்டது. இந்த மாநாட்டில் முரளி தியோரா தெரிவித்த கருத்துக்கள்: இன்று கச்சா எண்ணெய் பேரல் 50 டாலருக்கு கீழே குறைந்திருக்கிறது. முன், 147 டாலர் இருந்த போது நிர்ணயிக்கப்பட்ட விலையா இன்னமும் தொடர்வது என்று காங்கிரஸ் கட்சியிலேயே பலர் கேட்கின்றனர். இந்த விலை குறைப்பில் சம்பந்தப்பட்ட பெட்ரோல், டீசல், மண்ணெண் ணெய் மற்றும் சமையல் காஸ் ஆகிய நான்கில், பெட்ரோல், டீசலில் மட்டும் லாபம் கிடைக்கிறது. இன்றைய தேதியில் பெட்ரோலில் லிட்டருக்கு ரூ. 8.17ம், டீசலில் லிட்டருக்கு 60 பைசாவும் கிடைக்கிறது. அதேசமயம் மண்ணெண்ணெய் லிட்டருக்கு ரூ. 21.64ம், சமையல் காஸ் சிலிண்டர் ஒன்றுக்கு ரூ.330.20ம் நஷ்டம் ஏற்படுகிறது. மூன்று எண்ணெய் கம்பெனிகளும் தினமும் 90 லட்சம் முதல் கோடி ரூபாய் வரை இழப்பை சந்திக்கின்றன. ஏற்கனவே, அதிக விலையில் கச்சா எண்ணெய் விற்றதில் இருந்து தொடர்ந்த நஷ்டமும், தற்போதைய நஷ்டமும் சேர்ந்து எண்ணெய் கம்பெனிகளுக்கு லட்சத்து 10 ஆயிரம் கோடியாக உள்ளது. இதே அளவு கச்சா எண்ணெய் விலை நீடித்தால், அதன் நஷ்டம் குறைய இன்னமும் ஆறு மாதங்கள் ஆகும். மேலும், எண்ணெய் பத்திரங்கள் மூலம் மத்திய நிதியமைச்சகம் 50 ஆயிரம் கோடியை முன்பே தந்திருக்கிறது. எது எப்படியானாலும் எல்லா அம்சங்களையும் அரசு ஆராய்ந்து பெட்ரோல், டீசல் விலை குறைக்கும் முடிவை எடுக்கும். அதே சமயம், விலை குறைப்பு பற்றி பேசியதாக வந்த செய்தியை அடுத்து தேர்தல் கமிஷன் நோட்டீஸ் அனுப்பியது என்பது முற்றிலும் தவறு. அப்படி நோட்டீஸ் ஏதும் வரவில்லை. பெட்ரோலுடன், எத்தனால் கலக்கும் திட்டம் தொடர்ந்து மூன்றாண்டுகளாக மேற்கொள்ளப் பட்டு வரும் திட்டம். அதில் 44 கோடி லிட்டர் எத்தனால் தயாரிக்கப்படுகிறது. ஆனால், இந்த விஷயத்தில் மாநில அரசுகள் பின்பற்றும் வரித்திட்டம், மற்ற சில நடைமுறைகளால் பெரிய அளவில் ஊக்கம் பெறவில்லை. இவ்வாறு முரளி தியோரா கூறினார்.
நெருக்கடியான கேள்விகள் கேட்ட போது நகைச்சுவையாக பதிலளித்து பிரச்னையை சமாளித்தார். முன்னதாக செய்தி, ஒளிபரப்பு அமைச்சர் ஆனந்த் சர்மா, 'டிவி'களுக்கு ஒழுங்கு நடைமுறைத் திட்டம் கொண்டுவருவதில் அரசுக்கு உள்ள சிக்கல்களை விளக்கினார். அதே சமயம் ஒழுங்கு நடைமுறைகளை மீறும் சேனல்கள் மீது நடவடிக்கை எடுப்பது அரசின் உரிமை என்றார். தேர்தல் ஆணையம் நோட்டீஸ் : கச்சா எண்ணெய் விலை குறைந் துள்ளதால், டிசம்பர் 24ம் தேதிக்குப் பின், பெட்ரோல், டீசல் விலை குறைக் கப்படும் என, மத்திய பெட்ரோலிய அமைச்சர் முரளி தியோரா நேற்று முன்தினம் அறிவித்திருந்தார். 'அவரின் இந்த அறிவிப்பு, தேர்தல் நன்னடத்தை விதிகளை மீறிய செயல்' எனக் கூறி, பாரதிய ஜனதா கட்சியினர், தேர்தல் ஆணையத்திடம் நேற்று புகார் அளித்தனர். இந்தப் புகாரை அடுத்து, இது சம்பந்தமாக விளக்கம் அளிக்கும்படி, அமைச்சர் முரளி தியோராவுக்கு தேர்தல் ஆணையம் நோட்டீஸ் அனுப்பியுள்ளது.

