சரிவில் முதலீடு செய்தால் நல்ல லாபம் கிடைக்க வாய்ப்பு

சந்தை 18 ஆயிரம் புள்ளியிலிருந்து மேலே சென்றாலும், சிறிதுசறுக்கி கீழே வந்து விடுகிறது.அதே சமயம், 18 ஆயிரம் புள்ளிக்குகீழே செல்லாமலும் இருக்கிறது.பருவ மழை நன்றாக இருக்கிறது;காலாண்டு முடிவுகளும் நன்றாக இருக்கிறது.வெளிநாட்டு முதலீடுகள் வந்தாலும், சந்தை மேலும் கீழுமாகஇருக்கிறது. காரணம், உலகளவுசந்தைகளும், லாப நோக்கும் தான்.திங்களன்று மும்பை பங்குச்சந்தை, 116 புள்ளிகள் குறைந்து முடிவ டைந்தது. செவ்வாயும் இதுதொடர்ந்தது. ஆனால், சந்தைபெரிய நஷ்டத்தை சந்திக்கவில்லை. 'பொன் கிடைத்தாலும்புதன் கிடைக்காது' என்பது போல, புதன் சந்தைக்கு பெரியலாபத்தை தந்தது.புதனன்று சந்தை ஏன் கூடியது?வெளிநாட்டு முதலீட்டு நிறுவனங்கள் வாங்கியதால், சந்தை மிகவும் முன்னேறியது. திங்கள், செவ்வாய் நஷ்டங் களைக் குறைத்து,லாபம் கண்டது என்றே கூறலாம்.குறிப்பாக, ஐ.டி., பங்குகள், மெட்டல் பங்குகள் மேலேசென்றன.புதனன்று இறுதியாக மும்பை பங்குச் சந்தை 208 புள்ளிகள் கூடி, 18 ஆயிரத்து 257 புள்ளிகளுடனும், தேசிய பங்குச்சந்தை 65 புள்ளிகள் கூடி, 5,479 புள்ளிகளுடனும் முடிந்தது.புதிய வெளியீடுகள்: 'குஜராத் பிப்பாவ் துறைமுக கம்பெனியின் புதிய வெளியீடு, இம்மாதம் 23ம் தேதி முதல், 26ம்தேதி வரை வருகிறது. 42 முதல் 48 ரூபாய் வரை விலை நிர்ணயிக்கப் பட்டுள்ளது. 500 கோடி ரூபாய் வெளியீடு இது.இது போல, பிக் பஜாரின் பியூச்சர் வென்சர்ஸ், 750கோடி ரூபாய்க்கு வெளியீடு கொண்டு வர செபியிடம்விண்ணப்பித்துள்ளது.எஸ்.கே.எஸ்., மைக்ரோபைனான்ஸ், திங்களன்று பட்டியலிடப்பட்டது. சிறிய முதலீட்டாளர்களுக்கு 935 ரூபாய்அளவில்கொடுக்கப்பட்ட, இந்த வெளியீடு கிடைத்த வர்களுக்கு 20 சதவீதம் லாபத்தைக் கொடுத்துள்ளது.இதே போல பஜாஜ் கார்ப்(பஜாஜ் நிறுவனம்), வெள்ளியன்று பட்டியலிடப்பட்டது. இந்தவெளியீடு கிடைத்தவர்களுக்கு 15சதவீதம் லாபத்தைக் கொடுத்துள்ளது.
சிறிய முதலீட்டாளர்களுக்குஇரண்டு லட்சம்: இதுவரை, 'சிறியமுதலீட்டாளர்கள் ஒரு லட்சம்வரை, புதிய வெளியீடுகளில்முதலீடு செய்யலாம்' என்றிருந்தது.இவ்வரம்பை இரண்டு லட்சமாகக் கூட்டலாமா என, செபி யோசிக்கிறது. இது, சிறிய முதலீட்டாளர்களுக்கு ஒரு பெரிய வாய்ப்பாக இருக்கும்.

இன்பிரா பாண்ட்கள்: பட்ஜெட்டில்குறிப்பிடப்பட்ட இன்பிரா பாண்ட்கள் வெளியிடப்பட்டு வருகின்றன.இதில் முதலீடு செய்வதால், தற்போதுள்ள முதலீட்டுவரம்பை விட, 20 ஆயிரம் ரூபாய் கூடுதலாக வருமானவரிச் சலுகை பெறலாம். 30 சதவீதம் வருமான வரி கட்டுபவர்களுக்கு, 14.3 சதவீதம் வரை வருமானம் கிடைக்கும்.வரும் நாட்கள் எப்படி இருக்கும்?சந்தையில் எந்த பாதகமும் இல்லை. மெது மெதுவாகமேலே செல்லும். ஆகவே, சரிவுகளில் முதலீடு செய்துவாருங்கள்; நல்ல லாபங்கள் கிடைக்கும்.

கட்டுரையாளர் -சேதுராமன் சாத்தப்பன்-

நன்றி : தினமலர்

கசக்கும் உண்மைகள்

வரப்போகும் நிதி ஆண்டுக்கான நிதி நிலை அறிக்கையை (பட்ஜெட்) தயாரிக்கும் வேலையில் மத்திய நிதியமைச்சர் பிரணாப் முகர்ஜி தீவிரமாக ஈடுபட்டிருக்கிறார். பொருளாதார அறிஞர்கள், தொழிலதிபர்கள், வர்த்தகத்துறையினர் ஆகியோருடனான ஆலோசனைகள் முடிந்துவிட்டன. ரிசர்வ் வங்கி கவர்னர் உள்ளிட்ட நிதித்துறை நிர்வாகிகளுடன் இப்போது ஆலோசனை நடந்து கொண்டி ருக்கிறது.

பணவீக்க விகிதமும் பட்ஜெட் பற்றாக்குறையும் அதிகரித்துக் கொண்டே வருகின்றன. இந்த இரண்டும்தான் முகர்ஜி இப்போது உடனே கவனித்தாக வேண்டிய முக்கிய பிரச்னைகள்.

பணவீக்க விகிதம் இப்படியே அதிகரித்துக் கொண்டே போனால் அது மத்திய அரசின் திட்ட ஒதுக்கீடுகளை அர்த்தம் இல்லாமல் செய்துவிடும். அரசியல் ரீதியாகவும் ஆளும் கூட்டணிக்குத் தேர்தலில் பெருத்த தோல்வியை வழங்கும். பட்ஜெட் பற்றாக்குறையை இப்படியே வளரவிட்டால் அது நிதி நெருக்கடியில் போய் முடியும். பணவீக்க விகிதம் என்பதை பாமர மக்கள் மொழியில் சொல்வதென்றால் விலைவாசி உயர்வுதான்.

