அக்டோபரில் தொழில் வளர்ச்சி 10.3 சதவீதம் அதிகரிப்பு

அக்டோபர் மாதத்தில் தொழில் துறை வளர்ச்சி 10.3 சதவீதமாக அதிகரித்துள்ளது. இதற்கு முக்கிய காரணம் நுகர்வோர் பொருட்களின் உற்பத்தி அதிகரித்துள்ளதே ஆகும். இந்த நிதி ஆண்டின் இரண்டாவது காலாண்டில் (ஜுலை-செப்டம்பர்) பொருளாதார வளர்ச்சி 7.9 சதவீதமாக இருக்கும் தகவல் நேற்று வெளியிடப்பட்டது. இன்று தொழில் துறை வளர்ச்சியும் அதிகரித்த புள்ளி விபரங்களை அரசு வெளியிட்டுள்ளது. இதனால் நெருக்கடியிலும், மந்தநிலையிலும் இருந்த பொருளாதாரம், அரசின் பல்வேறு சலுகைகளால் வளர்ச்சி பாதையை நோக்கி திரும்பியுள்ளது.
இந்த நிதி ஆண்டின் முதல் ஏழு மாதங்களில் (ஏப்ரல்-அக்டோபர் வரை) 7.1 சதவீதமாக உயர்ந்துள்ளது. (சென்ற நிதி ஆண்டின் இதே காலகட்டத்தில் 4.3 சதவீதம்.) தொழில் துறை உற்பத்தியை கணக்கிடும் அட்டவணையில் உள்ள 80 சதவீத தொழில்களின் வளர்ச்சி 11.1 சதவீதமாக உயர்ந்துள்ளது. (சென்ற நிதி ஆண்டின் இதே காலகட்டத்தில் மைனஸ் 0.6 சதவீதம்.) அதே நேரத்தில் பங்குச் சந்தை உட்பட பல்வேறு நிபுணர்கள் அக்டோபர் மாத தொழில் துறை உற்பத்தி 12 சதவீதத்திற்கும் அதிகமாக இருக்கும் என்று எதிர்பார்த்தனர்.

நன்றி : தினமலர்

ஆகஸ்ட் மாதம் உற்பத்தி துறையில் 10.2 சதவீத வளர்ச்சி

கடந்த ஆகஸ்ட் மாதத்தில் இந்திய தொழில்துறையின் வளர்ச்சி 10.4 சதவீதமாக உயர்ந்து இருப்பதாக தெரிவிக்கப் பட்டுள்ளது. இதுகுறித்து, வெளியிடப் பட்டுள்ள செய்தியில், இந்தாண்டு ஆகஸ்ட் மாதத்தில், இந்திய ‌‌தொழில்துறை வளர்ச்சி 10.4 சதவீதமாக அதிகரித்து இருப்பதாகவும், உற்பத்தி துறையில் 10.2 சதவீதமாக வளர்ச்சி அதிகரித்து இருப்பதாகவும் தெரிவிக்கப் பட்டுள்ளது. 2007-08ம் ஆண்டில் 8.5ஆக இருந்த தொழில் துறை வளர்ச்சி 2008-09ம் ஆண்டிற்கான, ஏப்ரல் முதல் மார்ச் வரையிலான கால கட்டத்தில் 2.6 சதவீதம் அதிகரித்து இருப்பது குறிப்பிடத் தக்கது.