நன்றி : தினமலர்

டிசம்பர் 24ம் தேதிக்குப்பின் பெட்ரோல், டீசல் விலை குறைக்கப்படும் : முரளி தியோரா

சட்டமன்ற தேர்தல் டிசம்பர் 24 ம் முடிந்ததும் பெட்ரோல், டீசல் விலை குறைக்கப்படும் என்று மத்திய பெட்ரோலிய துறை அமைச்சர் முரளி தியோரா தெரிவித்தார். சர்வதேச சந்தையில் கச்சா எண்ணெய் விலை குறைந்திருப்பதை அடுத்து, இந்தியாவிலும் பெட்ரோலிய பொருட்களின் விலை குறைக்கப்படும் என்று பரவலாக எதிர்பார்க்கப்படுகிறது. நானும் அதே எண்ணத்தில்தான் இருக்கிறேன். ஆனால் டிசம்பர் 24ம் தேதிக்குப்பின்தான் விலையை குறைக்க முடியும் என்றார் தியோரா. சர்வதேச சந்தையில் கடந்த இரண்டு வாரங்களாக கச்சா எண்ணெய், சராசரியாக இருந்த விலையின் அடிப்படையில் எடுத்த கணக்கின்படி, இந்திய எண்ணெய் கம்பெனிகள் பெட்ரோல் விற்பனையில் நாள் ஒன்றுக்கு ரூ.16 கோடியும் டீசல் விற்பனையில் நாள் ஒன்றுக்கு ரூ.5 கோடியும் லாபம் ஈட்டுகின்றன. இருந்தாலும் நியாய விலைகடை மூலம் மண்ணெண்ணெய் விற்கும்போதும் சமையல் கேஸ் விற்பனையிலும் நஷ்டம்தான் ஏற்பட்டுக்கொண்டிருக்கிறது. ஒவ்வொரு லிட்டர் மண்ணெண்ணெயிலும் ரூ. 22.40 ம்,ஒவ்வொரு சிலிண்டர் சமையல் கேஸ் விற்பவையிலும் ரூ.343.49 ம் நஷ்டம் ஏற்படுகிறது. சர்வதேச சந்தையில் கச்சா எண்ணெய் விலை குறைந்திருப்பதால் இதனால் ஏற்பட்டு வந்த நஷ்டம் குறைந்திருக்கிறது என்றார் தியோரா.

நன்றி : தினமலர்

பெட்ரோல் விலை குறைய இன்னமும் ஒரு மாதம்...

