யு.பி.ஏ.அரசு நீடிக்கவே பெரும்பாலான இந்திய சி.இ.ஓ.,க்கள் விரும்புகிறார்கள் : சர்வே

மும்பை : இப்போது ஆட்சியில் இருக்கும் காங்கிரஸ் தலைமையிலான யு.பி.ஏ., அரசு நீடிக்கவே இந்தியாவில் உள்ள பெரும்பாலான தொழில் நிறுவனங்களின் தலைமை செயல் அலுவலர்கள் ( சி.இ.ஓ.,) விரும்புகிறார்கள் என்று, இன்று எடுத்த ஒரு சர்வேயில் தெரிய வந்துள்ளது. காங்கிரஸ் கூட்டணியை இதுவரை ஆதரித்து வந்த இடதுசாரி கட்சிகள், அணுசக்தி ஒப்பந்தத்திற்கு எதிர்ப்பு தெரிவித்து ஆதரவை வாபஸ் பெற்றுக்கொண்டதை அடுத்து, அரசு மீதான நம்பிக்கை ஓட்டெடுப்பு நாளை நடக்கிறது. இந்நிலையில் அசோசியேட்டட் சேம்பர் ஆஃப் காமர்ஸ் அண்டு இன்டஸ்டிரீஸ் ( அசோசெம் ) என்ற அமைப்பு இன்று திங்கட்கிழமை, இந்திய தொழில் நிறுவனங்களில் உயர் அதிகாரிகளாக பணியாற்றும் சி.இ.ஓ.,க்களிடம் நடத்திய ஒரு சர்வேயில், இப்போது ஆளும் காங்கிரஸ் தலைமையிலான யு.பி.ஏ., அரசுதான் தொடர்ந்து நீடிக்க வேண்டும் என்று பெரும்பாலானவர்கள் விருப்பம் தெரிவித்திருந்தது தெரிய வந்துள்ளது. 400 சி.இ.ஓ.,க்களிடம் எடுத்த கருத்து கணிப்பில் 72 சதவீதத்தினர் காங்கிரஸ் தலைமையிலான அரசுதான் நீடிக்க வேண்டும் என்று சொல்லியிருக்கிறார்கள்.நம்பிக்கை ஓட்டெடுப்பில் வெற்றி பெற்று, அவர்கள் ( காங்கிரஸ் ), பென்சன், இன்சூரன்ஸ், சிவில் ஏவியேஷன், தொழிலாளர் முன்னேற்றம் போன்ற துறைகளில் இன்னும் வேகமான முன்னேற்றத்தை கொண்டு வர வேண்டும் என்று கருத்து தெரிவித்திருக்கின்றனர். இந்தியா அணுசக்தி ஒப்பந்தத்தில் கையெழுத்திட்டால், இன்னும் 15 வருடங்களில் அணுசக்தி துறை சம்பந்தமான தொழில்களில் சுமார் 40 பில்லியன் டாலர் ( சுமார் 1,70,000 கோடி ரூபாய் ) மதிப்புள்ள முதலீடு இந்தியாவுக்கு வரும் என்றும் அவர்கள் சொல்லியிருக்கிறார்கள். ஏனென்றால் அது சம்பந்தமான பேச்சுவார்த்தையை ஏற்கனவே இந்திய நிறுவனங்கள் வெளிநாட்டு நிறுவனங்களுடம் நடத்தி வைத்திருக்கின்றன என்றனர்.

நன்றி : தினமலர்

இன்றும் ஏற்றத்தில் முடிந்த பங்கு சந்தை

மும்பை : நாளை மத்திய அரசு மீது நம்பிக்கை வோட்டு எடுக்க இருக்கும் நிலையில், இன்றைய பங்கு சந்தை கீழே இறங்கி விடும் என்றுதான் எல்லோரும் எதிர்பார்த்தார்கள். மதியம் வரை இந்த எதிர்பார்ப்பு இருந்துகொண்டுதான் இருந்தது. ஆனால் காலை வர்த்தக ஆரம்பத்தில் இருந்தே ஏறி இருந்த சென்செக்ஸ் மதியத்திற்கு மேல் வேகமாக உயர ஆரம்பித்தது. பேங்கிங், ரியல் எஸ்டேட், பார்மா, ஆட்டோ, பவர், எண்ணெய் நிறுவனம் ஆகிய பங்குகள் வேகமாக உயர துவங்கியது. மும்பை பங்கு சந்தையில் மாலை வர்த்தக முடிவில் சென்செக்ஸ் 214.64 புள்ளிகள் ( 1.57 சதவீதம் ) உயர்ந்து 13,850.04 புள்ளிகளில் முடிந்தது. தேசிய பங்கு சந்தையில் நிப்டி 67.25 புள்ளிகள் ( 1.64 சதவீதம் ) உயர்ந்து 4,159.50 புள்ளிகளில் முடிந்தது. ஆசிய பங்கு சந்தைகளிலும் இன்று உயர்வு நிலைதான் இருந்தது. ஷாங்கை, ஹேங் ஷெங், ஜகர்தா காம்போஸைட், ஸ்டிரெய்ட்ஸ் டைம்ஸ், கோஸ்பி, மற்றும் தைவான் வெயிட்டட் போன்றவைகள் 2.5 சதவீதத்தில் இருந்து 4 சதவீதம் வரை உயர்ந்திருந்தது. ஐரோப்பிய பங்கு சந்தைகளிலும் இன்று ஏற்ற நிலையே இருந்தது.

நன்றி : தினமலர்

வெளிநாடுகளில் இந்தியர்களின் முதலீடு 53.2 சதவீதம் அதிகரித்திருக்கிறது

புதுடில்லி : வெளிநாட்டினர் இந்திய நிறுவனங்களில் முதலீடு செய்வதுபோல இந்தியர்களும் வெளிநாட்டில் இருக்கும் நிறுவனங்களில் அதிக அளவில் முதலீடு செய்கிறார்கள். அது வெளிநாட்டு நிறுவனங்களுடன் கூட்டு சேர்ந்தோ ( ஜாயின்ட்வெஞ்சர் ) அல்லது வெளிநாட்டு நிறுவனங்களின் பெரும்பான்மை பங்குகளை வாங்கிக்கொள்வதன் மூலமாகவோ ( ஹோல்லி - ஓன்ட் சப்சியடரிஸ் ) இந்தியர்களின் முதலீடு இருக்கிறது. இந்த முதலீடு 2007 நிதி ஆண்டை விட 2008 நிதி ஆண்டில் 53.2 சதவீதம் அதிகரித்திருக்கிறது. 2007ல் 15.6 பில்லியன் டாலராக இருந்த இந்தியர்களின் முதலீடு 2008 நிதி ஆண்டில் 23.071 பில்லியன் டாலராக அதிகரித்திருக்கிறது. 2007 ல் 1,817 வெளிநாட்டு நிறுவனங்களில் முதலீடு செய்திருந்த இந்தியர்கள் 2008ல் 2,261 நிறுவனங்களில் முதலீடு செய்திருக்கிறார்கள். இது 24.4 சதவீதம் அதிகம். இந்தியர்களில் முதலீட்டில் பெரும்பகுதி சைப்ரஸ், சிங்கப்பூர், நெதர்லாந்து, ஐக்கிய அரபு குடியரசு, பிரிட்டிஷ் விர்ஜின் தீவுகள், மொரீசியஸ் போன்ற நாடுகளில் செய்யப்பட்டிருக்கிறது. இந்த நாடுகள் தான் வெளிநாட்டினர் எளிதில் முதலீடு செய்யும் வகையில் திட்டங்களை வைத்திருக்கின்றன.