நன்றி தினமலர்

இந்தியன் வங்கி 52.40 சதவீதம் வளர்ச்சி

''இந்தியன் வங்கி இந்த ஆண்டின் முதல் காலாண்டு முடிவில், 331.66 கோடி ரூபாய் மொத்த லாபம் ஈட்டி உள்ளது. இதன் வளர்ச்சி விகிதம் 52.40 சதவீதத்தை எட்டி உள்ளது,'' என வங்கியின் தலைவரும், அதன் நிர்வாக இயக்குனருமான சுந்தரராஜன் கூறினார். இந்தியன் வங்கி இந்த ஆண்டின் முதல் காலாண்டிற்கான முடிவை நேற்று வெளியிட்டது. இது குறித்து சுந்தரராஜன் கூறியதாவது: இந்தியன் வங்கி இந்த ஆண்டின் முதல் காலாண்டு முடிவில் 331.66 கோடி ரூபாய் மொத்த லாபம் ஈட்டி உள்ளது. இதன் வளர்ச்சி விகிதம் 52.40 சதவீதத்தை எட்டி உள்ளது. மேலும், இந்தியன் வங்கி மூலதன அடிப்படையில் முதல் காலாண்டின் முடிவில் 13.68 சதவீதம் வளர்ச்சி அடைந்துள்ளது. இது கடந்த ஆண்டின் முதல் காலாண்டை ஒப்பிடும்போது 12.06 சதவீதத்தை விட அதிகம். இந்தியன் வங்கி எல்லா நிலைகளிலும் தனிச் சிறப்புடன் செயல்பட்டு வருகிறது. குறிப்பாக, வங்கியின் அலுவல் 20.63 சதவீதமாக உயர்ந்துள்ளது. வங்கி முதலீடு 62,215 கோடி ரூபாயிலிருந்து 76,717 கோடி ரூபாயாக உயர்ந்துள்ளது. இது 23.31 சதவீதம் அதிக வளர்ச்சி. இந்தியன் வங்கியின் ஏ.டி.எம்., கார்டு பயன்பாடு முதல் காலாண்டின் முடிவான ஜூன் 30ம் தேதியோடு 34.39 லட்சம் ரூபாய் அதிகரித்துள்ளது. கல்விக் கடன் வழங்குவதில் இந்தியன் வங்கி முன்னிலை வகிக்கிறது. 2009ம் ஆண்டின் முதல் காலாண்டு இறுதி வரை 143.76 கோடி ரூபாய்க்கு மாணவர்களுக்கு கல்விக் கடன் வழங்கி உள்ளது. இவ்வாறு சுந்தரராஜன் கூறினார். இந்நிகழ்ச்சியில், இந்தியன் வங்கியின் ஊழியர்கள் கலந்து கொண்டனர்.

நன்றி : தினமலர்

74 சதவீத சவுதி அரேபிய கம்பெனிகள் புதிதாக வேலைக்கு ஆட்களை எடுப்பதை நிறுத்துகின்றன

74 சதவீத சவுதி அரேபிய கம்பெனிகள் புதிதாக வேலைக்கு ஆட்களை எடுப்பதை இன்னும் ஆறு மாதங்களுக்கு நிறுத்தி வைக்கப்போவதாக தகவல்கள் தெரிவிக்கின்றன. உலக அளவில் ஏற்பட்டுள்ள பொருளாதார மந்த நிலை காரணமாக, சவுதி அரேபியாவின் பிரதான தொழிலான கச்சா எண்ணெய் ஏற்றுமதி தொழிலும் பெரிதும் பாதிக்கப்பட்டிருக்கிறது. எனவே புதிதாக வேலைக்கு எடுக்கும் போக்கு இன்னும் ஆறு மாதங்களுக்கு நிறுத்தப்படுகிறது. எஸ்ஏபிபி என்ற வங்கி, சவுதி அரேபியாவை சேர்ந்த 765 கம்பெனிகளிடம் இது குறித்து எடுத்த கருத்து கணிப்பில் இந்த விபரம் தெரிய வந்திருக்கிறது. இப்போதுள்ள பொருளாதார சூழ்நிலையில், சவுதி அரேபியாவின் தொழில் வளர்ச்சி இன்னும் இரு காலாண்டுகளில் 42 சதவீதாக குறைந்துதான் இருக்கும் என்று பெரும்பாலான கம்பெனிகள் தெரிவிக்கின்றன. கொஞ்ச கம்பெனிகள் மட்டுமே வளர்ச்சி அதிகமாக இருக்கும் என்கின்றன. மற்ற அரபு நாடுகளுடன் ஒப்பிட்டால், பொருளாதார மந்த நிலையால் சவுதி அரேபியா அவ்வளவாக பாதிக்கப்படாமல் தான் இருந்தது.எனினும் மற்ற அரபு நாடுகளை விட சவுதி அரேபியா அதிக மக்கள் தொகை உள்ள நாடு என்பதால், அங்கு வேலையில்லாதோர் பிரச்னை இப்போது எழுந்துள்ளது என்கிறார்கள்.