சமையல் காஸ் மற்றும் கெரசின் விற்பனையில், பொதுத்துறை எண்ணெய் நிறுவனங்கள் தொடர்ந்து நஷ்டத்தை சந்தித்துக் கொண்டிருப்பதால், பெட்ரோல், டீசல் விலையைக் குறைக்கும் திட்டம் இல்லையென, அரசு தரப்பில் தெரிவிக்கப்பட்டுள் ளது.கச்சா எண்ணெய் விலை பேரல் ஒன்றுக்கு 147 டாலராக அதிகரித்த போது, கடந்த ஜூன் மாதத்தில், பெட்ரோல் விலை லிட்டருக்கு ஐந்து ரூபாயும், டீசல் விலை லிட்டருக்கு மூன்று ரூபாயும் உயர்த்தப்பட்டன. ஆனால், அதன் பின், கச்சா எண்ணெய் விலை படிப்படியாகக் குறைந்து வருகிறது. தற்போது, ஒரு பேரல் கச்சா எண்ணெய் விலை 50 டாலராகக் குறைந்துள்ளது.இதனால், பெட்ரோல், டீசல் விலைகள் குறைக்கப்படலாம் என செய்திகள் வெளியாயின. இந்நிலையில், பெட்ரோலியத் துறை செயலர் ஆர்.எஸ்.பாண்டே கூறுகையில், 'பொதுத்துறை எண்ணெய் நிறுவனங்கள் பெட்ரோல், டீசல் விற்பனையில் லாபம் பெற்றாலும், சமையல் காஸ் மற்றும் கெரசின் விற்பனையில், தொடர்ந்து நஷ்டத்தைச் சந்தித்து வருகின்றன. 'இந்த நிலை தொடரும் வரை, பெட்ரோலியப் பொருட்களின் விலைகளைக் குறைப்பது பற்றி பரிசீலிக்கப்படாது. விலைகளைக் குறைப்பது குறித்த திட்டம் எதுவும் தற்போதைக்கு இல்லை' என்றார்.ஆனால், நமது அரசு வாங்கும் கச்சா எண்ணெய் விலை சராசரியாக 48 டாலர் என்று தற்போது அரசால் கணக்கிடப்பட்டிருக்கிறது. பெட்ரோல், டீசல் மீதான எக்சைஸ் வரி வரவு கடந்த மாதத்தில் அரசுக்கு குறைந்திருக்கிறது. ஏற்கனவே விலை அதிகரிப்பால் எக்சைஸ் வரிக் குறைப்பை மேற்கொண்ட மத்திய அரசுக்கு இழப்பு 6000 கோடி ரூபாயாகும். ஆகவே, தற்போது பெட்ரோல், டீசல் மீது லிட்டருக்கு எக்சைஸ் வரி ஒரு ரூபாய் விதிப்பது, அதற்குப் பின் பெட்ரோல், டீசலுக்கு லிட்டருக்கு மூன்று ரூபாய் வரை குறைக்கலாம் என்ற திட்டம் அரசிடம் இருப்பதாகக் கூறப்படுகிறது.அதே சமயம், தற்போது ஆறு மாநிலங்களில் சட்டசபைத் தேர்தல் நடப்பதால், டிசம்பர் மாதக் கடைசி வரை இந்த விலைக் குறைப்பை அமல் படுத்த வேண்டாம். அதுவரை எண்ணெய் கம்பெனிகள் லாபம் அடையட்டும் என்ற கருத்து இருப்பதாகக் கூறப்படுகிறது.

நன்றி : தினமலர்

டிசம்பர் கடைசியில் பெட்ரோல், டீசல் விலை குறைப்பு ?

சர்வதேச சந்தையில் கச்தையில் கச்சா எண்ணெய் விலை குறிப்பிட்ட அளவு குறைந்திருப்பதை அடுத்து இந்தியாவிலும் பெட்ரோலிய பொருட்களுக்கான விலையை குறைக்கலாமா என்பது குறித்து மத்திய அரசு தீவிரமாக ஆலோசித்து வருவதாக தெரிகிறது. ஆனால் இந்த விலை குறைப்பு, சட்டசபை தேர்தல் முடியும் டிசம்பர் 24ம் தேதிக்குப்பின்தான் இருக்கும் என்றும் நம்பத்தகுந்த வட்டாரங்கள் தெரிவிக்கின்றன. ஜம்மு காஷ்மீர் சட்டசபை தேர்தல் முடியும் டிசம்பர் 24ம் தேதிக்குப்பின் பெட்ரோல், டீசல், மற்றும் சமையல் கேஸ் விலையை மத்திய அரசு குறைக்கும் என்கிறார்கள். இப்போது விலையை குறைத்தால் அது தேர்தல் கமிஷன் விதிமுறைகளை மீறிய செயலாகி விடும் என்பதால் தள்ளிப்போடப்படுகிறது என்றும் தெரிவிக்கப்பட்டுள்ளது. சர்வதேச சந்தையில் இப்போது கச்சா எண்ணெய் விலை 55 டாலரை ஒட்டியே இருக்கிறது. இந்தியாவில் டீசலின் விலையை லிட்டருக்கு ரூ.2 முதல் ரூ3 வரை குறைத்தால் கூட பணவீக்கம் 0.6 சதவீதத்தில் இருந்து 0.7 சதவீதம் குறைந்துவிடும் என்று பெட்ரோலிய அமைச்சக அதிகாரிகள் தெரிவித்தனர். நவம்பர் ஒன்றாம் தேதியுடன் முடிந்த வாரத்தில் இந்தியாவின் பணவீக்கம் 8.98 சதவீதமாக இருக்கிறது.