நன்றி : தினமலர்

ஆசிய சந்தையில் கச்சா எண்ணெய் விலை சிறிது உயர்ந்தது

சிங்கப்பூர் : ஆசிய சந்தையில் இன்று காலை கச்சா எண்ணெய் விலை சிறிது உயர்ந்திருக்கிறது. அணுசக்தி சோதனையை நிறுத்த சொல்லி ஈரானை கேட்டுக்கொள்ள, வியன்னாவில் நடந்து வரும் பேச்சுவார்த்தையில் சிறிது முன்னேற்றம் ஏற்பட்டுள்ளதை அடுத்து கச்சா எண்ணெய் விலை சிறிது உயர்ந்துள்ளதாக வர்த்தகர்கள் சொல்கிறார்கள். இன்று காலை வர்த்தகத்தில் நியுயார்க் சந்தையின் முக்கிய பொருளான லைட் ஸ்வீட் குரூட் ஆயில் ( ஆகஸ்ட் டெலிவரிக்கானது ) விலை பேரல் ஒன்றுக்கு 82 சென்ட் உயர்ந்து 129.70 டாலராக இருந்தது. பிரன்ட் நார்த் ஸீ குரூட் ஆயில் விலை ( செப்டம்பர் டெலிவரிக்கானது ) ஒரு சென்ட் உயர்ந்து 130.20 டாலராக இருந்தது. ஈரானை அணுசக்தி சோதனையை நிறுத்த சொல்லி நடந்து வரும் பேச்சுவார்த்தையில் சிறிது முன்னேற்றம் ஏற்பட்டாலும் இன்னும் முடிவு எதுவும் எட்டப்படவில்லை. இந்த விஷயத்தில் ஈரான், அமெரிக்காவுடன் ஒத்துப்போனால் அது எல்லோருக்கும் பயனுள்ளதாக இருக்கும். ஒத்துப்போகவில்லை என்றால் அது மற்ற நாடுகளில் இருந்து தனிமை படுத்தப்படும் என்று எச்சரிக்கைபடுத்தப்பட்டுள்ளது

நன்றி : தினமலர்

மாதங்களில் பணவீக்கம் குறையும் ரிசர்வ் வங்கி கவர்னர் நம்பிக்கை

புதுடில்லி: 'இன்னும் ஆறு மாதங்களில் பணவீக்கம் 5.5 சதவீதமாக குறையும். இதற்கான நடவடிக்கைகள் முழு வீச்சில் மேற்கொள்ளப் பட்டுள்ளன' என ரிசர்வ் வங்கி உறுதி அளித்துள்ளது. நாட்டின் பணவீக்க அளவு, இதுவரை இல்லாத அளவிற்கு அதிகரித்துள்ளது. இதனால், அத்தியாவசியப் பொருட்களின் விலை வரலாறு காணாத அளவிற்கு உயரும் அபாயம் ஏற்பட்டுள்ளது. பணவீக்கத்தை கட்டுப்படுத்துவது குறித்து, ரிசர்வ் வங்கி கவர்னர் ரெட்டி, பார்லிமென்ட் நிலைக் குழுவுடன் சமீபத்தில் விவாதித்தார். அப்போது அவர் பேசியதாவது: பணவீக்கத்தை கட்டுப்படுத்த அதிகபட்ச முயற்சிகள் மேற்கொள்ளப்பட்டுள்ளன. இன்னும் ஆறு மாதங்களுக்குள், பணவீக்கம் 5.5 சதவீதமாக குறைக்கப்படும். இதற்கான நடவடிக்கைகள் மேற்கொள்ளப்பட்டுள்ளன. வளர்ந்து வரும் மற்ற நாடுகளை ஒப்பிடும்போது, நமது நாட்டின் பொருளாதார நிலை சிறப்பாகவே உள்ளது. உலகம் முழுவதும் தற்போது பொருளாதார தேக்க நிலை ஏற்பட்டுள்ளது. அதன் தாக்கம் இந்தியாவிலும் எதிரொலிக்கிறது. இந்த சூழ்நிலையில், வளர்ச்சி அடைந்த ஐரோப்பிய நாடுகள் மற்றும், ஜப்பானில் உள்ள பொருளாதார வளர்ச்சியை நமது நாட்டு வளர்ச்சியோடு ஒப்பிட்டு பார்க்க கூடாது. இவ்வாறு ரெட்டி கூறினார். கவர்னர் ரெட்டி தனது பேச்சின் போது, வங்கிகளின் வட்டி வீதத்தை மேலும் அதிகரிப்பது பற்றியோ, தற்போதுள்ள நிலையில் எப்போது மாற்றம் ஏற்படும் என்பது பற்றியோ தெளிவாக கூறவில்லை.

நன்றி : தினமலர்

பங்குச் சந்தை தலைவிதியை நிர்ணயிக்கப் போகிறது ஓட்டெடுப்பு முடிவு

கோடையில் ஒரு வசந்தம் போல, இந்த இறக்கத்திலும் வியாழனும், வெள்ளியும் பங்குச் சந்தைக்கு வசந்த நாட்கள் தான். இரண்டு நாட்களில் 1,050 புள்ளிகளுக்கு மேல் மும்பை பங்குச் சந்தையில் ஏற்றம் என்பது சும்மாவா? அது, உலகத்திற்கே ஒரு வசந்த நாட்க ளாக இருந்திருக்கக் கூடும். ஏனெனில், கச்சா எண்ணெய் விலை புதனன்று பேரலுக்கு ஆறு டாலரும், வியாழனன்று நான்கு டாலரும் குறைந்து, எல்லார் வயிற்றிலும் எண்ணெயை (பாலை) வார்த்தது எனக் கூறலாம். புதனன்று குறைந்த ஆறு டாலர் (அதாவது ஒரே நாளில்) என்பது கடந்த 17 ஆண்டுகளில் அதிகபட்சம். ஏன் புதனன்று அவ்வளவு குறைந்தது? அமெரிக்காவின் ஒரு அறிக்கை தான். அதாவது தங்களிடம் தேவைக்கு அதிகமான கச்சா எண்ணெய் இருப்பதாக வெளிவந்த ஒரு அறிக்கை தான் காரணம். மேலும், அமெரிக்காவில் சில வங்கிகள், நல்ல காலாண்டு முடிவுகளை கொண்டு வந்துள்ள செய்திகளும் சந்தைக்கு இனிப்பு சேர்த்தன. இந்த செய்திகள், வியாழனன்று இந்திய பங் குச் சந்தைகளை தூக்கிச் சென்றது. அரசியல் நிலைமை இன்னும் நிலையற்றதாக இருப்பினும், அதை சந்தை சிறிது மறந்து மேலே உயரப் பறந்து சென்றது. மும்பை பங்குச் சந்தை 536 புள்ளிகள் மேலே சென்று முடிவடைந்தது.
பணவீக்கம் எங்குள்ளது?: இந்த வார பணவீக்கம் 11.91 சதவீதத் தில் உள்ளது. இது, சென்ற வார அளவை விட மிகச்சிறிய அளவே கூடுதல். சென்ற வாரம் 11.89 சதவீதமாக இருந்தது. இது, ஒரு நிம்மதியளிக்கக் கூடிய விஷயம். நிம்மதிகள் சந்தையில் அதிகப்படியான புள்ளிகளாக மாறியது, இன்னும் நிம்மதியளிக்கக்கூடியது. ஒவ்வொரு வாரமும் வெள்ளியன்று கணக்கிடப்பட்டு வந்த பணவீக்க அளவு, இந்த வாரம் முதல் வியாழன் அன்று வெளியிடப்படும். இனி, ஒரு நாள் முன்னதாகவே வந்து பயமுறுத்தாமல் இருந்தால் சரி தான். பணவீக்க சதவீதம் 12க்கு மேலாக இருக்கும் என்று எல்லாரும் எதிர்பார்த்தனர். ஆனால், 12 சதவீதத்துக்கு கீழேயே இந்த வாரமும் இருந்தது, வங்கிப் பங்குகளுக்கு கொண்டாட்டமாக இருந்தது. ஐ.சி.ஐ.சி.ஐ., வங்கியின் பங்குகள் சமீபகாலமாக மிகவும் பந்தாடப்பட்டு கீழே விழுந்து கொண்டே இருந்தன. அந்த வங்கியின் பங்குகள் 10 சதவீதம் வெள்ளியன்று கூடின. வங்கிப் பங்குகளும், ரிலையன்ஸ் பங்குகளும் சந்தை உயர்வதற்கு காரணமாக இருந்தன. வெள்ளியன்று இறுதியாக மும்பை பங்குச் சந்தை 525 புள்ளிகள் கூடி 13,635 புள்ளிகளுடனும், தேசிய பங்குச் சந்தை 145 புள்ளிகள் கூடி 4,092 புள்ளிகளுடனும் முடிவடைந்தது. முன் பெல்லாம் தேசிய பங்குச் சந்தை 5,000க்கு கீழே வந்தாலே பயப்படும் முதலீட்டாளர்கள், இப்போதெல்லாம் 4,000க்கு கீழே செல்லாமல் இருந்தால் சரிதான் என்ற நிலைக்கு வந்துவிட்டனர். குறைந்து வரும் ஓட்டல் வாடகைகள்:சென்ற ஆண்டு வரை இந்திய ஓட்டல்களுக்கு கொண்டாட்டமாக இருந்தது. அவர்கள் வைத்தது தான் தினசரி வாடகை என்ற நிலைமை இருந்தது. தற் போது கூடி வரும் பணவீக்கத்தால், பல கம்பெனிகள் தங்கள் ஓட்டல் செலவுகளை குறைத்து விட்டன அல்லது காலை சென்று, மாலை திரும்புமாறு அமைத் துக் கொண்டுள்ளன. ஆதலால், ஓட்டல் கள் தங்கள் தினசரி வாடகைகளை 30 முதல் 40 சதவீதம் குறைத்துள்ளன. இது, ஓட்டல் பங்குகளின் வருங்கால லாபங்களை குறைக்கும்.
புதிய வெளியீடுகள்: இந்த சந்தையிலும் புதிய வெளியீடுகள் வந்து கொண்டு தான் இருக்கின்றன. விஷால் இன்போடெக் என்ற கம்பெனி, தனது புதிய வெளியீடைக் கொண்டு வந் துள்ளது. ரூ.140 முதல் ரூ.150 வரை விலை நிர்ணயிக்கப்பட்டுள்ளது. ரிஸ்க் எடுக்க விரும்புபவர்கள் போடலாம். சமீபத்தில் வெளிவந்த ஆர்கிட் பிளை என்ற கம்பெனியின் வெளியீடு ரூ.70 முதல் 80 ரூபாய் வரை வந்தது. அதன் பங்குகள் தற்போது 37 ரூபாய் அளவிலே விற்கப்படுகிறது. அதுபோல, அவான் வெயிங் சிஸ்டம்ஸ் கம்பெனி 10 ரூபாய்க்கு வெளியிட்ட பங்குகள், தற்போது ரூபாய் எட்டு அளவில் கிடைக்கிறது. எல்லா பங்குகளும் ஆடித் தள்ளுபடியில் கிடைக்கிறது. வாங்கத்தான் ஆளில்லை.
காலாண்டு முடிவுகள்: ஒம்னிடெக், பவர் பைனான்ஸ், மன்சான்டோ, ஹைக்கல், கோல்கேட், பையோகான் ஆகிய கம்பெனிகள் நல்ல காலாண்டு முடிவுகளை கொடுத்துள்ளன.
அடுத்த வாரம் எப்படி இருக்கும்?: முன்பே கூறியபடி அரசியல் நிலைமைகளை வைத்துத் தான் அடுத்த வாரம் துவக்கம் இருக்கும். அரசியலுக்கு ஒவ்வொரு ஓட்டும் எவ்வளவு முக்கியமோ அவ்வளவு முக்கியம் முதலீட்டாளர்களுக்கும்.சந்தை மிகவும் கீழே இறங்கியுள்ளது. சிறிது ரிஸ்க் எடுத்து வாங்க நினைப்பவர்களுக்கு இது ஒரு சந்தர்ப்பம். உதாரணமாக, ஒரு கம்பெனியின் பங்கை ரூ.100க்கு வாங்க நினைத்தால், 25 பங்குகள் வாங்க இது ஒரு நல்ல சந்தர்ப்பம். இதற்கும் கீழே குறைந்தால் மறுபடி 25 வாங்குங்கள். இது போல நான்கு முறை வாங்கும் சந்தர்ப்பம் கிடைக்கிறது. விலை கூடியிருந்தால் லாபம் தானே.
-சேதுராமன் சாத்தப்பன்-