நன்றி : தினமலர்

பொருளாதார வளர்ச்சி திடீர் சரிவு: இனிமேல் அதிக பாதிப்பு வரும்

உலக அளவில் ஏற்பட்ட பொருளாதார பாதிப்பின் காரணமாக, கடந்த ஐந்தாண்டுகளில் இல்லாத வகையில், நம் நாட்டின் மொத்த வளர்ச்சி 5.3 சதவீதமாகக் குறைந்திருக்கிறது. இதனால், அதிக அளவு பாதிப்பு வரும் என்று கருதப்படுகிறது. கடந்த அக்டோபர்-டிசம்பர் மாதத்திற்கான மூன்றாவது காலாண்டு வளர்ச்சியைக் கணக்கிட்ட போது, இந்த சரிவு தெரிந்தது. இச்சரிவுக்கு விவசாய உற்பத்தி, மான்யுபேக்சரிங் துறை உற்பத்தி குறைவு என்று தெரிய வந்தது.
நடப்பாண்டான 2008- 2009ம் ஆண்டுக்கு மொத்த வளர்ச்சி 7.1 சதவீதம் இருக்கும் என்று அரசு எதிர்பார்த்ததற்கு மாறாக, அதற்குள் மொத்த வளர்ச்சி 5.3 சதவீதம் என்று புள்ளியியல் துறை தகவல் அச்சத்தை ஏற்படுத்தி யிருக்கிறது.
இது, கடந்த ஐந்தாண்டுகளில் இல்லாத அளவுக்கு குறைந்த சதவீதமாகும். உலகப் பொருளாதார மந்த நிலை பாதிக்கும். ஆனால், இங்கே தேக்கம் வராது என்று நிதியமைச்சகமும், திட்டக்கமிஷனும் கூறி வந்தாலும், தற்போது விவசாய உற்பத்தி மூன்றாவது காலாண்டில் வெறும் 2.2 சதவீதம் என்பது அதிர்ச்சியாக அமைந்திருக்கிறது. இதில் கரும்பு உற்பத்தி கணிசமாகக் குறைந்திருக்கிறது என்ற தகவலும் வெளிவந்திருக்கிறது. இத்தகவல் குறித்து கருத்து தெரிவித்த நிதித்துறை இணையமைச்சர் பன்சால், 'இன்னும் மூன்று மாதம் இருக்கிறது; வளர்ச்சி அதிகரிக்கும்' என்றார். ஆனால், பொருளாதார நிபுணர்கள் சிலர், தற்போது அரசு சில பொருளாதார நிதியுதவித் திட்டத்தின் மூலம் ஆயிரக்கணக்கான கோடி ரூபாய் தந்திருக்கிறது. அதன் பயன் தெரிய சில காலமாகும் என்றனர். 'கிரிசில்' என்ற மதிப்பீட்டு நிறுவனத்தைச் சேர்ந்த நிபுணர் ஜோஷி கூறுகையில், 'அரசு அறிவித்த சலுகையின் பயன் கள் தெரிய இன்னமும் ஏழு மாதங்கள் ஆகும்' என்றார். குறிப்பாக, சமூக, தனிநபர் சர்வீசஸ் துறையின் வளர்ச்சி கடந்தாண்டில் இதே காலத்தை ஒப்பிடும் போது முன்பிருந்த 5.5 சதவீதம் என்பது 17.3 சதவீதமாக அதிகரித்திருக்கிறது. அது, மத்திய-மாநில அரசுகள், அரசு ஊழியர்களுக்கு அளித்த சம்பள உயர்வு காரணமாக இருக்கும் என்று கூறப்படுகிறது. கடந்த மூன்றாண்டுகளுக்கு முன் 9 சதவீத வளர்ச்சி என்று மார்தட்டிய நிலை திடீரென கீழிறங்கியிருப்பது, பொருளாதார நிலை அபாய கட்டத்தில் இருப்பதைக் காட்டுகிறது. இதனால், நாடும் மக்களும் சிரம நிலையைச் சந்திக்க வேண்டி வரும். ஏற்கனவே வேலையிழப்பு, ஏற்றுமதி சரிவு, உற்பத்தியின்மை என்று தொடர்கிறது. ஆனாலும், தொழில் துறை மந்தம் ஏற்படும் பெரிய அபாயம் வராது என்று நிபுணர்கள் கருத்து தெரிவித்திருக்கின்றனர். இந்நிலையில், வங்கிகள் வட்டி சதவீதத்தைக் குறைப் பது தேவை என்ற கருத்து மேலோங்கியிருக்கிறது.