நன்றி :தினமலர்

இப்போதைக்கு பெட்ரோல், டீசல் விலை குறைப்பு இல்லை : மன்மோகன்சிங்

இந்திய எண்ணெய் நிறுவனங்கள் நஷ்டமில்லாமல் இயங்கும் வரை பெட்ரோல்,டீசல் விலை குறைக்கப்பட மாட்டாது என்று பிரதமர் மன்மோகன் சிங்தெரிவித்தார். எந்த அரசாக இருந்தாலும், மானியம் கொடுப்பதற்கென்று ஒரு அளவு இருக்கிறது. அதனை கொடுத்துக்கொண்டே இருக்க முடியாது. எனவே நஷ்டமில்லாமல் எண்ணெய் நிறுவனங்கள் இயங்கும் வரை நாம் காத்திருக்க வேண்டியதுதான் என்றார். எப்போது இந்திய எண்ணெய் நிறுவனங்களால் மானியம் கொடுக்காமலும் இயங்க முடிகிறதோ, அது தான் பெட்ரோல், டீசல் விலையை குறைக்க சரியான நேரமாக இருக்கும். மூன்று நாள் பயணமாக அரபு நாடுகளுக்கு சென்றுவிட்டு புதுடில்லி கிளம்பி வந்து கொண்டிருந்தபோது விமானத்தில் பத்திரிக்கையாளர்களிடையே பேசிய சிங், இவ்வாறு தெரிவித்தார். இப்போது சர்வதேச சந்தையில் கச்சா எண்ணெய் விலை குறைந்திருப்பதால், இந்திய எண்ணெய் கம்பெனிகள் பெட்ரோல் விற்பனையின்போது லாபம் சம்பாதிக்கின்றன. ஆனால் டீசல் விற்பனையில் தொடர்ந்து நஷ்டம்தான் ஏற்பட்டுக் கொண்டிருக்கிறது. இதற்காக மத்திய அரசு அதிகப்படியான மானியத்தை எண்ணெய் நிறுவனங்களுக்கு கொடுத்துக்கொண்டுதான் இருக்கிறது. எனினும் எவ்வளவு காலத்திற்குதான் மானியம் கொடுப்பது என்பதற்கு ஒரு எல்லை இருக்கிறது என்றார். இப்போது இந்தியன் ஆயில், பாரத் பெட்ரோலியம் மற்றும் ஹிந்துஸ்தான் பெட்ரோலியம் போன்ற எண்ணெய் நிறுவனங்கள் ஒவ்வொரு லிட்டர் பெட்ரோல் விற்கும் போதும் ரூ.4.12 லாபம் சம்பாதிக்கின்றன. ஆனால் டீசல் விற்கும்போது ரூ.0.96 நஷ்டமடைகின்றன.