நன்றி : தினமலர்

தகிக்கிறது தங்கம்: சவரன் விலை 10 ஆயிரம் ரூபாயை தாண்டியது * மேலும் உயரும் வாய்ப்பு

சென்னை: தங்கத்தின் விலை வரலாறு காணாத வகையில் 10 ஆயிரம் ரூபாயை தாண்டி விட்டது. சர்வதேச சந்தையில் தங்கத்தின் விலை உயர்வதால், உள்ளூர் சந்தையிலும் மேலும் விலை உயரும் நிலை உள்ளதாக நகை வியாபாரிகள் தெரிவித்தனர். கடந்த வருடம் டிசம்பர் மாதம் முதலே தங்கத்தின் விலை உயரத் துவங்கியது. புத்தாண்டு தினத்தன்று தங்கத்தின் விலை ஒரு சவரன் ரூ.ஏழாயிரத்து 960க்கு விற்கப்பட்டது. அடுத்த நாள் ஒரு சவரன் தங்கத்தின் விலை ரூ.ஏழாயிரத்து 904 ஆக குறைந்தது. அதன் பிறகு தங்கத்தின் விலை படு வேகமாக உயர்ந்து கடந்த மார்ச் மாதம் 17ம் தேதி ரூ.10 ஆயிரத்து 40 ஐ எட்டியது. இதுவே அதிக பட்ச விலையாக கருதப்பட்டது. தற்போது, கடந்த 7ம் தேதி ஒரு கிராம் தங்கத்தின் விலை ரூ.ஆயிரத்து 189 என இருந்தது அடுத்தடுத்த நாட்களில் ரூ.ஆயிரத்து 201, ரூ.ஆயிரத்து 192 என படிப்படியாக அதிகரித்தது. அதன் பிறகும் 10 மற்றும் 11ம் தேதிகளில் ரூ.ஆயிரத்து 204, ரூ.ஆயிரத்து 218 என உயர்ந்தது. 12ம் தேதி ரூ.ஆயிரத்து 232 என உயர்ந்து சவரனுக்கு ரூ.ஒன்பதாயிரத்து 856 என இருந்தது. கடந்த 15ம் தேதி தங்கத்தின் விலை கிராமுக்கு ரூ.ஆயிரத்து 267 என உயர்ந்து, சவரனுக்கு ரூ.10 ஆயிரத்தை தாண்டியது. நேற்றைய தங்கம் ஒரு கிராமுக்கு ரூ. ஆயிரத்து 259 என, சவரனுக்கு ரூ.10 ஆயிரத்து 72 ஆக உள்ளது. கச்சா எண்ணெய்க்கு ஈடாக தங்கத்தை முதலீடு வைப்பதால், கச்சா எண்ணெய் விலையில் ஏற்ற இறக்கம் ஏற்படும்போதெல்லாம் தங்கத்தின் விலை பாதிக்கிறது. கடந்த வருடத்தில் இருந்து தங்கத்தின் விலை உயரத் துவங்கியது. சர்வதேச சந்தையில் உள்ள மதிப்பீட்டை வைத்தே தங்கம் விலை நிர்ணயிக்கப்படுவதும் விலை ஏற்றத்திற்கு காரணம். இந்த விலையேற்றம் குறித்து தமிழ்நாடு நகை வியாபாரிகள் கூட்டமைப்பின் தலைமை ஆலோசகர் எல்.கே.எஸ்.அகமது கூறுகையில், 'வெளிநாட்டில் பங்குச் சந்தையில் ஸ்திரத்தன்மையற்ற நிலை காரணமாக தங்கம் விலையில் ஏற்ற இறக்கம் காணப்படுகிறது. தவிர, கச்சா எண்ணெய் விலை உயர்வும் காரணம். அமெரிக்க டாலர் வீழ்ச்சி காரணமாக, அமெரிக்க மக்கள், தங்கத்தில் முதலீடு செய்கின்றனர். கடந்த ஒரு வார விலையுடன் ஒப்பிடும் போது தங்கம் விலை சவரனுக்கு சராசரியாக ரூ.480 வரை அதிகரித்துள்ளது. அதாவது 7 சதவீதம் வரை விலை உயர்வடைந்துள்ளது. சர்வதேச சந்தையில் ஒரு அவுன்ஸ் தங்கத்தின் விலை 983 டாலர் என உள்ளது. இது ஆயிரம் டாலரை எட்டும் என நிபுணர்கள் கருதுகின்றனர். எனவே, தங்கத்தின் விலை மேலும் உயர்வதற்கு வாய்ப்பு உள்ளது' என்றார்.