நன்றி : தினமலர்

ஜப்பானின் தொழில் உற்பத்தி கடந்த 50 ஆண்டுகளில் இல்லாத அளவு குறைந்தது

சர்வதேச அளவில் ஏற்பட்டுள்ள பொருளாதார சரிவில், அமெரிக்காவுக்கு அடுத்ததாக அதிகம் பாதிக்கப்பட்டது ஜப்பான் தான். உலகின் இரண்டாவது மிகப்பெரிய பொருளாதார நாடான ஜப்பானின் தொழில் உற்பத்தி கடந்த மாதத்தில் 10 சதவீதம் குறைந்து விட்டது. இது கடந்த 50 ஆண்டுகளில் இல்லாத அளவு குறைவு. கடந்த நான்கு மாதங்களாகவே ஜப்பானின் தொழில் உற்பத்தி தொடர்ந்து குறைந்து வந்திருப்பதால், அது பொருளாதாரத்தில் பெரிதும் பாதிக்கப்பட்டிருப்பது தெரிய வரும். ஜப்பானின் ஏற்றுமதி 45.7 சதவீதம் குறைந்து விட்டது என்ற அறிக்கை வெளிவந்த அடுத்த நாளே அதன் தொழில் உற்பத்தி 10 சதவீதம் குறைந்து விட்டது என்ற அறிக்கை வெளி வந்திருக்கிறது. ஏற்றுமதியையே பெரிதும் நம்பியிருக்கும் ஜப்பானின் பொருட்கள், பொருளாதார மந்த நிலை காரணமாக வெளிநாடுகளில் சரிவர விற்காததால் அதன் எலக்ட்ரானிக் பொருட்கள் மற்றும் கார்களுக்கு டிமாண்ட் குறைந்து விட்டது. அதனால் ஜப்பானின் ஏற்றுமதி குறைந்து போனது. அதேபோல உள்நாட்டிலும் மக்களின் வாங்கும் சக்தி 5.9 சதவீதம் குறைந்திருப்பதால் உள்நாட்டிலும் பொருட்கள் விற்பனை வெகுவாக குறைந்து விட்டது. இதனால் அங்கு தொழில் உற்பத்தி 10 சதவீதம் குறைந்திருக்கிறது என்கிறார்கள். சர்வதேச அளவில் பொருளாதாரத்தில் சரிவு நிலை ஆரம்பித்தபோது அமெரிக்கா மற்றும் ஐரோப்பாவில் உள்ள வங்கிகள் எல்லாம் கடும் சிரமத்தில் இருந்தபோது, ஜப்பான் வங்கிகள் எதுவும் அவ்வளவாக பாதிக்கப்படவில்லை. இருந்தாலும் ஜப்பானின் பொருட்கள் அமெரிக்கா மற்றும் ஐரோப்பிய சந்தையை நம்பி இருப்பதால், அங்கு ஏற்பட்டுள்ள வீழ்ச்சி ஜப்பானை அதிகம் பாதித்து விட்டது என்கிறார்கள்.