நன்றி : தினமலர்

பெட்ரோல் விலை குறையாது

பெட்ரோல்,டீசல் விலை குறைப்பு பற்றி இன்னும் அரசு யோசிக்கவில்லை என மத்திய அரசு தெரிவித்துள்ளது. இது குறித்து, பெட்ரோலியத் துறை செயலர் ஆர்.எஸ் பாண்டே நிருபர்களிடம் கூறியதாவது: தற்போதைய நிலையில் பெட்ரோலிய பொருட்களின் விலை குறைப்பு பற்றி எவ்வித பரிசீலனையும் செய்யப்படவில்லை. பெட்ரோல் விற்பனையின் மூலம் கிடைக்ககூடிய லாபம் கணிசமாக அதிகரித்த போதிலும் டீசல் மற்றும் சமையல் காஸ் சிலிண்டருக்கு அளிக்கப்படும் மானியத்தை ஈடுகட்ட வேண்டியுள்ளது. மேலும் கச்சா எண்ணெயின் விலை மற்றும் டாலருக்கு இணையான இந்திய ரூபாயின் மதிப்பு நிலை இல்லாமல் ஏற்றம் இறக்கத்தில் உள்ளது.
பனிரெண்டு மாதங்களுக்கு பிறகு முதல்முறையாக, பொதுத்துறை எண்ணெய் நிறுவனங்கள் பெட்ரோல் மூலம் லாபம் ஈட்ட துவங்கியுள்ளன. இருப்பினும் மற்ற மூன்று வகைகளின் மூலம் நாள் ஒன்றுக்கு ரூ.155 கோடி இழப்பு ஏற்பட்டுள்ளது.

நன்றி : தினமலர்

இந்தியன் ஆயில் கார்பரேஷனுக்கு ரூ.7 ஆயிரம் கோடி நிகர நஷ்டம் ஏற்பட்டுள்ளது

செப்டம்பர் 30ம் தேதியுடன் முடிந்த இந்த நிதி ஆண்டின் இரண்டாவது காலாண்டில் இந்தியன் ஆயில் கார்பரேஷன் ரூ.7,047.13 கோடி நிகர நஷ்டமடைந்திருக்கிறது. ஆனால் கடந்த வருடம் இதே காலாண்டில் ஐ.ஓ.சி., ரூ.3,817.75 கோடி நிகர லாபம் ஈட்டியிருந்தது. இந்த நிதி ஆண்டின் முதல் இரண்டு காலாண்டுகளிலுமே ஐ.ஓ.சி., நஷ்டம்தான் அடைந்திருக்கிறது. இதற்கு முன் அது, 2007 - 08 நான்காவது காலாண்டில்தான் நஷ்டத்தை சந்தித்திருந்தது. ரூபாயின் மதிப்பு குறைந்ததால் அதற்கு கிடைக்க வேண்டிய வெளிநாட்டு பண அளவு குறைந்து போனது, கச்சா எண்ணெய் விலை குறைந்திருப்பதால் இன்வென்ட்ரி வேல்யூவேஷனில் ஏற்பட்ட இழப்பு, வங்கியின் வட்டி விகிதம் அதிகரித்திருப்பதால் அதிகரித்து விட்ட செலவினம் போன்ற காரணங்களால், இந்த காலாண்டில் நஷ்டம் ரூ.7 ஆயிரம் கோடியாக அதிகரித்து விட்டதாக ஐ.ஓ.சி.,யின் சேர்மன் சர்தக் பெகுரியா தெரிவித்தார். ஆனால் நீண்ட இடைவேளைக்குப்பின் இன்று சனிக்கிழமையில் இருந்து அது லாபம் அடையும் என்று எதிர்பார்க்கிறார்கள். காரணம், கச்சா எண்ணெய் விலை கனிசமாக குறைந்திருப்பதுதான். இதுவரை பெட்ரோல் விற்பனையால் நஷ்டமடைந்து வந்த ஐ.ஓ.சி., இனிமேல் ஒவ்வொரு லிட்டர் பெட்ரோல் விற்கும் போதும் ரூ.4.12 லாபம் அடையும் என்று எதிர்பார்க்கிறார்கள். ஆனால் டீசல், சமையல் எரிவாயு, மண்ணெண்ணெய் விற்பனையின் போது தொடர்ந்து நஷ்டம்தான் அடையும் என்று சொல்கிறார்கள். ஒவ்வொரு லிட்டர் டீசலிலும் ரூ.0.96 ம், மண்ணெண்ணெயில் ரூ.22.40 ம், எல்.பி.ஜி.,யில் ரூ.343.49 ம் நஷ்டமடையும் என்கிறார்கள். இவைகளின் விற்பனையால் ஐ.ஓ.சி., நாள் ஒன்றுக்கு அடையப்போகும் நஷ்டம் ரூ.85 கோடி.