விலைவாசி உயர்வு பற்றி ஏழை, நடுத்தரக் குடும்பங்களுக்கு உள்ள கவலையும் மத்திய அரசுக்கு உள்ள கவலையும் ஒன்றல்ல. விலைவாசி உயர்வால் வாங்கும் சக்தி குறைகிறதே, சத்துள்ள காய்கறிகளையும் நல்ல உணவுப்பொருள்களையும் நிறைய வாங்க முடியவில்லையே, எவ்வளவு சம்பாதித்தாலும் சாப்பாட்டுக்கே போகிறதே என்பதுதான் ஏழை, நடுத்தர மக்களின் கவலை.

மத்திய அரசின் கவலை பொருளாதார ரீதியிலானது. பணவீக்க விகிதம் இப்படி அதிகரித்துக் கொண்டே போனால் பட்ஜெட் பற்றாக்குறை அளவு அதிகரித்துவிடுமே, வரிவிதிப்பையும் அதிகப்படுத்த முடியாதே, தொழில் - வர்த்தகத்துறைகளுக்குத் தரும் வரிச் சலுகைகளையும் இதர பணச் சலுகைகளையும் குறைக்க முடியாமல், பொருளாதார நிர்வாகம் ஆட்டம் கண்டுவிடுமே என்பதுதான்.

ஏழைகளின் வாழ்க்கைத் தரம் குறைவது குறித்து மத்திய அரசுக்கு அக்கறையே இல்லை என்று கூறிவிட முடியாது, அதே சமயம் அவர்களுடைய கவலை பட்ஜெட் பற்றாக்குறையும் இதர பொருளாதாரக் காரணிகளும்தான் என்பதை மறுக்க முடியாது. சில வேளைகளில் பணவீக்க விகிதம் அதிகரித்தால்தான் தொழில்துறையில் உற்பத்தியே சூடு பிடிக்கும் என்பதால் ஆட்சியாளர்கள் அதை வரவேற்பதும் உண்டு.

நாடு சுதந்திரம் அடைந்தது முதல் நம்முடைய நிதி அமைச்சர்கள் மக்களுடைய பிரச்னைகளை அவர்களுடைய கோணத்தில் இருந்து பார்த்தாலும் அதிகாரிகள், பொருளாதார நிபுணர்கள் ஆகியோர் கூறும் ஆலோசனைகளைக் கேட்பதையும், தொழிலதிபர்கள் - வியாபாரிகள் கேட்கும் சலுகைகளை வழங்குவதையுமே மரபாகக் கடைப்பிடித்து வந்துள்ளனர்.

இதற்கு உதாரணம் தேடி எங்கும் அலைய வேண்டாம். நாடு முழுக்க உணவு தானியங்களையும் காய்கறி, பழங்களையும் சேமித்து வைக்க போதிய உலர் கிடங்குகளும் குளிர்பதனக் கிடங்குகளும் இல்லை என்று கடந்த 10 ஆண்டுகளாக பல்வேறு அமைப்புகள் உரத்துக் கூறி வருகின்றன. ஆனால் அந்தத் திசையில் ஒரு அடியைக்கூட மத்திய அரசும் மாநில அரசுகளும் எடுத்துவைக்கவில்லை என்பது குறிப்பிடத்தக்கது.

அடுத்ததாக பொது விநியோகத் திட்டத்தைச் சீரமைப்பது பற்றியது. நாடு முழுக்க உள்ள ஏழைகள், பழங்குடிகள், மலைவாசி மக்கள், தாழ்த்தப்பட்ட வகுப்பினர், சாலை வசதிகளே இல்லாத கிராமங்கள் போன்றவற்றில் வசிப்பவர்களுக்கு அத்தியாவசியப் பண்டங்கள் கிடைப்பதற்காகப் பொது விநியோக முறையை வலுப்படுத்த வேண்டும் என்பதைக் கடந்த 15 ஆண்டுகளாக மத்தியில் ஆட்சிக்கு வருகிறவர்கள் ஆமோதிக்கிறார்கள், ஆனால் அதற்காக அலட்டிக் கொள்வதே இல்லை. விலைவாசி உயர்வு குறித்து வலியுறுத்திக் கேட்டால், விலைவாசியைக் கட்டுப்படுத்துவது மாநில அரசுகளின் கடமை என்று தட்டிக் கழிக்கிறார்கள்.

அத்தியாவசியப் பண்டங்களில் ஊக வியாபாரத்தையும், முன்பேர வர்த்தகத்தையும் அனுமதித்துவிட்டு விலைவாசியைக் குறைப்போம் என்று கூறுவது வெறும் உதட்டளவு உறுதிமொழியாகத்தானே இருக்கிறது? அரிசி, கோதுமை, பருப்பு வகைகள், சிறு தானியங்கள், சர்க்கரை போன்றவற்றின் விலை பல மடங்கு அதிகரித்தாலும் சாகுபடியாளர்களான விவசாயிகளுக்குக் கிடைப்பதோ அதில் நாலில் ஒரு பகுதிதான். இடைத்தரகர்களும் ஊக வியாபாரிகளும் மொத்த வியாபாரிகளும்தான் பெரும் பங்கை விழுங்குகிறார்கள். அவர்களுடைய செல்வாக்கு காரணமாகவே அரசு அவர்கள் மீது நடவடிக்கை எடுப்பதில்லை.

கரும்பு சாகுபடி செய்தால் கட்டுபடியாகும் விலை கிடைப்பதில்லை. கரும்பாலைகள் தொடங்கி அரசு அமைப்புகள் வரை அனைவராலும் அலைக்கழிக்கப்படுவதே மிச்சம் என்ற விரக்தி காரணமாகவே கரும்பு சாகுபடியே இனி வேண்டாம் என்று ஏராளமான மாநிலங்களில் விவசாயிகள் அதிலிருந்து விலகி வருகின்றனர். உள்நாட்டில் கரும்பு பயிரிடப்படும் நிலப்பரப்பு குறைவதற்கும் இதுவே காரணம்.

கூட்டுறவுச் சர்க்கரை ஆலைகளுக்குச் சாதகமாக முடிவுகளை உடனுக்குடன் எடுக்கும் அரசு, கரும்புச் சாகுபடியாளர்களுக்கோ, சர்க்கரை நுகர்வோருக்கோ ஆதரவாக வலுவான நடவடிக்கைகளை எடுப்பதில்லை என்பதே உண்மை. பொது விநியோகத் திட்டத்தை வலுப்படுத்த போதிய நிதி இல்லை என்ற பல்லவியையே மத்திய, மாநில அரசுகள் பாடிவருகின்றன. அதே வேளையில் நாடாளுமன்ற, சட்டமன்ற உறுப்பினர்களின் தொகுதி வளர்ச்சி நிதி முறையாகப் பயன்படுத்தப்படுவதில்லை என்ற குற்றச்சாட்டும் கூறப்படுகிறது. அந்த நிதியை பொது விநியோகத் திட்டத்துக்குப் பயன்படுத்தினால்தான் என்ன?