நன்றி : தினமலர்

தொழில் வளர்ச்சி 4.8 சதவீதமாக உயர்ந்தது

இந்தியாவின் தொழில் வளர்ச்சி செப்டம்பர் மாதத்தில் 4.8 சதவீதமாக உயர்ந்திருக்கிறது. அதற்கு முந்தைய மாதத்தில் அது, கவலை அளிக்ககூடிய வகையில் 1.42 சதவீதமாகத்தான் இருந்தது. இருந்தாலும் கடந்த வருடம் செப்டம்பர் மாதத்தில் 7 சதவீதமாக இருந்த வளர்ச்சி இப்போது 4.8 சதவீதமாகத்தான் இருக்கிறது. இன்டக்ஸ் ஆஃப் இன்டஸ்டிரியல் புரடக்ஷன் ( ஐஐபி) எடுத்த கணக்கெடுப்பின் படி, இந்த நிதி ஆண்டின் முதல் ஆறு மாதங்களில் தொழில் வளர்ச்சி 4.9 சதவீதமாக இருந்தது. ஆனால் கடந்த வருடத்தில் அது 9.5 சதவீதமாக இருந்தது. ஆகஸ்டில் இது 1.3 சதவீதம்தான் இருக்கும் என்று தான் எதிர்பார்த்தார்கள். ஆனால் அது 1.42 சதவீதமாக உயர்ந்திருந்தது. இந்த இன்டக்ஸில் 80 சதவீதத்தை எடுத்துக்கொள்ளும் உற்பத்தி, கடந்த வருடம் செப்டம்பரில் 7.4 சதவீதமாக இருந்தது இந்த வருடம் செப்டம்பரில் 4.8 சதவீதமாக இருக்கிறது. செப்டம்பர் மாதத்தில் மின் உற்பத்தி 4.4 சதவீதம் அதிகரித்திருக்கிறது. இது கடந்த வருடத்தில் 4.5 சதவீதமாகத்தான் இருந்தது. சுரங்க உற்பத்தி கடந்த வருடத்தில் 4.9 சதவீதமாக இருந்தது இந்த வருடத்தில் 5.7 சதவீதமாக உயர்ந்திருக்கிறது.

நன்றி : தினமலர்

எல்லாருக்கும் வளர்ச்சி தரும் திட்டம்: ரிசர்வ் வங்கி கவர்னர் முதல் பேட்டி

'பணவீக்கத்தைக் கட்டுப்படுத்த கடுமையான நிதிநிர்வாக நடவடிக்கை எடுத்த போதும், வளர்ச்சி பாதிக்காத வகையில் அதிகரிக்க நிதித்துறை சீர்திருத்தம் குறித்து கவனம் செலுத்தப்படும்' என்று ரிசர்வ் வங்கியின் கவர்னர் சுப்பாராவ் தெரிவித்தார்.ரிசர்வ் வங்கியின் கவர்னராக பொறுப்பு ஏற்றுள்ள சுப்பாராவ் நேற்று முதல் முறையாக நிருபர்கள் கூட்டத்தில் பங்கேற்றார். அப்போது அவர் கூறியதாவது;நிதித்துறை சீர்திருத்தம் என்பது யாருக்கு பயன் போய்ச் சேர வேண்டுமோ அதற்கேற்ற நடை முறை, செயல் திட்டங்கள் உருவாக்கப்படும். இது குறித்து மத்திய அமைச்சரவை கமிட்டி அளித்த பரிந்துரைகள் அடங்கிய ஒருங்கிணைந்த அறிக்கையை மத்திய அரசுடன் இணைந்து ரிசர்வ் வங்கி விரைவில் வெளியிட இருக்கிறது. உலக சூழ்நிலையைக் கருத்தில் கொண்டு, அதே சமயம் நமது தேவையுடன் கூடிய வளர்ச்சியை மேற்கொள்ளும் வகையில் இது இருக்கும்.நாட்டின் பொருளாதார வளர்ச்சியை கருத்தில் கொண்டுதான், கடுமையான நிதி நடவடிக்கைகள் எடுக்கப்பட்டுள்ளன. நாட்டின் பொருளாதார வளர்ச்சி 9 சதவீதத்தை தொட்டுவிட்டு, தற்போது உலகளவில் உள்ள பொருளாதார சூழ்நிலையால் சற்றே தொய்வு அடைந்துள்ளது. தற்போதுள்ள பணவீக்கம், பொருட்கள் வரத்து மற்றும் தேவை போன்ற காரணிகளால் ஏற்பட்டுள்ளது. இனி வரும் நாட்களில் பணவீக்கம் படிப்படியாக கட்டுக்குள் கொண்டு வரப்படும்.உள்நாட்டு மொத்த உற்பத்தி சதவீத நிலைமை குறித்த ஆய்வு அக்டோபர் மாதம் வெளியிடப்படும் நிதி கொள்கையில் இடம் பெறும். இந்தியாவின் பொருளாதார வளர்ச்சி வலுவானதாகவும், நம்பிக்கையளிப்பதாகவும் உள்ளது.நாட்டின் உடனடி மற்றும் மத்திய தர தேவைகளை கருத்தில் கொண்டு நிதித்துறை சீர்திருத்தங்கள் பொருத்தமான நேரத்தில் கொண்டுவரப்படும். வங்கிகள் சீர்திருத்தம் மேலும் அதிகரிக்கும்இவ்வாறு சுப்பாராவ் கூறினார்.
நன்றி : தினமலர்