நன்றி : தினமலர்

பெட்ரோல், டீசல் விலை குறைப்பு: சில வாரங்களுக்கு காத்திருங்கள்...

'கச்சா எண்ணெய் விலை குறைந்து வந்தபோதிலும், இன்னும் சில வாரங்களுக்கு நிலைமையை உன்னிப்பாக கவனித்த பின்பே, பெட்ரோல் டீசல் விலை குறைப்பு குறித்து முடிவு செய்யப்படும். அதுவரை விலை குறைப்பு என்பதற்கே இடமில்லை' என மத்திய அரசு திட்டவட்டமாக அறிவித்துள்ளது. சர்வதேச அளவில் கச்சா எண்ணெய் விலை ராக்கெட் வேகத்தில் உயர்ந்து அச்சுறுத்தலை ஏற்படுத்தியது. இப்போதே அதிகமாக ஏறிய விலையில் பாதி விலைக்கு வந்துவிட்டது. இதன் காரணமாக, பெட்ரோல் டீசல் விலை குறைக்கப்படுமா என்ற எதிர்பார்ப்பு ஏற்பட்டுள்ளது. கடந்த வாரம் பார்லிமென்ட்டில் எதிர்க்கட்சிகள், இது குறித்து பிரச்னை எழுப்பிய போது, ஒரு வாரத்தில் பதில் அளிப்பதாக பெட்ரோலியத்துறை அமைச்சர் முரளி தியோரா அறிவித்து இருந்தார். தற்போது, கச்சா எண்ணெயின் விலை நினைத்து பார்க்காத வகையில் பழைய நிலைக்கு நெருங்கிவிட்டது. இருப்பினும் டாலருக்கு இணையான இந்திய ரூபாயின் மதிப்பு பயங்கரமாக சரிந்து விட்டது. இதனால், கச்சா எண்ணெய்க்கு டாலரில் மாற்றி கொடுக்கும்போது தொடர்ந்து இழப்பு ஏற்பட்டு வருவதாக மத்திய அரசு கணக்கு காட்டி வருகிறது. இதையேதான் நேற்று மத்திய பெட்ரோலிய அமைச்சக துணை செயலர் எஸ்.சுந்தரேசன் நிருபர்களிடம் தெரிவித்தார். அவர் கூறியதாவது: கச்சா எண்ணெய் விலை தொடர்ந்து, குறைந்துவந்தாலும், பெட்ரோல் ,டீசல், காஸ் விலையை குறைப்பது பற்றி இப்போதைக்கு முடிவு செய்யவில்லை. 15 மாதத்தில் இல்லாத அளவுக்கு குறைந்துவந்த போதிலும், இதே நிலைக்கு ஸ்திரமாகுமா என்பதை கவனிக்க வேண்டியுள்ளது. மேலும் ஏற்கனவே ஏற்பட்டு வரும் இழப்புகளை மீண்டும் தொடராத அளவுக்கு நிலைமை யை சமாளிக்க முடியுமான என கவனித்து வருகிறோம். எனவே இன்னும் சில வாரங்களுக்கு நிலைமையை உன்னிப்பாக கவனித்த பிறகு முடிவு செய்யப்படும். ஒன்று இரண்டு நாட்களில் ஏற்படும் விலை குறைவை வைத்து முடிவு செய்ய முடியாது. நேற்று முன் தினம் இந்தியா வாங்கும் கச்சா எண்ணெய் விலை சராசரியாக 56 டாலராக இருந்தது. இன்று இரண்டு டாலர் கூடியுள்ளது. சீரானநிலையில் ஸ்திரமாகும் பட்சத்தில் விலை குறைப்பு பற்றி முடிவு செய்யப்படும். இதற்கு குறைந்த பட்சம் ஒரு மாதம் ஆகும். இவ்வாறு சுந்தரேசன் கூறினார்.