நன்றி : தினமலர்

சொல்லவும், மெல்லவும் முடியாத பரிதாப நிலை

பங்குச் சந்தை தினம் தினம் ஏதாவது ஒரு காரணத்திற்காக விழுந்து கொண்டிருக்கிறது. பிரேக் பிடிக்காத கார், சாலையின் இறக்கத்தில் எப்படி இறங்குமோ அப்படி இறங்கிக் கொண்டிருக்கிறது. திங்களன்று ரான்பாக்சி கம்பெனியின் பங்குகள் 10 சதவீதத்திற்கும் மேலாகக் குறைந்ததால், சந்தையில் அது பெரிய பாதிப்பை ஏற்படுத்தியது. ரான்பாக்சி கம்பெனியில் ஏற்பட்டுள்ள புதிய குழப்பங்கள், அதாவது, அமெரிக்க அரசு, அந்த கம்பெனி மீது தொடரப்போகும் வழக்கு (கலப்படமான மருந்துகளை விற்றதாக) வந்த அறிவிப்புகளை தொடர்ந்து, அந்தக் கம்பெனியின் பங்குகள் திங்களன்று படுபாதாளத்துக்கு சென்றது. மற்றும் சமீபகாலமாக பேசப்பட்டு வந்த ஸ்பைஸ் ஜெட் விமான கம்பெனியின் சேர்மன், தனது வேலையை திங்களன்று ராஜினாமா செய்து விட்டதால், அந்தக் கம்பெனியின் பங்குகள் 14 சதவீதம் அளவு குறைந்தது. மொத்தமாக மும்பை பங்குச் சந்தை 139 புள்ளிகளை அன்றைய தினம் இழந்தது.
நேற்று முன்தினம், 654 புள்ளிகள் குறைந்தது ஏன்? : பிட்ச் ரேட்டிங் என்ற கம்பெனி, இந்தியாவின் உள்நாட்டு கிரெடிட் ரேட்டிங்கை குறைத்துள்ளது. அது, சந்தையை நேற்று முன்தினம் பாதித்தது. சமீபத்தில் தான் ஸ்டாண்டர்டு அண்டு பவர் என்னும் வெளிநாட்டு ரேட்டிங் ஏஜென்சி, இந்தியாவின் சமீப நிலைமைகளை வைத்து பார்க்கும் போது கவலை தெரிவிக்கும் முகமாக இருப்பதாக தெரிவித்திருந்தது. இதனால், வெளிநாட்டு கம்பெனிகளின் முதலீடு இந்தியாவில் குறைய வாய்ப்பு உள்ளது. உலகின் பல நாடுகளில் மறுபடி வங்கிகளில் சப்பிரைம் பிரச்னை வரலாம் என்ற பேச்சு பரவலாக அடிபடுகிறது. இந்த வருடத்துவக்கத்தில் இதே பிரச்னைக்காக சந்தை பல தூக் கமில்லாத இரவுகளைக் கழித்தது, பல ஆயிரம் புள்ளிகளை இழந்தது, பலருக்கு ஞாபகம் இருக்கலாம். மறுபடியும் சப்பிரைம் பிரச்னை வரலாம் என்பதால் வங்கிப் பங்குகள் எல்லாம் கீழே இழுக்கப் பட்டன. இவையெல்லாம் சேர்ந்து நேற்று முன்தினம் சந்தையை 654 புள்ளிகள் கீழே இழுத்தது.
கச்சா எண்ணெய் விலை குறைந்திருந்தாலும் சந்தை நேற்று மேலே செல்லவில்லை. காரணம் அரசியல் நிலைமை தான். துவக்கம் 250 புள்ளிகள் வரை மேலேயே இருந்தாலும், தொடர்ந்து பலரும் விற்கமுற்பட்டதால் சந்தை முடிவாக கீழே முடிவடைந்தது. கடந்த இரு தினங்கள் இறக்கத்திற்கு பிறகு ரான்பாக்சி கம்பெனியின் பங்குகள் மேலே சென்றன. காரணம், அந்தக் கம்பெனியை வாங்குவதாக அறிவித்திருந்த ஜப்பானைச் சேர்ந்த டாய்ச்சி கம்பெனி, கடந்த சில நாட்களில் ரான்பாக்சி கம்பெனியில் ஏற்பட்டுள்ள பிரச்னைகளால் தனது முடிவில் எந்த மாற்றமும் இல்லை என தெரிவித்தது தான். நேற்று இறுதியாக மும்பை பங்குச் சந்தை 100 புள்ளிகள் கீழே இறங்கி, 12,575 புள்ளிகளுடனும், தேசிய பங்குச் சந்தை 45 புள்ளிகள் இறங்கி 3,816 புள்ளிகளுடனும் முடிவடைந்தது. சந்தை கடந்த 15 மாதங்களில் மிகக் குறைந்த அளவை எட்டியுள்ளது. இது கவலையளிக்கக் கூடிய விஷயம். புரோக்கரேஜ் கம்பெனிகள்: பங்குச் சந்தை நன்றாக இருந்தால் முதலீட்டாளர்கள் வாங்குவதும், விற்பதும் அதிகமாக இருக்கும். அது சார்ந்த புரோக்கரேஜ் கம்பெனிகளின் லாபங்களும் நன்றாக இருக்கும். ஆனால், சந்தை கீழேயே இருப்பதால், முதலீட்டாளர்கள் சந்தையை விட்டு விலகியே இருப்பதால் புரோக்கரேஜ் கம்பெனிகளின் லாபங் களும் காணாமல் போய்விட்டன. இதனால், சந்தை, அந்த கம்பெனிகளின் பங்குகள் மதிப்பிழந்து காணப் படுகின்றது.
வரும் நாட்கள் எப்படி இருக்கும்?: சந்தையின் சரிவை யாராலும் நிறுத்த முடியாத அளவுக்கு சென்று கொண்டிருக்கிறது. பலருக்கு என்ன செய்வது என்ற கவலை. சொல்லவும் முடியாத, மெல்லவும் முடியாத நிலமை. மியூச்சுவல் பண்டுகளில் ரிடம்ஷன் அதிகம் இல்லாதது ஒரு ஆறுதலான விஷயம். அதாவது, போட்ட பணத்தை அவசர அவசரமாக அதிகம் பேர் எடுக்காதது. இரண்டு காரணங்கள் இருக்கலாம். இப்போது எடுத்தால் நிறைய நஷ்டப்பட வேண்டிய வரும் அல்லது மியூச்சுவல் பண்டு என்பது நீண்ட நாள் முதலீடு என்ற எண்ணங் கள் இருக்கலாம். எது எப்படி இருந்தாலும் முதலீட்டாளர்களுக்கு பங்குச் சந்தை என்பது நீண்ட நாள் முதலீடு என்ற எண்ணம் வந்தாலே போதும். அதுவே ஒரு பெரிய ஆறுதலான விஷயம். வரும் நாட்களும் கசப்பானவையாகத்தான் இருக்கும். குறிப்பாக, 22ம் தேதி டில்லியில் என்ன நடக்கப்போகிறது என்பதைப் பொறுத்தே சந்தையின் போக்கு அமையும்.
-சேதுராமன் சாத்தப்பன்-

நன்றி : தினமலர்

கச்சா எண்ணெய் விலை திடீர் குறைவு ஏன்?

சிங்கப்பூர்: கச்சா எண்ணெய் விலை நேற்று திடீரெனக் குறைந்தது. நேற்று முன்தினம் இருந்த விலையை ஒப்பிடும் போது, சந்தையில் பேரல் ஒன்றுக்கு 10 டாலர் வரை விலை குறைந்தது. கடைசியில், நியூயார்க் சந்தையில் பேரல் ஒன்றுக்கு 138.74 டாலராக விலை போனது.
இனி, எப்போது பேரல் விலை 160 டாலராகும் என்று உலக நாடுகள் அச்சப்பட்டுக் கொண்டிருக்கும் போது, இந்த திடீர் சரிவு அனைவரையும் அதிரவைத்தது. ஆசிய அளவில் எரிசக்தி தகவல் தொடர்பு நிபுணர் இது குறித்து கருத்து கூறும் போது, 'நான் அதிர்ந்து போனேன்' என்றிருக்கிறார். இதற்குக் காரணம் அமெரிக்க பெடரல் வங்கித் தலைவர் பென் பெர்னாகே நேற்று கூறுகையில், 'அமெரிக்க பொருளாதாரம் ஸ்திரமற்ற தன்மையில் இருக்கிறது' என்று கூறியதின் விளைவேயாகும். அதிகளவில் கச்சா எண்ணெய் பயன்படுத்தும் அமெரிக்காவில், பொருளாதாரம் சரியாக இல்லை என்றால் தேவை குறைந்து விடும் என்ற அச்சமே சரிவை ஏற்படுத் தியது என்று தெரிவித்தார். அதே சமயம் அமெரிக்க அதிபர் புஷ், வாஷிங்டனில் நேற்று அளித்த பேட்டியில், 'அமெரிக்க கடல்பகுதியில் எண்ணெய் துரப்பன பணியை மேற்கொள்ளலாம். ஆனால், கச்சா எண்ணெய் உடனே கிடைக்காது. எரிபொருள் விலையைக் குறைக்க உடனடி நிவாரணம் கிடையாது. அதே போல், நாம் வைத்திருக்கும் அவசரத் தேவை கச்சா எண்ணெய் இருப்பை பயன்படுத்தலாம் என்பதும் சரியல்ல' என்றார். மேலும், கச்சா எண்ணெய் உற்பத்தி நாடுகள் அமைப்பினர், இந்த விலை வீழ்ச்சி தற்காலிகமானதே, அடுத்த சில வாரங்களில் பேரல் 160 டாலரை தொட்டு விடும்' என்று தெரிவித்தனர்.
நன்றி : தினமலர்

தீப்பெட்டி விலை உயர்வதற்கு காரணம் என்ன?