அரிசி, கோதுமை, பருப்பு வகைகள் போன்ற தானியங்களைப் பாதுகாப்பாகச் சேமித்துவைக்க உலர் கிடங்குகளையும் பழங்கள், காய்கறிகளைப் பதமாக வைத்திருக்க குளிர்பதனக் கிடங்குகளையும் அவரவர் தொகுதிகளில் இந்த நிதியைக் கொண்டு அமைத்துக் கொள்ளுங்கள் என்று 3 ஆண்டுகளுக்கு நிதியைத் திருப்பிவிட்டால் என்ன?

தனியார் சூப்பர் மார்க்கெட்டுகள் சங்கிலித் தொடராகக் கடைகளைத் திறப்பது சாத்தியம் என்றால் ஆயிரம் கரங்களைக் கொண்ட மத்திய, மாநில அரசுகளால் பொது விநியோகச் சங்கிலியை அமைக்க முடியாதா?

மக்களால் மக்களே மக்களை ஆளும் அரசாக இருந்தால் இது சாத்தியம்; ஊக வியாபாரிகளுக்காக ஊக வியாபாரிகளால் ஊக வியாபாரிகளே நடத்தும் அரசாக இருக்கும்போது அசாத்தியம்!
நன்றி : தினமணி

கடந்த 60 ஆண்டுகளாக பட்ஜெட்டில் குறிப்பிடப்படும் பாகிஸ்தான் தர வேண்டிய ரூ.300 கோடி கடன்

இந்தியா - பாகிஸ்தான் பிரிவினைக்கு முன்பு, பாகிஸ்தான், இந்தியாவுக்கு ரூ.300 கோடி தரவேண்டி யிருந்தது. அது நம் நாட்டு முதல் பட்ஜெட்டில் ( 1950 - 51 நிதி ஆண்டு ) கடன் ( லயபிலிட்டி ) பகுதியில் அப்போது எழுதப்பட்டது. ஆனால் இன்று வரை அந்த கடனை பாகிஸ்தான் நமக்கு வரவில்லை. எனவே இந்தியாவின் ஒவ்வொரு பட்ஜெட்டிலும் அந்த தொகை ரூ.300 கோடி கடனாக குறிப்பிடப்பட்டு வருகிறது. நேற்று மத்திய நிதி அமைச்சர் பிரணாப் முகர்ஜி தாக்கல் செய்த 2009 - 10 நிதி ஆண்டிற்கான பட்ஜெட்டிலும் ' பிரிவினைக்கு முன் பாகிஸ்தான் இந்தியாவுக்க தர வேண்டிய கடன் ரூ.300 கோடி ' என்று குறிப்பிடப்பட்டிருந்தது. இந்தியாவின் பட்ஜெட்டில் இப்போது காணப்படும் மொத்த லயபிலிட்டி ரூ.34,95,452 கோடியில் இந்த தொகை 0.008 சதவீதம்தான் என்றாலும், கடந்த 60 வருடங்களாக அந்த தொகை லயபிலிட்டியாக காண்பிக்கப்பட்டு வருகிறது. எனினும் இந்த தொகைக்கு இந்தியா வட்டி எதுவும் சேர்க்காமல் அசல் ரூ.300 கோடியை மட்டுமே தொடர்ந்து கடனாக காட்டி வருகிறது.

நன்றி : தினமலர்

தங்கம் விலை அதிகரிக்கும்

மத்திய பட்ஜெட்டில் தங்கக் கட்டிகள் இறக்குமதி மீதான சுங்க வரி அதிகரிக்கப்பட்டிருப்பதால் தங்கம் விலை அதிகரிக்கும். நேற்று சமர்ப்பிக்கப் பட்ட பட்ஜெட்டில், 10 கிராம் தங்கக்கட்டி இறக்குமதிக்கு வரி, 200 ரூபாய் என்று அறிவிக்கப்பட்டிருக்கிறது. இது வரை, 100 ரூபாய் மட்டுமே இருந்தது. மேலும், தங்க ஆபரணம் உட்பட மற்ற தங்கம் சம்பந்தப்பட்ட பொருட் கள் இறக்குமதி என்றால், அதற்கு 10 கிராமுக்கு 500 ரூபாய் இறக்குமதி வரி வசூலிக்கப்படும்.
இதுவரை இருந்த இறக்குமதி சுங்க வரி போல இது இருமடங்காகும். அதே போல வெள்ளி ஒரு கிலோ இறக்குமதி செய்தால், அதன் மீதான சுங்க வரி, 1,000 ரூபாயாக உயர்த்தப்பட்டுள்ளது. அதே சமயம் பிராண்ட் முத்திரை கொண்ட ஆபரணத் தங்க நகைகள் மீதான எக்சைஸ் வரி முற்றிலும் நீக்கப்பட்டிருக்கிறது.
பட்ஜெட் தாக்கல் உரையில், நிதியமைச்சர் பிரணாப் முகர்ஜி, 'தங்கம், வெள்ளி மீதான சுங்கவரி அதிகரிப்பு பெண்களிடையே என் மீது அதிருப்தியை அதிகரிக்க வழி செய்யும்' என்றார். அதற்காகத் தான், ஆபரணத் தங்கம் மீதான எக்சைஸ் வரியை முற்றிலும் நீக்குவதாகவும் அவர் குறிப்பிட்டார். தங்கம் மீதான சுங்கவரி உயர்வு குறித்து அகில இந்திய தங்கம் விற்பனையாளர் கூட்டமைப்பு தலைவர் ஷீல் சந்த் ஜெயின் கூறுகையில், 'தங்க வர்த்தகத்தைப் பாதிக்கும், அதே சமயம் ஆபரணத் தங்கம் மீதான எக்சைஸ் ரத்தால் அதிகம் பேர் பயனடையப் போவதில்லை' என்றார்.