8 சதவீத வளர்ச்சி சிதம்பரம் நம்பிக்கை

'நாட்டின் மொத்த உள்நாட்டு வளர்ச்சி, நடப்பு நிதியாண்டில் கண்டிப்பாக 8 சதவீதமாக இருக்கும்' என மத்திய நிதி அமைச்சர் ப.சிதம்பரம் நம்பிக்கை தெரிவித்தார்.மும்பை பங்குச் சந்தையில், 'கரன்சி பியூச்சர் டிரேடிங்'கை மத்திய நிதி அமைச்சர் சிதம்பரம் நேற்று துவக்கி வைத்தார். நேற்று வர்த்தகம் துவங்கிய முதல் நாளில் அமெரிக்க டாலர் ரூ.44.15 என்ற விலையில் வர்த்தகமாகியது. மொத்தம் ஐந்தாயிரம் வர்த்தக ஒப்பந்தங்கள், வர்த்தகம் துவங்கிய சில நிமிடங்களில் ஏற்பட்டன. இந்த வர்த்தகத்தில் பங்கேற்க 300 உறுப்பினர்கள், 11 வங்கிகள் பதிவு செய்துள்ளன. இதில், முதல் முறையாக வங்கிகள் வர்த்தகத்தில் ஈடுபட்டன. இருப்பினும், பதிவு செய்துள்ள உறுப்பினர்கள் அனைவரும் வர்த்தகத்தில் பங்கேற்கவில்லை.இந்த விழாவிற்கு பின், நிருபர்களிடம் பேசிய மத்திய நிதி அமைச்சர் சிதம்பரம் கூறியதாவது:நடப்பு நிதியாண்டில் நாட்டின் மொத்த உள்நாட்டு உற்பத்தி 8 சதவீதம் என்ற அளவில் நிலை பெறும்.கடந்தாண்டு நான் சொன்னபடி, மொத்த உள்நாட்டு உற்பத்தி 9 சதவீதமாக இருந்தது. என்னுடைய கணிப்புப்படி, ஆண்டு வளர்ச்சியானது பெரும்பாலும் சரியாக இருக்கும்.கரன்சி பியூச்சர் டிரேடிங்கில் ஒரு முதலீட்டாளர், அன்னிய செலாவணி சந்தையில் ஏற்படும் அபாயங்களுக்கு இதை ஹெட்ஜிங் செய்து கொள்ளலாம். வெளிநாட்டு நிறுவன முதலீட்டாளர்கள், குடியுரிமை பெறாத இந்தியர்கள் ஆகியோர் பங்கேற்க முடியும்.ரிசர்வ் வங்கியின் கவர்னர் பதவிக்கு காலியிடம் ஏற்படும் சமயத்தில் அப்போது முடிவு செய்யப்படும்.இவ்வாறு சிதம்பரம் கூறினார்.ஆனால், ரிசர்வ் வங்கி கவர்னர் வரும் 5ம் தேதி ஓய்வு பெறுகிறார். கவர்னர் பதவியில் தொடர்ந்து இருக்க விரும்பவில்லை என்று அவர் பேட்டி ஒன்றில் தெரிவித்திருக்கிறார் என்பது குறிப்பிடத்தக்கது.இதற்கிடையில், டில்லியில் மத்திய புள்ளியியல் அமைப்பு நேற்று வெளியிட்ட அறிக்கையில் கூறியிருப்பதாவது:நடப்பு நிதியாண்டில், முதல் காலாண்டில் நாட்டின் மொத்த உள்நாட்டு உற்பத்தி 7.9 சதவீதமாக இருந்தது. இதே காலகட்டத்தில் கடந்தாண்டு 9.2 சதவீதமாக இருந்தது.தயாரிப்பு பிரிவு மற்றும் மின்சார உற்பத்தியில் ஏற்பட்ட பின்னடைவால் உற்பத்தி குறைந்துள்ளது. கடந்தாண்டு பொருட்கள் தயாரிப்பு பிரிவில் வளர்ச்சி 10.9 சதவீதமாக இருந்தது. அது, தற்போது 5.6 சதவீதமாகக் குறைந்துள்ளது. அதேபோல் மின்சக்தி உற்பத்தியானது 7.9 சதவீதத்திலிருந்து 2.6 சதவீதமாகக் குறைந்துள்ளது.இவ்வாறு அறிக்கையில் கூறப்பட்டுள்ளது.