மூலப்பொருள் விலை உயர்வு, சென்வாட் வரி, தொழிலாளர் பற்றாக்குறை காரணமாக, தீப்பெட்டி தயாரிப்பு தொழில் நசிவடைந்து வருகிறது.
தென் தமிழகத்தில் உள்ள சிவகாசி, சாத்தூர், கோவில் பட்டி நகரங்களில், தீப்பெட்டி தயாரிப்பு தொழிற்சாலைகள் அதிகம் உள்ளன. ஒரு காலத்தில், மூன்றாயிரம் கோடி மதிப்பிலான, இந்திய தீப்பெட்டி தயாரிப்பு தொழிலில், 75 சதவீதம் இந்த மூன்று நகரங்களிலேயே நடந்தது. ஆனால், தற்போது, 50 சதவீதமாகக் குறைந்து விட்டதாக, உற்பத்தியாளர்கள் வேதனை தெரிவிக்கின்றனர். மத்திய மதிப்பு கூட்டு வரியான சென்வாட், மூலப்பொருள் விலை உயர்வு மற்றும் தொழிலாளர் பற்றாக்குறை போன்றவை தான் தொழில் நசிவுக்கான காரணங்கள் என்று கூறப்படுகிறது.
தீப்பெட்டி உற்பத்திக்குத் தேவைப்படும் சிவப்பு பாஸ்பேட், ஒரு கிலோ ரூ. 300லிருந்து ரூ. 650 ஆக உயர்ந்துள்ளது. அதே போல, ஒரு டன் பொட்டாசியம் குளோரைடு, ஐந்தாயிரத்தில் இருந்து ஆறாயிரமாக உயர்ந்துவிட்டது. கச்சா எண்ணெய் விலை உயர்வு காரணமாக, மெழுகு விலை, வரலாறு காணாத அளவில் 140 சதவீதம் வரை அதிகரித்துவிட்டது என்று உற்பத்தியாளர்கள் புலம்புகின்றனர். இயந்திரங்களைப் பயன்படுத்தும் நிறுவனங்களுக்கு மட்டும் தான் சென்வாட் வரி விதிக்கப்படுகிறது. குடிசை தொழிலாக தீப்பெட்டி உற்பத்தி செய்பவர்களுக்குச் சென்வாட்டில் இருந்து விலக்கு அளிக்கப்பட்டுள்ளது. இந்நிலையில், குடிசைத் தொழில் என்று பலர் வரி ஏய்ப்பு செய்வதால், அவர்களுடன் போட்டிப் போட முடியாத நிலை ஏற்பட்டுள்ளது என்று அமைப்பு ரீதியிலான தொழிற்சாலை அதிபர்கள் கூறுகின்றனர். சில ஆண்டுகளுக்கு முன், சிவகாசி நகரில் மட்டும் தீப்பெட்டி தொழிலை சார்ந்து ஒரு லட்சம் தொழிலாளர்கள் இருந்தனர். ஆனால், தற்போது 20 ஆயிரம் பேர் மட்டுமே ஈடுபட்டிருப்பதாக உற்பத்தி நிறுவனங்கள் தெரிவிக்கின்றன. எல்லா பொருட்களின் விலையும் கடுமையாக அதிகரித்துவிட்ட நிலையில், தீப்பெட்டி விலை மட்டும் 14 ஆண்டுகளாக 50 பைசாவாகவே இருந்தது. இந்நிலையில், மூலப்பொருள் விலை உயர்வால், தீப்பெட்டி விலையை உயர்த்த, உற்பத்தியாளர்கள் சங்கம் முடிவுசெய்துள்ளது. இதன்படி, செப்டம்பர் 1ம் தேதி முதல், 50 முதல் 70 குச்சிகள் கொண்ட தீப்பெட்டியின் விலை ஒரு ரூபாயாக இருக்கும்.

நன்றி : தினமலர்

எங்களின் பங்கு மதிப்பு குறைந்ததற்கு பிரபல நிறுவனமே காரணம் : ரேன்பாக்ஸி குற்றச்சாட்டு

மும்பை : கடந்த ஜூன் 11ம் தேதி இந்திய பார்மாசூடிக்கல் கம்பெனி ரேன்பாக்ஸியின் 34.8 சதவீத பங்குகளை ஜப்பான் நிறுவனமான டெய்ச்சி சான்க்கியோ, 4.6 பில்லியன் டாலருக்கு வாங்கிக்கொள்வதாக அறிவித்திருந்தது. அவ்வாறு அது வாங்கிக்கொண்டால் ரேன்பாக்ஸி நிறுவனம் டெய்ச்சியின் இந்திய கிளை நிறுவனமாகி விடும். ஆனால் அப்போது ஒத்துக்கொண்ட டெய்ச்சி இப்போது அதிலிருந்து பின் வாங்குவதாக தெரிகிறது.காரணம் என்னவென்றால் ரேன்பாக்ஸி நிறுவனம் அமெரிக்க அரசிடம் தவரான தகவல்களை கொடுத்துள்ளதாக அதன் மீது அமெரிக்கா வழக்கு தொடர்ந்துள்ளது. இதனால் இந்திய பங்கு சந்தையில் ரேன்பாக்ஸியின் பங்குகள் 10.45 சதவீதம் குறைந்து விட்டது. டெய்ச்சி எங்கள் நிறுவன பங்குகளை வாங்கிக்கொள்வதில் இருந்து பின்வாங்கவில்லை என்று ரேன்பாக்ஸி சொல்லி வருகிறது. இந்நிலையில் எங்கள் பங்குகள் குறைந்ததற்கு இந்தியாவின் பிரபல நிறுவனம் ஒன்றுதான் காரணம் என்று ரேன்பாக்ஸி குற்றம் சாட்டியிருக்கிறது. ரேன்பாக்ஸியின் சேர்மன் மற்றும் மேலாண் இயக்குனர் மால்வீந்தர் மோகன் சிங் நிகழ்ச்சி ஒன்றில் இதனை தெரிவித்தார். எங்கள் நிறுவனத்தில் குழப்பத்தையும் தேவையில்லாத வதந்தியையும் ஏற்படுத்தி எங்கள் பங்குகளின் மதிப்பை குறைக்க அந்த நிறுவனம் ஏற்பாடு செய்கிறது என்றார் அவர். ஆனால் அந்த நிறுவனத்தின் பெயரை அவர் சொல்ல மறுத்துவிட்டார். நேற்று செவ்வாய்க்கிழமை அன்று 14.01 சதவீதம் குறைந்து ரூ.409.25 விலையில் இருந்த ரேன்பாக்ஸியின் பங்குகள், இன்று 10.56 சதவீதம் உயர்ந்து ரூ.452.45 விலையில் இருந்தது.