நன்றி : தினமலர்

பட்ஜெட் எதிரொலி : பங்கு சந்தையில் கடும் சரிவு

இன்று தாக்கல் செய்யப்பட்ட பட்ஜெட்டில் நிறைய எதிர்பார்த்திருந்தவர்களுக்கு பெருத்த ஏமாற்றம் ஏற்பட்டதால் பங்கு சந்தையில் கடும் சரிவு ஏற்பட்டது. பேங்கிங் மற்றும் நிதித்துறையில் எந்த வித ஊக்குவிப்பு திட்டமும் அறிவிக்கப்படாததால் பங்கு சந்தையில் சரிவு ஏற்பட்டதாக சொல்கிறார்கள். இன்று காலை பட்ஜெட் வாசிக்கப்படாத வரை உயர்ந்திருந்த சந்தை குறியீட்டு எண்கள், பட்ஜெட் வாசிக்கப்பட்டதும் மழமழவென சரிய ஆரம்பித்து விட்டது. மாலை வர்த்தக முடிவில் மும்பை பங்கு சந்தையில் சென்செக்ஸ் 869.65 புள்ளிகள் குறைந்து 14,043.40 புள்ளிகளில் முடிந்திருக்கிறது. தேசிய பங்கு சந்தையில் நிப்டி 258.55 புள்ளிகள் குறைந்து 4,165.70 புள்ளிகளில் முடிந்திருக்கிறது. பங்கு சந்தை சரிவு குறித்து கருத்து சொன்ன நிதி அமைச்சர் பிரணாப் முகர்ஜி, இது அதிகப்படியான எதிர்பார்ப்பினால் வந்த விழைவு என்றார். மேலும் கார்பரேட் உலகம் இந்த பட்ஜெட்டால் விரக்தி அடையவில்லை என்றும் சொன்னார். தனிநபர் வருமான வரிவிலக்கு உச்சவரம்பு உயர்த்தப்பட்டிருக்கிறது. கம்மாடிடிஸ் டிரான்ஸ்சாக்ஷன் டாக்ஸ் நீக்கப்பட்டிருக்கிறது. மினிமம் ஆல்டர்நேட்டிவ் டாக்ஸ் உயர்த்தப்பட்டிருக் கிறது என்றார் முகர்ஜி.

நன்றி : தினமலர்

2008 - 09 ல் வளர்ச்சி விகிதம் 6.7 சதவீதமாக குறைந்திருக்கிறது : பிரணாப் முகர்ஜி

2009 - 10 நிதி ஆண்டிற்கான பட்ஜெட்டை இன்று தாக்கல் செய்த மத்திய நிதி அமைச்சர் பிரணாப் முகர்ஜி, கடந்த மூன்று நிதி ஆண்டுகளாக சராசரியாக 9 சதவீதமாக இருந்த இந்தியாவின் வளர்ச்சி விகிதம், 2008 - 09 நிதி ஆண்டில் 6.7 சதவீதமாக குறைந்திருக்கிறது என்றார். அவர் மேலும் தெரிவித்ததாவது : விரைவில் மீண்டும் 9 சதவீத வளர்ச்சியை அடைய தேவையான திட்டங்களை அரசு தீட்டி, அதற்கு ஏற்றபடி செயல்படும் என்றார். இந்த நிதி ஆண்டில் ஏழைகளுக்கு வீடு மற்றும் அடிப்படை தேவைகளை பூர்த்த செய்ய ஏற்படும் செலவுக்காக ரூ.3973 கோடி ஒதுக்கப்படுகிறது. ஜவஹர்லால் நேரு அர்பன் மறுவாழ்வு திட்டத்திற்காக ஒதுக்கப்படும் நிதி ரூ.12,887 கோடியாக உயர்த்தப்படும். விவசாய வளர்ச்சி 4 சதவீதமாக இருக்கும் என்று உத்தரவாதம் கொடுக்கலாம். விவசாய மற்றும் தொழில் வளர்ச்சிக்காக திட்டங்கள் தீட்டப்படும். 2008 ம் ஆண்டு, பொருட்கள் மற்றும் சர்வீஸ் துறையின் வர்த்தகம் இரட்டிப்õகி இருக்கிறது. உலக பொருளாதாரத்தில் இன்னும் ஸ்திரமற்ற தன்மையே நிலவி வருகிறது. இந்த ஒரு பட்ஜெட்டால் மட்டுமே நமது எல்லா பிரச்னைகளையும் சரி செய்து விட முடியாது. வறுமைக்கோட்டுக்கு கீழ் வாழ்ந்து வரும் மக்களின் எண்ணிக்கை, 2014 க்குள் பாதியாக குறைக்கப்படும். 2009 - 10 நிதி ஆண்டில் நிதி பற்றாக்குறை 6.8 சதவீதமாக இருக்கும். 2014 க்குள் உள்கட்டமைப்பு துறையில் முதலீடு, மொத்த உள்நாட்டு உற்பத்தியில் 9 சதவீதத்திற்கும் அதிகமாக இருக்கும். முதல் முறையாக பட்ஜெட் தயாரிக்கும் முன் மாநில நிதி அமைச்சர்களுடன் பேச்சுவார்த்தை நடத்தியிருக்கிறேன். வெளிநாட்டு முதலீட்டாளர்கள் மீண்டும் இந்தியாவில் முதலீடு செய்ய வந்திருக்கிறார்கள். பிபிபி முறையில் குறிப்பிட்ட துறையில் முதலீட்டை பெறுக்குவதில் மத்திய அரசு வெற்றி பெற்றிருக்கிறது. ஹைவேஸ் மற்றும் ரயில்வே வளர்ச்சிக்காக ஒதுக்கப்படும் நிதி 23 சதவீதம் உயர்த்தப்படுகிறது. விவசாயிகள், அவர்களது கடனில் 75 சதவீதத்தை அடைக்க, அதிகபட்டமாக டிசம்பர் 31, 2009 வரை கால அவகாசம் நீட்டிக்கப்பட்டிருக்கிறது.

நன்றி : தினமலர்

ரயில்வேயின் ஆப்டிக்கல் ஃபைபர் கேபிள் அமைக்கும் வேலை தொடர்பாக நிபுணர் குழு அமைப்பு

இந்திய ரயில்வேயின் நெட்வொர்க் பணிக்காக, இந்தியா முழுவதும் ஆப்டிக்கல் ஃபைபர் கேபிள் அமைக்கும் பணி நடந்து வருகிறது. இதனை கண்காணித்து, ஆதை மேம்படுத்த ஆலோசனை சொல்ல,மற்றும் திட்டங்கள் தீட்ட, ஒரு நிபுணர் குழு அமைக்கப் படுகிறது. அந்த குழு, இந்தியாவின் டெலிகாம் துறையில் புரட்சியை ஏற்படுத்திய சாம் பிட்ரோடாவை தலைவராக கொண்டு செயல்படும் என்று ரயில்வே அமைச்சர் மம்தா பானர்ஜி நேற்று தெரிவித்தார். இந்த குழு, ரயில்வேயில் ஆப்டிக்கல் ஃபைபர் கேபிள் நெட்வொர்க்கில் என்னென்ன புதுமைகளை செய்யலாம் என்றும், இதன் மூலம் நாட்டின் ஒதுக்குப்புறமான பகுதிகளுக்கும் தகவல் தொழில் நுட்பத்தை எப்படி கொண்டு செல்லலாம் என்றும் ஆராய்ந்து ஆலோசனை சொல்லும் என்று மம்தா தெரிவித்தார். ரயில்வேயில் ஆப்டிக்கல் ஃபைபர் அமைக்கும் பணியை ஏற்கனவே ரெயில்நெட் என்ற நிறுவனம் ஏற்று செய்து வருகிறது. இந்த நிறுவனம் தான் இந்திய டெலிகாம் துறையில் இருந்து அதற்கு தேவையான உரிமத்தை பெற்றிருக் கிறது. ஏற்கனவே ரயில் பாதைகளில் சுமார் 30,000 கி.மீ.தூரத்திற்கு அது ஆப்டிக்கல் ஃபைபர் கேபிளை அமைத்தும் இருக்கிறது. அதனை விரையில் 40,000 கி.மீ.தூரத்திற்கு விரிவு படுத்தவும் அது முடிவு செய்திருக்கிறது.