நன்றி : தினமலர்

பெட்ரோல், டீசல் விலையை குறைக்கும் எண்ணம் இப்போதைக்கு இல்லை : மத்திய அரசு அதிகாரிகள்

இப்போதைக்கு பெட்ரோல், டீசல் விலையை குறைக்கும் எண்ணம் இல்லை என்றும், சர்வதேச சந்தையில் கச்சா எண்ணெய் விலையின் போக்கை தொடர்ந்து கொஞ்சம் நாட்களுக்கு கண்காணித்தபின்பே அது பற்றி முடிவு எடுக்கப்படும் என்றும் மத்திய பெட்ரோலியத்துறை அமைச்சகத்தின் கூடுதல் செயலாளர் சுந்தரேசன் தெரிவித்தார். இன்னும் சில வாரங்களுக்கு கச்சா எண்ணெய் விலையின் போக்கை நாங்கள் கண்காணிக்க இருக்கிறோம். அதன் பின்னரே விலை குறைப்பு பற்றி முடிவு செய்ய வேண்டும் என்றார் அவர். கச்சா எண்ணெய் விலை பேரலுக்கு 57 டாலருக்கும் குறைவாக வந்தால்தால் பெட்ரோல் விலை குறைப்பது பற்றி முடிவு செய்ய முடியும் என்று ஏற்கனவே மத்திய அரசு சொல்லி வந்துள்ளது. இந்தியா வாங்கும் பேஸ்கட் குரூட் ஆயில் விலை கடந்த வாரத்தில் பேரலுக்கு 64 டாலராக இருந்தது. சர்வதேச சந்தையில் கச்சா எண்ணெய் விலை இன்று புதன் கிழமை பேரலுக்கு 1.99 டாலர் உயர்ந்து 64.72 டாலராக இருக்கிறது.

நன்றி : தினமலர்

டீசல் தட்டுப்பாடு ஏற்பட்டது ஏன் ?

ஏப்ரல் - ஜூலை மாதத்தில் இந்தியாவின் டீசல் தேவை ( டிமாண்ட் ) சராசரியாக 18 சதவீதம் அதிகரித்திருக்கிறது. மின் உற்பத்தி நிலையங்களில் டீசலுக்கான தேவை அதிகரித்திருப்பதால் தான் இந்த உயர்வு ஏற்பட்டிருக்கிறது. அதனால் தான் இந்தியாவில் டீசலுக்கு பற்றாக்குறை ஏற்பட்டுள்ளது என்று எண்ணெய் நிறுவனங்கள் தெரிவித்திருக்கின்றன. டீசலுக்கான தேவை அதிகரித்திருப்பதாலும் இந்தியாவில் கிடைக்கும் பெட்ரோலிய உற்பத்தி குறைந்திருப்பதாலும் நாம் 2008 - 09 ல் 4.14 மில்லியன் டன் டீசலை இறக்குமதி செய்ய வேண்டியதாகிறது. இதில் 1.267 மில்லியன் டன் டீசலை ஏப்ரல் - ஜூலையில் இறக்குமதி செய்திருக்கிறோம் என்று ஐ ஓ சி சேர்மன் புகாரியா தெரிவித்தார். மேலும் இப்போதுள்ள டீசல் தட்டுப்பாட்டை சமாளிக்கும் விதமாக, இப்போது லிட்டருக்கு ரூ.34.80 என்ற விலையில் விற்கப்படும் டீசலை, தொழிற்சாலைகள் மற்றும் பெரிய நிறுவனங்களுக்கு விற்கும் போது, லிட்டருக்கு ரூ.57 என்ற விலையில் விற்கலாம் என்று இந்திய எண்ணெய் நிறுவனங்கள் கருத்து தெரிவித்திருக்கின்றன. எண்ணெய் நிறுவனங்களிடமிருந்து நேரடியாக டீசலை வாங்கும் இந்திய ரயில்வே, மின் உற்பத்தி நிலையங்கள் போன்ற நிறுவனங்களுக்கு சப்ளை செய்யும் டீசலுக்கு லிட்டருக்கு ரூ.57 என்று விலை வைக்கலாம் என்று எண்ணெய் நிறுவனங்கள் மத்திய பெட்ரோலிய துறைக்கு பரிந்துரை செய்திருக்கிறது. மேலும் போக்குவரத்து துறை மற்றும் விவசாயத்துறைக்கு தள்ளுபடி விலையில் சப்ளை செய்யும் டீசலுக்கும் சில கட்டுப்பாடுகள் விதிக்கலாம் என்றும் சொல்லியிருக்கிறார்கள். கடந்த வாரத்தில் பெட்ரோலிய அமைச்சர் முர்ளி தியோரவை சந்தித்து டீசல் தட்டுப்பாடு குறித்து விவாதித்த எண்ணெய் நிறுவன அதிகாரிகள், அப்போது, ஏப்ரல் - ஜூலை மாதங்களில் மட்டும் இந்தியாவில் டீசலுக்கான தேவை 18 சதவீதம் அதிகரித்திருக்கிறது. இந்த 18 சதவீததேவை அதிகரிப்பு பெரும்பாலும் மின்நிலையங்களால்தான் ஏற்பட்டிருக்கிறது என்றனர். போக்குவரத்து, விவசாயம் போன்ற துறைகளில் டீசலின் தேவை 10 - 12 சதவீதமும், மின் உற்பத்தி நிலையங்கள் மற்றும் தொழிற்சாலைகளில் டீசலின் தேவை 30 சதவீதம் அதிகரித்திருக்கிறது என்றனர்.