நன்றி :தினமலர்

இன்றும் சரிவில் முடிந்த பங்கு சந்தை

மும்பை :வங்கிகளுக்கான ரெபோ ரேட்டை ரிசர்வ் வங்கி 0.5 சதவீதம் வரை உயர்த்தும் என்ற எதிர்பார்ப்பாலும் பணவீக்கம் 13 சதவீதம் வரை உயர்ந்து விடும் என்ற அச்சத்தாலும் இன்றைய பங்கு சந்தையில் சென்செக்ஸ் சரிந்தன. மாலை வர்த்தக முடிவில் மும்பை பங்கு சந்தையில் சென்செக்ஸ் 100.39 புள்ளிகள் ( 0.79 சதவீதம் ) குறைந்து 12,575.80 புள்ளிகளில் முடிந்தது. தேசிய பங்கு சந்தையில் நிப்டி 44.40 புள்ளிகள் ( 1.15 சதவீதம் ) குறைந்து 3,816.70 புள்ளிகளில் முடிந்துள்ளது. இன்றைய வர்த்தகத்தில் ரிலையன்ஸ் இன்டஸ்டிரீஸ், ஹெச்.டி.எஃப்.சி, எஸ்.பி.ஐ., டாடா ஸ்டீல், ஐ.சி.ஐ.சி.ஐ.வங்கி, டி.எல்.எஃப், யுனிடெக் ஆகிய பங்குகள் விலை குறைந்திருந்தது

நன்றி : தினமலர்

தங்கம் விலை என்றுமில்லாத அளவாக உயர்ந்துள்ளது

லண்டன் : சர்வதேச சந்தையில் தங்கம் விலை என்றுமில்லாத அளவாக உயர்ந்துள்ளது. செவ்வாய் அன்று லண்டன் சந்தையில் அது அவுன்ஸ் ஒன்றுக்கு 983.50 டாலர் வரை வந்து விட்டது. அதாவது கிராம் ஒன்றுக்கு சுமார் ரூ.1,352.21 ஆக இருந்தது. கடந்த நான்கு மாதங்களில் இப்போதுதான் அவுன்ஸ் ஒன்றுக்கு 980 டாலருக்கும் மேல் விலை வந்துள்ளது. அமெரிக்காவில் நிதித்துறையில் ஏற்பட்டுள்ள பெரும் குழப்பம், டாலரின் மதிப்பு வீழ்ச்சி, பங்கு சந்தைகளில் ஏற்பட்டுள்ள சரிவு, கச்சா எண்ணெய் விலை உயர்வு போன்ற காரணங்களால் இப்போது முதலீட்டாளர்கள் தங்கத்தில்தான் அதிகம் முதலீடு செய்கிறார்கள். இதனால் தான் தங்கம் விலை உயர்வதாக சொல்லப்படுகிறது. சர்வதேச அளவில் நிதி நிலை சரியாக இல்லதாதால் கடந்த ஒரு வாரத்தில் மட்டும் தங்கம் விலை 7 சதவீதம் உயர்ந்திருக்கிறது. நேற்று அவுன்ஸ் ஒன்றுக்கு 980 டாலர் வரை வந்திருந்த தங்கத்தின் விலை, இந்த மாதத்திற்குள் 1000 டாலரை எட்டி விடும் என்று யு பி எஸ் என்ற நிதி நிறுவனம் தெரிவித்திருக்கிறது.

நன்றி : தினமலர்

இன்றைய பங்கு சந்தையில் கடந்த 15 மாதங்களில் இல்லாத வீழ்ச்சி

மும்பை : மும்பை பங்கு சந்தையில் கடந்த 15 மாதங்களில் இல்லாத அளவாக இன்று கடும் வீழ்ச்சி ஏற்பட்டது. கரடிகளின் ஆதிக்கம் இன்று கடுமையாக இருந்தது. இதனால் மும்பை பங்கு சந்தையில் சென்செக்ஸூம் தேசிய பங்கு சந்தையில் நிப்டியும் கடும் வீழ்ச்சியை அடைந்தது. இன்றைய வீழ்ச்சியில் பெரும் பங்கேற்றது வங்கித்துறைதான். கேப்பிடல் பொருட்கள், மெட்டல், பவர், ரியால்டி, பார்மா மற்றும் ஆயில் அண்ட் கேஸ் துறை பங்குகள் கடும் வீழ்ச்சியை கண்டன. சென்செக்ஸூம் நிப்டியும் இந்த வருடத்தில் இன்றுதான் பெருமளவு வீழ்ச்சியடைந்திருந்தன. இந்தியா உள்பட ஆசிய நாடுகள் அனைத்திலும் மற்றும் ஐரோப்பிய பங்கு சந்தையிலும் கடும் வீழ்ச்சியே இருந்தது. மும்பை பங்கு சந்தையில் காலை வர்த்தகம் ஆரம்பித்ததில் இருந்தே குறைய துவங்கிய சென்செக்ஸ் மாலை வரை அப்படியே நீடித்தது. மாலை வர்த்தக முடிவில் சென்செக்ஸ் 654.32 புள்ளிகள் ( 4.91 சதவீதம் ) குறைந்து 12,676.19 புள்ளிகளில் முடிந்தது. தேசிய பங்கு சந்தையில் நிப்டி 178.60 புள்ளிகள் ( 4.42 சதவீதம் ) குறைந்து 3,861.10 புள்ளிகளில் முடிந்தது. உலக அளவில் இன்று பங்கு சந்தையில் வீழ்ச்சி அடைந்ததற்கு காரணம் அமெரிக்க நிதி துறையில் ஏற்பட்ட கடும் நெருக்கடிதான் என்று சொல்லப்படுகிறது. அமெரிக்க வங்கித்துறை இப்போது கடும் வீழ்ச்சியில் இருப்பதாக சொல்லப்படுகிறது. பிரிட்டனிலும் கடந்த மாதத்தில் வீடுகளின் விலை கடுமையாக குறைந்திருந்ததாக சொல்லப்படுகிறது. இந்தியாவில் பங்கு சந்தையில் ஏற்பட்டுள்ள கடும் வீழ்ச்சியால் ரிசர்வ் வங்கி, வங்கிகளுக்கான ரெபோ ரேட்டை இன்னும் 0.5 சதவீதம் உயர்த்தும் என்று தெரிகிறது.

நன்றி : தினமலர்

கடந்த இரண்டு ஆண்டுகளில் இல்லாத அளவாக ஆசிய பங்கு சந்தையில் கடும் வீழ்ச்சி

ஹாங்காங் : ஆசியா முழுவதும் இன்று செவ்வாய்கிழமை பங்கு சந்தைகளில் கடும் வீழ்ச்சி ஏற்பட்டது. கடந்த இரண்டு ஆண்டுகளில் இது போன்ற வீழ்ச்சி ஏற்பட்டதில்லை என்று சொல்லப்படுகிறது. ஆசிய பிராந்தியத்தில் பைனான்ஸ் துறையில் முதலீட்டாளர்களுக்கு நம்பிக்கை இல்லாமல் போனதும், பணவீக்கம் அதிகரித்துள்ளதாலும் இந்த வீழ்ச்சி ஏற்பட்டது என்று சொல்லப்படுகிறது. யுரோவுக்கு நிகரான அமெரிக்க டாலரின் மதிப்பு குறைந்துள்ளதும் பங்கு சந்தை வீழ்ச்சிக்கு காரணம் என்று சொல்கிறார்கள். ஜப்பானின் மிகப்பெரிய மூன்று வங்கிகள் அமெரிக்க நிதி நிறுவனங்களான ஃபேன்னி மே மற்றும் ஃபிரடி மேக் ஆகியவைகளில் 44.3 பில்லியன் டாலர்கள் டெப்ட் செக்யூரிடியில் முதலீடு செய்திருப்பதாகவும், இப்போது அந்த நிதி நிறுவனங்கள் கடும் நிதி சிக்கலில் இருப்பதாகவும் சொல்லப்படுகிறது. நலிவடைந்திருக்கும் இந்த இரு அமெரிக்க நிதி நிறுவனங்களுக்கு அமெரிக்க அரசு உதவி செய்யப்போவதாக அறிவித்திருக்கிறது. இதனால் அங்கு பங்கு சந்தையில் பெரும் சரிவு ஏற்பட்டது. இதன் தொடர்ச்சியாக ஜப்பான் பங்கு சந்தையிலும் கடும் பாதிப்பு ஏற்பட்டது. டோக்கியோவில் நிக்கி 255.60 புள்ளிகள் குறைந்து 12,754.56 புள்ளிகளுக்கு வந்து விட்டது.இது தவிர ஹாங்காங் பங்கு சந்தையில் 839.69 புள்ளிகள் குறைந்து 21,174.77புள்ளிகளாகவும், சீனாவில் 98.81 புள்ளிகள் குறைந்து 2,779.45 புள்ளிகளாகவும், தைவானில் 322.72 புள்ளிகள் குறைந்து 6,834.24 புள்ளிகளாகவும், கொரியாவில் 49.29 புள்ளிகள் குறைந்து 1,509.33 புள்ளிகளாகவும் இருந்தது.