நன்றி : தினமலர்

ரயில்வே பட்ஜெட் காரணமாக பங்கு சந்தையில் முன்னேற்றம்

இன்று ரயில்வே பட்ஜெட் தாக்கல் செய்யப்பட்டதையடுத்து, இன்று பங்கு சந்தையில் நல்ல முன்னேற்றம் ஏற்பட்டிருக்கிறது. நிதி, இன்ஃப்ராஸ்டரக்சர், பார்மா, மற்றும் ஆயில் அண்ட் கேஸ் போன்ற துறை பங்குகள் அதிகம் வாங்கப்பட்டன. மாலை வர்த்தக முடிவில் மும்பை பங்கு சந்தையில் சென்செக்ஸ் 254.56 புள்ளிகள் ( 1.74 சதவீதம் ) உயர்ந்து 14,913.05 புள்ளிகளில் முடிந்திருக்கிறது. தேசிய பங்கு சந்தையில் நிப்டி 75.40 புள்ளிகள் ( 1.73 சதவீதம் ) உயர்ந்து 4,424.25 புள்ளிகளில் முடிந்திருக்கிறது.

நன்றி : தினமலர்

பங்கு விற்பனை: மத்திய அரசு புது முடிவு

கடும் நிதிப் பற்றாக்குறையை சமாளிக்க, அரசு துறை நிறுவனங்களின் பங்குகளை விற்று, 14 ஆயிரம் கோடி ரூபாய் திரட்ட மத்திய அரசு திட்டமிட்டுள்ளது. கடந்த முறை ஆட்சியில் இருந்த போது, இடதுசாரிகள் மிரட்டல் இருந்ததால், அரசு துறை நிறுவனங்களின் பங்குகளை விற்க முடியாமல் தவித்தது மத்திய அரசு. இந்த முறை இடதுசாரிகள் ஓரம் கட்டப்பட்டு விட்டதால், அவர்கள் தொல்லையில்லாமல் திட்டங்களை நிறைவேற்றுவதில் காங்., நிம்மதி அடைந்துள்ளது. ரசு செலவின மதிப்பீடுகள் அதிகரித்து வருகின்றன; வருவாயும் போதுமான அளவுக்கு இல்லை. திட்டங்களை நிறைவேற்ற அதிகளவில் ஒதுக்கீடும் செய்ய வேண்டியிருக்கிறது. இதனால், இதற்கான நிதிப் பற்றாக்குறையைத் தீர்க்க, பொதுத்துறை நிறுவனங்களின் பங்குகளில் சிலவற்றை தனியாருக்கு விற்று, அதன் மூலம் நிதி திரட்ட அரசு திட்டம் தீட்டியுள்ளது. இது தொடர்பான அறிவிப்பு, வரும் 6ம் தேதி பொது பட்ஜெட்டை தாக்கல் செய்யும் போது, அதில் பிரணாப் முகர்ஜி வெளியிடுவார் என்று தெரிகிறது. பொதுத்துறை நிறுவனங்களின் பங்குகளை விற்பதன் மூலம், 14 ஆயிரம் கோடி ரூபாய் திரட்ட இலக்கு நிர்ணயிக்கப்பட்டுள்ளது. நிதிப் பற்றாக்குறையை சமாளிக்க, இரு கட்டமாக பங்குகளை விற்க மத்திய அரசு பரிசீலித்து வருகிறது.