நன்றி : தினமலர்

தமிழ்நாட்டில் டீசல் பெட்ரோல் பங்குகளுக்கு ஞாயிறு விடுமுறை

தமிழ்நாட்டில் தற்போது டீசலுக்கு ஏற்பட்டுள்ள பெரும் தட்டுப்பாடு காரணமாக வரும் செப்டம்பர் 15 ம் தேதியில் இருந்து பெட்ரோல் நிலையங்களுக்கு ஞாயிறுதோறும் விடுமுறை விடுவது என்று தமிழ்நாடு பெட்ரோல், டீசல் விநியோகஸ்தர்கள் சங்க கூட்டத்தில் முடிவு செய்யப்பட்டது. தமிழ்நாட்டில் ஏற்பட்டுள்ள டீசல் தட்டுப்பாட்டை சமாளிப்பது குறித்து இன்று சேலத்தில் தமிழ்நாடு பெட்ரோல்,டீசல் வினியோகஸ்தர்கள் சங்கம் கூடி ஆலோசனை நடத்தியது. இந்த கூட்டத்தில் பெட்ரோல்,டீசல் தட்டுப்பாட்டை சமாளிக்க, பிரதி ஞாயிறுதோறும் பெட்ரோல் விற்பனை நிலையங்களுக்கு விடுமுறை விடுவது என்று முடிவு செய்யப்பட்டது. மேலும் வார நாட்களில் காலை 6 மணி முதல் இரவு பத்து மணி வரைக்கு மட்டுமே பெட்ரோல் பங்க்குகள் இயக்கப்பட வேண்டும் என்றும் முடிவு செய்யப்பட்டுள்ளது. இந்த திட்டம் செப்டம்பர்15ம் தேதி முதல் நடைமுறைக்கு வரும் என்று, தமிழ்நாடு பெட்ரோல், டீசல் வினியோகஸ்தர்கள் சங்கங்க தலைவர் கண்ணன் தெரிவித்தார். இதற்கிடையே, டீசல் தட்டுப்பாடு குறித்து மத்திய அரசுக்கு, தமிழக அரசு கோரிக்கை கடிதம் அனுப்பியுள்ளது. அந்த கடிதத்தில், தமிழகத்தில் நிலவி வரும் டீசல் தட்டுப்பாட்டு பிரச்னையில் மத்திய அரசு உடனடியாக தலையிட்டு, உரிய நடவடிக்கை எடுக்க வேண்டும் என்று கேட்டுக்கொண்டுள்ளதாக சொல்லப்படுறகிறது.
நன்றி : தினமலர்