நன்றி : தினமலர்

பங்குச் சந்தையில் சாண் ஏறினால் முழம் வழுக்குகிறது

பங்குச் சந்தை 21,000 அளவில் இருந்து 16,000 வரை வந்தவுடன் பலரும் நினைத்தனர், சந்தை இதை விடக் குறையாது, வாங்குவதற்கு இது நல்ல சந்தர்ப்பம் என்று வாங்கவும் செய்தனர். ஆனால், சந்தை அதை விடவும் குறைந்தது; 13,000 அளவும் எட்டியது. ஆனால், அவர்களில் பலருக்கு அப்போது வாங்க துணிவில்லை. 16,000க்கு வந்த போது வாங்க இருந்த துணிவு 13,000 வந்த போது இல்லை. ஏனெனில், இனம் புரியாத ஒரு பயம் தான். சந்தை ஏன் குறைந்து கொண்டே வருகிறது. பெரிய காரணங்களாகப் பார்த்தால் அரசியல் நிலைமை, தொடர்ந்து ஏறும் கச்சா எண்ணெய் விலை, தொடர்ந்து கூடி வரும் பணவீக்கம், உலகளவில் ஏற்பட்டுள்ள பொருளாதார மந்தம் ஆகியவை தான். காரணங்கள் எதுவாக இருந்தாலும், முதலீட்டாளர்கள் மீதும் குறை என்றும் சொல்லலாம். பழைய காலத்தில் எல்லாம் பங்குச் சந்தையில் எல்லாரும் நீண்ட கால முதலீடாக எண்ணி முதலீடு செய்து வந்தனர். நாமும் அந்தக் கம்பெனியில் ஒரு பங்குதாரர் என்ற எண்ணம் மேலோங்கி இருந்து வந்தது. ஆதலால், வாங்கிய கம்பெனி பங்குகளை அதிக நாட்கள் விற்காமல் வைத்திருந்தனர். நல்ல கம்பெனி பங்குகளாக இருக்கும் பட்சத்தில், அது அவர்களுக்கு மிகுந்த பலனைத் தந்தது. ஆனால், தற்சமயம் பலரும் பங்குச் சந்தையை குறுகிய கால லாப நோக்கில் பார்க்கும் எண்ணம் வந்தவுடன் தான், சந்தையின் ஏற்ற-இறக்கங்களைப் பார்த்துப் பார்த்து மனதும் ஏற-இறங்க ஆரம்பித்தது.
புதன் கிழமையன்று 600 புள்ளிகளுக்கு மேல் ஷார்ட் கவரிங், முன்னேறிய அரசியல் நிலைமை, உலகளவிலான பங்குச் சந்தைகளின் ஏற்றம் ஆகியவைகளின் காரணமாக ஏறியதும், வியாழனன்று அதற்காகவே காத்திருந்தது போலவே பலரும் விற்க ஆரம்பித்தனர். அது, சந்தையை பாடாய்படுத்தியது. அதாவது, சந்தையில் எந்தவொரு ஏற்றத்திலும் விற்பதற்கு இது தான் சந்தர்ப்பம் என்று பலரும் காத்துக் கொண்டிருக்கின்றனர். அதனால், சந்தை சாண் ஏறி, முழம் வழுக்குகிறது. தொடக்கத்தில் 112 புள்ளிகள் வரை கீழே இறங்கியிருந்த பங்குச் சந்தை, முடிவாக 38 புள்ளிகள் இறக்கத்துடன் முடி வடைந்தது. வெள்ளியன்று சந்தையை வழுக்கியதற்கு கச்சா எண்ணெயும் ஒரு காரணம். கச்சா எண்ணெய் பேரலுக்கு 142 டாலர் வரை மறுபடி சென்று விட்டது. இன்போசிஸ் கம்பெனியின் முடிவுகள் வெள்ளியன்று வெளிவந்தது. இந்த காலாண்டு முடிவுகள் சென்ற ஆண்டு இதே காலாண்டின் லாபத்தை விட 4.2 சதவீதம் அதிகமாக இருந்தது. மேலும், அடுத்த ஆண்டு முடிவு மாதமான மார்ச், லாபத் திற்கான கைடன்ஸ் 26.6 சதவீதமாக உயர்த் தப்பட்டது (இது முன்பு 24.4 சதவீதமாக இருந்தது). இருந்தும், சந்தையில் கம்பெனியின் பங்குகள் கீழே சென்றன. மேலும் பணவீக்கம் இந்த வாரம் 11.89 சதவீதமாக கூடியிருந்தது. இவை எல்லாமாக சேர்ந்து சந்தையை வீறு கொண்டு கீழே இழுத்தன. வெள்ளியன்று இறுதியாக மும்பை பங்குச் சந்தை 469 புள்ளிகள் குறைந்து 13,469 புள்ளிகளுடனும், தேசிய பங்குச் சந்தை 113 புள்ளிகள் குறைந்து 4,049 புள்ளிகளுடனும் முடிவடைந்தது. வங்கிகளிடம் உபரி பணம்: கையில் 20,000 கோடி ரூபாய்களுக்கு மேல் உபரி பணமாக வைத்திருக்கும் ஐ.சி.ஐ.சி..ஐ., வங்கி, வெளிநாடுகளில் வேறு பிசினசில் முதலீடு செய்யலாமா என்று யோசித்து வருகிறது. வங்கி கடன்களுக்கு வட்டி விகிதங்கள் கூடுதலாகிப் போனதால், கடன்கள் வாங்குபவர்கள், வாங்குவதற்கு முன் இவ்வளவு வட்டி கொடுத்து வாங்க வேண்டுமா என்று யோசிக்கினன்றனர். அதனால் தான், பல வங்கிகளிடம் உபரி பணம் இருக்கும் நிலைமை.
தற்போதைய சூழ்நிலையில் தங்கம் தங்கமான முதலீடா?: உலகளவில் பங்குச் சந்தைகள் கீழே சென்று கொண்டிருக்கும் போது, முதலீட்டாளர்கள் மற்ற வகை முதலீடுகளைத் தேடி ஓடுவது இயல்பு தான். அந்த வகையில் தங்கத்தை தேடி பலரும் செல்வர். ஏனெனில், நிலையான முதலீடு என்பதால். சமீப காலமாக தங்கத்திற்கு இரண்டு பக்கமும் அடி. அதாவது, தங்கத்தின் உலகளவிலான விலையும் (டாலர் கணக்கில்) கூடி வருகிறது. இந்தியாவில் டாலர் மதிப்பும், ரூபாய்க்கு எதிராக கூடி வருகிறது. ஆதலால், தங்கம் ஒரு அவுன்ஸ் 1,000 டாலரைத் தொடாமலேயே, உள்நாட்டு ரூபாய் மதிப்பில் 13,000ஐ தொட்டு விட்டது. ஆதலால், சந்தையில் தங்கத்திற்கும் முதலீட்டாளர்கள் அதிகம் தாவவில்லை. பின்னர் பணம் எங்கு செல்கின்றன. வங்கி வட்டி விகிதங்கள் கூடி வருவதால், அங்கு பெரிய அளவில் செல்கின்றன.
அடுத்த வாரம் எப்படி இருக்கும்?: நிலைமைகள் இன்னும் சரியாகவில்லை. படிப்படியாகத்தான் சரியாகும். இன்னும் நீண்ட நாட்கள் எடுக்கும். மற்ற காரணங்களுடன் வரப்போகும் காலாண்டு முடிவுகளும் சந்தையின் போக்கை மாற்றியமைக்கும். பொறுத்திருங்கள். ஆதலால், பொறுமை காப்பவர்களுக்கு பங்குச் சந்தை ஒரு லாபமான வருமானத்தைத் தரும்.
-சேதுராமன் சாத்தப்பன்

நன்றி : தினமலர்

இந்திய தொழில் உற்பத்தி வளர்ச்சி 3.8 சதவீதமாக குறைந்தது

புதுடில்லி : இந்தியாவின் தொழில் வளர்ச்சியை குறிக்கும் இன்டக்ஸ் ஆஃப் இன்டஸ்டிரியல் புராடக்ட்ஸ் ( ஐ ஐ பி ), மே 2008ல் 3.8 சதவீதமாக குறைந்து விட்டது. இது 2007 மே மாதத்தில் 10.6 சதவீதமாக இருந்தது. ஏற்கனவே ஏப்ரல் மாதத்தல்தான் இது 7 சதவீதத்தில் இருந்து 6.2 சதவீதமாக குறைந்திருந்தது. மேனுஃபேக்சரிங் புரடக்ஸன் குரோத்தும் மே மாதத்தில் 3.9 சதவீதமாக குறைந்திருக்கிறது. இது 2007 மே மாதத்தில் 11.3 சதவீதமாக இருந்தது. 2007 மே மாதத்தில் 9 சதவீதமாக இருந்த மின் உற்பத்தி வளர்ச்சி 2008 மே மாதத்தில் 2 சதவீதமாக குறைந்து விட்டது. சுரங்க உற்பத்தி வளர்ச்சி மட்டும் கடந்த வருடத்தை விட இந்த வருடம் உயர்ந்திருக்கிறது. மே 2007 ல் 3.8 சதவீதமாக இருந்த சுரங்க உற்பத்தி இந்த வருடம் மே மாதத்தில் 5.2 சதவீதமாக உயர்ந்திருக்கிறது.