நன்றி : தினமலர்

பங்குச் சந்தையை கீழே தள்ளியது இடைக்கால பட்ஜெட் : சேதுராமன் சாத்தப்பன்

பட்ஜெட், 600 புள்ளிக்கு மேல் வரை சந்தையில் இருந்து அள்ளிக் கொண்டு போய்விட்டது. இந்த வாரம் திங்கள் முதல் நேற்று வரை நஷ்ட வாரம் தான். என்ன செய்வது என்று தெரியாமல் முதலீட்டாளர்கள் கைகளைப் பிசைந்து கொண்டிருக்கின்றனர். சாண் ஏறி சாண் வழுக்காமல் முழம் வழுக்குகிறது. சந்தை 9,000த்திலேயே அல்லாடுகிறது. பட்ஜெட்டை அனைவரும் மிகவும் எதிர்பார்த்திருந்தனர். நடக்கும் என்பார் நடக்காது என்பது போல ஆகிவிட்டது.
உலகளவில் ஏற்படும் தொய்வு, சந்தைகளின் இறக்கம், இங்கும் பிரதிபலித்தது. பட்ஜெட்டில் இன்னும் ஒரு பேக்கேஜ் வருமென அனைவரும் எதிர்பார்த்தனர்; அதுவும் வரவில்லை, வேறு எவ்விதமான நல்ல அறிவிப்புகளும் வரவில்லை. அது, சந்தையை திங்களன்றும் தாக்கியது, நேற்று முன்தினமும் இறக்கிச் சென்றது. திங்களன்று 329 புள்ளிகளும், நேற்று முன்தினம் 270 புள்ளிகளும் குறைந்தது. இந்தத் துறை தான் என்று இல்லாமல் அனைத்து துறைகளும் கீழே இறங்கியது.
கடந்த 30 ஆண்டுகளில் எப்போதெல்லாம் இடைக்கால பட்ஜெட் சமர்ப்பிக்கப்பட்டதோ அப்போதெல்லாம் சந்தை கீழே இறங்கியே வந்திருக்கிறது. அதுபோல தற்போதும் இறங்கியுள்ளது. ஒரு வேளை முதலீட்டாளர்களின் எதிர்பார்ப்புகள் அதிகமாக இருந்திருக்குமோ என்னவோ? உலகளவில் சந்தைகள் கீழேயே இருந்ததால், நேற்று துவக்கத்தில் சந்தை கீழேயே இருந்தது. இது தான் நல்ல சமயம் என்று வாங்குபவர்கள் இருந்ததால் சந்தை சிறிது மேலே சென்றது. முடிவாக மும்பை பங்குச் சந்தை 19 புள்ளிகள் கீழே சென்று 9,015 புள்ளிகளுடனும், தேசிய பங்குச் சந்தை 5 புள்ளிகள் மேலே சென்று 2,776 புள்ளிகளுடனும் முடிவடைந்தது. 9,000க்கு மேலேயே இருப்பது ஒரு சிறிய ஆறுதல். இறங்கும் சந்தையும், ஏறும் டாலர் மதிப்பும்: சந்தை இப்படி இறங்குவதால், டாலருக்கு எதிராக ரூபாயின் மதிப்பு குறைந்து கொண்டே போகிறது. 50 ரூபாயை தாண்டி பயமுறுத்துகிறது. ஏற்றுமதியாளர்கள் மகிழ்ச்சி அடைந்தாலும், இறக்குமதியாளர்களை கலக்கிக் கொண்டிருக்கிறது. வங்கிகள் வட்டி விகிதங்களை குறைத்திருந்தாலும் இன்னும் விலை குறையுமா என்று தான் பலரும் காத்து கொண்டிருக்கின்றனர். ஸ்டேட் பாங்க் 8 சதவீதத்தில் கடன் அளிக்கிறேன் என்றாலும் அது முதல் ஆண்டுக்கு மட்டும் தான் என்பது ஒரு சிறிய குறை. ஆதலால், நீண்ட கால கடன் எடுப்பவர்கள் முடிவு எடுப்பதில் சிரமப்படுகின்றனர். வீடுகளை கட்டி வைத்துள்ள கம்பெனிகள் தள்ளுபடி செய்து விற்கவும் முயற்சிகள் எடுத்து வருகின்றன. டி.எல்.எப்., முதல் கட்டமாக டில்லி மற்றும் பெங்களூரில் சிறிது தள்ளுபடி செய்து விற்பனை செய்ய முடிவு செய்துள்ளது. இது கட்டுமானத் துறையை பலப்படுத்தப் போகிறதா என்று பார்க்க வேண்டும்.
தங்கமே தங்கமே: எல்லையே இல்லை என்ற அளவிற்கு ஏறிக்கொண்டு செல்கிறது. பங்குச் சந்தை, மியூச்சுவல் பண்ட், ஹெட்ஜ் பண்ட் போன்று எங்கு முதலீடு செய்தாலும் தற்போது பெரிய வருமானம் கிடைக்காது என்று சரியாக தெரிந்ததால் உலகளவில் தங்கம் மேல் அனைவரும் கண் வைத்திருக்கின்றனர். அது விலையைக் கூட்டிக் கொண்டே செல்கிறது.
திருமணத்திற்கு பெண் வைத்திருப்பவர்கள் அடிமடியில் பயத்தை கட்டிக் கொண்டிருக்கின்றனர். கடந்த ஒரு ஆண்டில் 25 சதவீதம் லாபத்தை தந்திருந்தாலும், சமீபகாலத்தில் 36 சதவீதம் வரை லாபம் தந்துள்ளது என்றால் ஆச்சரியமாக இல்லை? விலை உடனடியாகக் குறையாவிட்டாலும் சிறிது நாட்கள் கழித்து குறைய வாய்ப்பு உண்டு. இவ்வளவு விலை கொடுத்து வாங்குபவர்கள் இருக்கின்றனர் என்றால் இல்லை அதிகமாக இல்லை என்று தான் கூறவேண்டும். அத்தியாவசியமாக வாங்கத் தான் வேண்டும் என்பவர்களும், வேறு முதலீட்டு வாய்ப்புகள் இல்லை என்பதால் முதலீடு செய்பவர்களும் செய்கின்றனர். ஆனால், கூடும் விலையால் தங்கம் இறக்குமதி மிகவும் குறைந்து விட்டது. முன்பெல்லாம் தங்கம் விலை கூடும் போதெல்லாம் வரிசையில் நின்று விற்பவர்களும் இருப்பார்கள். தற்போது அதுவும் குறைந்து விட்டது. இந்த ஆண்டு அரசு நிறைய கடன் வாங்க இருப்பதாக வந்த செய்திகளும் சந்தையை கீழே இறக்க ஒரு காரணமாக இருந்தது. அதாவது, அப்படி அரசு கடன் வாங்கும் போது அது தற்போது குறந்து வரும் வட்டி விகிதங்களை கூட்டி விடும். அந்த பயத்தினாலும் சந்தைகள் சிறிது சரிந்தன என்று கூறலாம். இப்போது அனைவரும் பிரார்த்திப்பது ரிசர்வ் வங்கியின் ரேட் கட்டை தான். கட்டாயம் வரவேண்டும், அது தான் சந்தையை நிமிர்த்தும் என்பது பலருடைய எண்ணம்.

நன்றி : தினமலர்

100 கோடி ரூபாய்க்கு வரி விலக்கு மற்றும் வரிச் சலுகைகள்: விலை குறையும் பொருட்கள் எவை?

தமிழக பட்ஜெட்டில் 100 கோடி ரூபாய்க்கு வரிவிலக்கு மற்றும் வரிச் சலுகைகள் அறிவிக்கப்பட்டுள்ளன.
பட்ஜெட்டில் வெளியிடப் பட்டுள்ள அறிவிப்பு: கடந்த மூன்று ஆண்டுகளில் மின் கட்டணமும், பஸ் கட்டணமும் உயர்த்தப்படவில்லை. கடந்த மூன்று பட்ஜெட்களில் பல பொருட்களின் மீதான விற்பனை வரி மற்றும் மதிப்புக் கூட்டு வரிக்கு விலக்கு அளித்தும், வரியைக் குறைத்தும் அறிவிக்கப்பட்டது. இந்த பட்ஜெட்டிலும் அனைவருக்கும் பலன் அளிக்கும் வகையில் வரி விலக்கு, வரி குறைப்புகள் செய்ய அரசு கருதியுள்ளது.
மதிப்புக் கூட்டு வரியில் பின்வரும் சலுகைகள் அறிவிக்கப்படுகின்றன:
* மிளகு மற்றும் சீரகத்திற்கு விற்றுமுதல் நிபந்தனையுடன் வரிவிலக்கு அளிக்கப்படும்.
* பருப்பு, பயிறு மற்றும் பட்டாணிக்கு கொள்முதல் வரியிலிருந்து 1.1.2007 முதல் விலக்களிக்கப்படும்.
* கையால் தயாரிக்கப்படும் இரும்புப் பெட்டிக்கு தற் போது 12.5 சதவீத வரி விதிக்கப்படுகிறது. இப்பொருளுக்கு முழு வரிவிலக்கு அளிக்கப்படும்.
* கையால் தயாரிக்கப்படும் தகர டின்களுக்கு முழு வரிவிலக்கு அளிக்கப்படும்.
* வணிகச் சின்னமிட்ட நெய், ஊறுகாய் மீது தற்போது விதிக்கப்படும் 12.5 சதவீத வரி 4 சதவீதமாக குறைக்கப்படும்.
* கையால் தயாரிக்கப்படும் இரும்புப் பெட்டகம், உலர்ந்த திராட்சை, சலவைத் தண்ணீர், இணைப்பான்களாக பயன்படுத்தப்படும் குண்டூசி, ஊக்கு, ஜெம் கிளிப், அடையாள அட்டை கிளிப், தேர்வு அட்டை கிளிப், ரப்பர் பேண்ட், ஸ்டேப்ளர் பின், ஐ-பாட், எம்.பி.,-3, எம்.பி.,-4 ஆகியவற்றின் மீது விதிக்கப்படும் 12.5 சதவீத வரி 4 சதவீதமாக குறைக்கப்படும்.
* சேலம் சேகோசெர்வ் மூலம் விற்கப்படும் ஜவ்வரிசி மற்றும் ஸ்டார்ச் மீதான வரி 2 சதவீதத்தில் இருந்து 1 சதவீதமாக குறைத்து விதிக்கப்படும்.
ண செங்கல் உற்பத்தியாளர்கள் எளிய முறையில் வரி செலுத்த வசதியாக, செங்கல் சூளை அடுப்புகளின் எண்ணிக்கை அடிப்படையில் வரி விதிக்கப்படும்.
* வணிகர்கள் கோரிக்கையை ஏற்று, 1.4.2006 முதல் 31.12.2006 வரை தமிழ்நாடு பொது விற்பனை வரிச் சட்டத் தின் கீழ் உண்டான விற்பனைத் தொகையை சேர்த்து கணக்கிட்டு, மதிப்புக் கூட்டு வரிச் சட்டத்தின் கீழ் ஆண்டு மொத்த விற்பனைத் தொகைøயாகக் கருதி மதிப்புக் கூட்டு வரி விதிப்பு செய்யப்படும்.
* இது மேற்குறிப்பிட்ட காலத்தில் மதிப்புக் கூட்டு வரி வசூலித்த வணிகர்களுக்கு மட்டும் பொருந்தும். இதனால், 10 ஆயிரம் சிறு உற்பத்தியாளர்கள் மற்றும் வணிகர்கள் பயன்பெறுவர்.
* 'வாட்' வரி விதிப்பை எளிமைப்படுத்த, தமிழ்நாடு மதிப்புக் கூட்டு வரிச் சட்டம் 2006 மற்றும் அதன் விதிகளில் தேவையான உரிய திருத்தங் கள் மேற்கொள்ளப்படும்.இது குறித்த விவரங்கள் வணிகவரித்துறை மானியக் கோரிக்கையில் அறிவிக்கப்படும். இந்த வரிவிலக்கு மற்றும் வரிக் குறைப்பு சலுகைகள் 1.4.2009ல் இருந்து அமல்படுத்தப்படும். இச்சலுகைகளால் அரசுக்கு 100 கோடி ரூபாய் வரி இழப்பு ஏற்படும்.

நன்றி : தினமலர்

பங்கு சந்தையில் தொடர்ந்து சரிவு

பங்கு சந்தையில் தொடர்ந்து இரண்டாவது நாளாக சரிவு ஏற்பட்டிருக்கிறது. நேற்று தாக்கல் செய்யப்பட்ட மத்திய அரசின் இடைக்கால பட்ஜெட்டை தொடர்ந்து இன்று இரண்டாவது நாளாக பங்கு சந்தையில் பங்குகள் அதிக அளவில் விற்கும் போக்கு காணப்பட்டது. இன்ஃப்ராஸ்டிரக்சர், மெட்டல், டெக்னாலஜி, மற்றும் ஆயில் அண்ட் கேஸ் பங்குகள் இன்று பெருமளவில் விற்கப்பட்டதால் சென்செக்ஸ் 9,000 புள்ளிகளுக்கு இறங்கி விட்டது. நிப்டி 2,800 புள்ளிகளுக்கும் கீழே சென்று விட்டது. இரண்டு நாட்களில் சென்செக்ஸ் 600 புள்ளிகளையும் நிப்டி 175 புள்ளிகளையும் இழந்திருக்கிறது. ரிலையன்ஸ் இன்டஸ்டிரீஸ், என்டிபிசி, இன்போசிஸ், ஐசிஐசிஐ பேங்க், எஸ்.பி.ஐ., ஓ.என்.ஜி.சி., ஹெச்.டி.எப்.சி., ரிலையன்ஸ் கம்யூனிகேஷன், செய்ல், டி.சி.எஸ்., ஹெச்.டி.எப்.சி.பேங்க் போன்றவைகள் அதிகம் நஷ்டமடைந்திருக்கின்றன. இன்று மும்பை பங்கு சந்தையில் நிப்டி 270.45 புள்ளிகள் ( 2.91 சதவீதம் ) குறைந்து 9,035.00 புள்ளிகளில் முடிந்திருக்கிறது. தேசிய பங்கு சந்தையில் நிப்டி 78.00 புள்ளிகள் ( 2.74 சதவீதம் ) குறைந்து 2,770.50 புள்ளிகளில் முடிந்திருக்கிறது.

பட்ஜெட்டில் வரி விதிப்பு இல்லாதது ஏன்: பிரணாப் பதில்: தேவையற்ற கடனுக்கும் எதிர்ப்பு