நன்றி : தினமலர்

பணவீக்கம் 11.89 சதவீதமாக உயர்ந்தது

புதுடில்லி : ஜூன் 28ம் தேதியுடன் முடிந்த வாரத்தில் இந்தியாவின் பணவீக்கம் 11.89 சதவீதமாக உயர்ந்துள்ளது. இது இதற்கு முந்தைய வாரத்தில் 11.63 சதவீதமாக இருந்தது. ஒரு வாரத்தில் 0.26 சதவீதம் உயர்ந்திருக்கிறது. உணவுப்பொருட்கள், பழங்கள், காய்கறிகள், பருப்பு வகைகள், சிமென்ட், சமையல் எண்ணெய் போன்ற பொருட்களில் விலை உயர்ந்துள்ளதால் பணவீக்கம் உயர்ந்துள்ளதாக தெரிவிக்கப்பட்டிருக்கிறது. கடந்த வருடத்தில் இதே காலத்தில் பணவீக்கம் 4.42 சதவீதமாகத்தான் இருந்திருக்கிறது.விலை உயர்வை கட்டுப்படுத்த மத்திய அரசு எவ்வளவோ முயன்றும் இந்த வாரத்தில் சிமென்ட் மற்றும் சமையல் எண்ணெய் விலை உயர்ந்திருக்கிறது. இந்த வாரமும் பணவீக்கம் உயர்ந்திருப்பதால் வங்கிகளுக்கான ரெபோ ரேட்டை ரிசர்வ் வங்கி மேலும் உயர்த்தும் என்று தெரிகிறது. சமீபத்தில் தான் அது ரெபோ ரேட்டை 0.5 சதவீதம் உயர்த்தி இருந்தது.
நன்றி : தினமலர்

2030ல் உலக அளவில் பெட்ரோலிய தேவை 50 சதவீதம் அதிகரிக்கும்

வியன்னா : இப்போதில் இருந்து 2030ம் வருடத்திற்குள் உலக அளவில் பெட்ரோலிய தேவை 50 சதவீதம் அதிகரிக்கும் என்று ஓபக் ( பெட்ரோல் ஏற்றுமதி நாடுகள் அமைப்பு ) தெரிவித்திருக்கிறது. முன்னேறி வரும் நாடுகளில் கார்களின் பயன்பாடு பெருமளவு அதிகரித்திருப்பதால் பெட்ரோலுக்கான தேவை 50 சதவீதம் அதிகரிக்கும் என்று அது கருத்து தெரிவித்திருக்கிறது. ஓபக் அமைப்பின் 2008 வருடத்திற்கான அறிக்கையில், 2030ல் இப்போதாய தேவையை விட 50 சதவீதம் அதிகமாக பெட்ரோலிய தேவை இருக்கும் என்பதால் அதனை சமாளிக்க நம்மிடம் இருக்கும் எண்ணெய் கிணறுகளில் இருந்து புது தொழில் நுட்பத்தை பயன்படுத்தி அதிக அளவில் கச்சா எண்ணெய் எடுக்க வேண்டும் என்று சொல்லியிருக்கிறது. டாலரின் மதிப்பு குறைந்திருப்பதாலும் பெட்ரோல் சப்ளை குறித்து வர்த்தகர்களால் பரப்பப்படும் தவறான தகவல்கள் போன்றவற்றால்தான் இப்போது கச்சா எண்ணெய் விலை உயர்ந்திருப்பதாக ஓபக் தெரிவித்திருக்கிறது. எனினும் கச்சா எண்ணெய் விலை கடுமையாக உயர்ந்திருப்பது குறித்து அது கவலை தெரிவித்திருக்கிறது. கடந்த ஆண்டுகளில் கச்சா எண்ணெய்க்கு குறைந்த அளவே விலை இருந்ததால், ஓபக் நாடுகளால் எண்ணெய் உற்பத்தியை அதிகப்படுத்த அதில் அதிக அளவில் முதலீடு செய்ய முடியாமல் போய் விட்டது. எனவே தான் சீனா போன்ற பொருளாதாரத்தில் வேகமாக வளர்ந்து வரும் நாடுகளின் எண்யெண்ய் தேவைக்கு தகுந்தபடி சப்ளை செய்ய முடியாமல் போனது. கடந்த வருடங்களில் தேவைக்கு அதிகமாகவே கச்சா எண்ணெய் எடுக்கப்பட்டிருப்பதாகவும் வரும் காலங்களில் எவ்வளவு எடுக்க வேண்டும் என்று செப்பரில் நடக்கும் கூட்டத்தில் முடிவு செய்யப்படும் என்றும் தெரிவித்திருக்கிறது. இருந்தாலும் 2012 வாக்கில் கச்சா எண்ணெய்யின் தேவையில் நாள் ஒன்றுக்கு 31 மில்லியன் பேரல்கள் குறையும் என்று எதிர்பார்ப்பதாக ஓபக் தெரிவித்திருக்கிறது. ஐரோப்பா மற்றும் அமெரிக்கா, பெட்ரேலை நம்பி இருக்கும் நிலையில் இருந்து மாறும் முயற்சியில் ஈடுபட்டுள்ளதால் அங்கு பெட்ரோலிய பொருட்களுக்கான தேவை குறையும் என்று ஓபக் நினைக்கிறது.
நன்றி : தினமலர்

பங்கு சந்தையில் நல்ல முன்னேற்றம் : 614 புள்ளிகள் உயர்ந்தன

மத்திய அரசுக்கு அளித்து வந்த ஆதரவை கம்யூனிஸ்டுகள் நேற்று விலக்கிக்கொள்வதாக அறிவித்திருந்ததால் மத்திய அரசு கவிழ்ந்து விடுமோ என்ற அச்சம் நேற்று இருந்தது. அதனால் நேற்று பங்கு சந்தையில் சென்செக்ஸ் 176 புள்ளிகள் குறைந்திருந்தது. ஆனால் இன்று, கம்யூனிஸ்டுகள் விலகினாலும் நாங்கள் ஆதரவு தருகிறோம் என்று சமஜ்வாடி கட்சியினர் சொல்லி விட்டதால் ஆட்சி கவிழாது என்ற எண்ணம் மக்களிடையே தோன்றி விட்டது. இதனாலும் சர்வதேச சந்தையில் கச்சா எண்ணெய் விலை பேரலுக்கு 5 டாலருக்கு மேல் குறைந்து விட்டதாலும் இன்று மும்பை பங்கு சந்தையில் காலை வர்த்தகம் துவங்கியதுமே சென்செக்ஸ் உயர துவங்கி விட்டது. வர்த்தகம் துவங்கிய இரு நிமிடங்களி லேயே சென்செக்ஸ் 441.84 புள்ளிகளும்தேசிய பங்கு சந்தையில் நிப்டி 129.85 புள்ளிகளும் உயர்ந்திருந்தன. பின்னர் இன்று முழுவதும் உயர்ந்துகொண்டே இருந்த சென்செக்ஸ், மதியத்திற்கு பின் வேகமாக உயர துவங்கியது. மாலை வர்த்தக முடிவில் மும்பை பங்கு சந்தையில் சென்செக்ஸ் 614.61 புள்ளிகள் ( 4.60 சதவீதம் ) உயர்ந்து 13,964.26 புள்ளிகளில் முடிந்தது. தேசிய பங்கு சந்தையில் நிப்டி 168.55 புள்ளிகள் ( 4.23 சதவீதம் ) உயர்ந்து 4,157.10 புள்ளிகளில் முடிந்தது. இன்று முழுவதும் காளைகளின் ஆதிக்கமே மேலோங்கி இருந்தது. அதாவது பங்குகள் பெருமளவு வாங்கப்பட்டன. இன்று சென்செக்ஸ் 14 ஆயிரத்தை நெருங்கியும் நிப்டி 4150க்கு மேலும் வந்துவிட்டதால் முதலீட்டாளர்கள் மகிழ்ச்சி அடைந்துள்ளனர் நன்றி : தினமலர்