பார்லிமென்டின் ஒப்புதல் இல்லாமல் வரி விதிப்பதையும், தேவையற்ற வகையில் கடன் வாங்குவதையும் நான் விரும்பவில்லை. அப்படி செய்வது தவறான செயல். அதனால், புதிய வரிகள் எதுவும் விதிக்கப்படவில்லை என, நிதியமைச்சர் பிரணாப் முகர்ஜி கூறினார். இடைக்கால பட்ஜெட் சமர்ப்பித்த பின், லோக்சபா 'டிவி'க்கு பேட்டியளித்த அவர் கூறியதாவது: அடுத்து பதவியேற்க உள்ள அரசு, பொருளாதார மந்தநிலையை சமாளிக்கும் வகையில், முழுமையான பட்ஜெட்டில் திட்ட ஒதுக்கீட்டை அதிகரிக்கும் வகையில் தற்போதைய பட்ஜெட் சமர்ப்பிக்கப்பட்டுள்ளது. எதிர்காலத்தை கருத்தில் கொண்டே செயல்பட்டுள்ளேன். பொருளாதார மந்தநிலை காரணமாக, வளர்ச்சி வீதம் 2 சதவீதம் கீழே இறங்கியிருந்தாலும், 9 சதவீத வளர்ச்சி வீதத்தை அடைய நாடு தொடர்ந்து பாடுபடும். பொருளாதாரத்தை மேம்படுத்தும் வகையில், முழுமையான சீர்திருத்த நடவடிக்கைகளை இந்த இடைக்கால பட்ஜெட்டில் எடுக்க முடியவில்லை. அரசியல் சட்ட ரீதியான கட்டுப் பாடுகளே அதற்கு காரணம். தற்போதைய அரசின் பதவிக்காலம் மே 22 - 23ம் தேதியுடன் முடிவடைந்து விடுகிறது. மேலும், தேர்தலும் நடைபெற உள்ளது. அதனால், பார்லிமென்டின் ஒப்புதல் இல்லாமல், தேவையற்ற வகையில் கடன் வாங்குவதையும், வரிகள் விதிப்பதையும் நான் விரும்பவில்லை. கடன் வாங்கினால், வரிகள் விதித்தால், அது தவறான செயலாகி விடும். அடுத்த அரசு எந்தெந்த துறைகளில் கவனம் செலுத்த வேண்டும் என்பதை, இந்த பட்ஜெட் உரையில் குறிப்பிட்டுள்ளேன். குறிப்பாக மொத்த நிதிப்பற்றாக்குறை விஷயத்தில் கவனம் செலுத்த வேண்டும். மேலும் மந்த நிலையைப் போக்க நிதி உதவி தேவைப்படும் போது அரசு பரிசீலக்க வேண்டிய விஷயம். முழுமையான பட்ஜெட் தாக்கல் செய்யும் போது, அந்தத் துறைகளுக்கான நிதி ஒதுக்கீட்டை அதிகரிக்க வேண்டும். இவ்வாறு பிரணாப் முகர்ஜி கூறினார். சிதம்பரம் கருத்து: 'விரைவான மற்றும் உள்ளார்ந்த வளர்ச்சியின் மீது ஐக்கிய முற்போக்கு கூட்டணி அரசு கொண்டுள்ள நம்பிக்கையை பிரதிபலிப்பதாக இடைக்கால பட்ஜெட் உள்ளது' என, மத்திய உள்துறை அமைச்சர் சிதம்பரம் கூறியுள்ளார்.
அவர் மேலும் கூறியதாவது: உலக நிதி நெருக்கடியால், இந்த ஆண்டு சிரமமான ஆண்டாக மாறியுள்ளது. இந்தக் கால கட்டத்தில், இடைக்கால பட்ஜெட்டை சமர்ப்பிக்க கடும் பணியாற்றியுள்ளார் அமைச்சர் பிரணாப் முகர்ஜி. அவரின் செயல் பாராட்டத்தக்கது. உலக அளவில் கடும் மந்த நிலை நிலவினாலும், 2008 -09ம் ஆண்டில் இந்திய பொருளாதார வளர்ச்சி
7.1 சதவீதத்தை எட்டும் என, எதிர்பார்க்கப்படுகிறது. அது திருப்தி அளிக்கும் விஷயம். இவ்வாறு சிதம்பரம் கூறினார். உலக வங்கி உதவும்: இதனிடையே பட்ஜெட் தாக்கலுக்குப்பின் வழக்கமாக நிதித்துறை செயலர் உட்பட அதிகாரிகள் நிருபர்களிடம் பேசினர். பொருளாதார விவகாரச் செயலர் அசோக் சாவ்லா, நிதித்துறை செயலர் அருண் ராமநாதன் ஆகியோர், 'நடப்பாண்டில் சுணக்கம் தீர தனி நிதி உதவி இருக்காது. தேவைப்பட்டால் அரசு உதவும். 'மேலும் உலக வங்கியிடம் இருந்து 21 ஆயிரம் கோடி ரூபாய் கடனுதவி பெறப் போகிறோம். இதில், 15 ஆயிரம் கோடி பொதுத்துறை வங்கிகள் நிதி ஆதாரத்தை வலுவூட்ட தரப்படும். எஞ்சியுள்ள பணம் பவர் கிரிட் கார்ப்பரேஷன் போன்ற நிறுவன வளர்ச்சிக்கு செலவழிக்கப்படும். 'இன்றைய நிலையில் மொத்த வளர்ச்சியில் நிதிப்பற்றாக்குறை 7.5 சதவீதமாக இருக்கும் என்று மதிப்பிடப்பட்டிருக்கிறது' என்றனர். அதே சமயம் கவர்ச்சி இல்லாத பட்ஜெட் என்பதால், சென்செக்ஸ் புள்ளிகள் 329 குறைந்தது. நேற்றைய பங்குச் சந்தை குறியீட்டெண் 9,305.45 ஆகக் குறைந்தது.
உள்கட்டமைப்புக்கு ரூ.லட்சம் கோடி: மத்திய அரசு நேற்று தாக்கல் செய்த இடைக்கால பட்ஜெட்டில், உள்கட்டமைப்பு மேம்பாட்டுத் துறைக்கு, 99 ஆயிரத்து 534 கோடி ரூபாய் நிதி ஒதுக்கப்பட்டுள்ளது. குடிநீர் வினியோகம், மின்சாரம், குடியிருப்பு மற்றும் சாலை உட்பட நாட்டின் கிராமப்புற உள்கட்டமைப்பை வலுப்படுத்தும் திட்டமான 'பாரத் நிர்மாண்' திட்டத்திற்கு 40 ஆயிரத்து 900 கோடி ரூபாய் நிதி ஒதுக்கப் பட்டுள்ளது. ஜவகர்லால் நேரு தேசிய ஊரக வளர்ச்சித் திட்டங்களுக்காக 11 ஆயிரத்து 842 கோடி ரூபாயும், கிராமப்புற உள்கட்டமைப்பு மேம்பாட்டு நிதிக்காக 14 ஆயிரம் கோடி ரூபாயும் ஒதுக்கப்படுகிறது. இந்த இடைக்கால பட்ஜெட்டில் ஒதுக்கப்பட்ட நிதியில் 10 ஆயிரம் கோடி ரூபாய் 'பிரதான் மந்திரி கிராம் சதக் யோஜனா' திட்டத்திற்கும், 8,800 கோடி ரூபாய் கிராமப்புறக் குடியிருப்பிற்கும், 9,992 கோடி ரூபாய் நெடுஞ்சாலைத் திட்டத்திற்கும் செலவிடப்படும். இவை பல மாநிலங்கள் மற்றும் யூனியன் பிரதேசங்களில் செயல்படுத்தப்படும். கடந்த 2005ம் ஆண்டு முதல் 2009ம் ஆண்டு வரை பாரத் நிர்மாண் திட்டத்திற்காக ஒதுக்கப்பட்ட நிதி 261 சதவீதம் அதிகரித்துள்ளது. இந்தாண்டு 40 ஆயிரத்து 900 கோடி ரூபாய் ஒதுக்கப்பட்டுள்ளது.

நன்றி : தினமலர்