நன்றி : தினமலர்

8 சதவீதம் நிச்சயம்: சிதம்பரம் நம்பிக்கை

'நாட்டின் பொருளாதார வளர்ச்சி நிச்சயம் 8 சதவீதத்தை நெருங்கும்' என, மத்திய நிதி அமைச்சர் சிதம்பரம் தெரிவித்துள்ளார். பொதுத்துறை வங்கிகளின் தலைவர்களுடன் மத்திய நிதி அமைச்சர் சிதம்பரம் நேற்று ஆலோசனை நடத்தினார். இக்கூட்டத்திற்கு பின் நிருபர்களிடம் பேசிய அவர் கூறியதாவது: நாட்டின் மொத்த உள்நாட்டு உற்பத்தி இந்தாண்டு 7.7 சதவீதமாக இருக்கும் என்று பொருளாதார ஆலோசனை கவுன்சில் அறிக்கையில் கூறப்பட்டுள்ளது. என்னை பொருத்தமட்டில் உறுதியாக சொல்வேன் கண்டிப்பாக 8 சதவீதத்தை நெருங்கும். பொதுத்துறை நிறுவனங்களில் மிதமிஞ்சி நிதியில் 60 சதவீதத்தை பொதுத்துறை வங்கிகளில் முதலீடு செய்யும்படி வலியுறுத்த வேண்டும் என, பொதுத் துறை நிறுவனங்களை நிர்வாகிக்கும் துறையிடம் வலியுறுத்தினேன். உற்பத்தி துறைகளுக்கு தேவையான கடன்களை வழங்குவதில் கவனம் செலுத்த வேண்டும் என வங்கிகளை கேட்டு கொண்டுள்ளேன். நிதி கொள்கையில் செய்யப்பட்டுள்ள மாற்றங்களால் தனிநபர் கடனில் சற்று தொய்வு ஏற்பட்டுள்ளது. ரயில் எஸ்டேட் துறையில் கடன் வழங்குவதில் தான் சில கட்டுப்பாடுகளை வங்கிகள் விதித்துள்ளன. இருப்பினும் இத்துறையில் கடன் கோருவோர் எண்ணிக்கை அதிகமாகத்தான் இருக்கிறது. பெரும்பாலான வங்கிகள் தங்களின் பிரதான கடனுக்கு வட்டியை 0.75 சதவீதத்திலிருந்து 1 சதவீதம் வரை உயர்த்தியுள்ளன. இருப்பினும் வீட்டு கடனுக்கு தற்போதுள்ள நிலையே நீடிக்கிறது. புதிதாக வீட்டுக்கடன் ரூ.30 லட்சம் வரை வழங்கப்படுகிறது. இவ்வாறு சிதம்பரம் கூறினார்.

நன்றி : தினமலர்

'மொத்த உள்நாட்டு உற்பத்தி 7.7 சதவீதமாக இருக்கும்'

'நாட்டின் மொத்த உள்நாட்டு உற்பத்தி (ஜி.டி.பி.,) நடப்பாண்டில் 7.7 சதவீதமாக இருக்கும்' என, பிரதமருக்கான பொருளாதார ஆலோசனை கவுன்சிலின் அறிக்கையில் தெரிவித்துள்ளது. பிரதமருக்கான பொருளாதார ஆலோசனை கவுன்சில் தலைவராக உள்ள சி.ரங்கராஜன், ராஜ்யசபா எம்.பி.,யாக இருப்பதால் தலைவர் பதவியில் இருந்து விலகினார். புதிய தலைவராக, கவுன்சில் உறுப்பினராக இருந்த சுரேஷ் டெண்டுல்கர் பொறுப்பு ஏற்கிறார். பொருளாதார ஆலோசனை கவுன்சிலின் சார்பில் ஆண்டுதோறும் வெளியிடப்படும், 'பொருளாதார நிலைப்பாட்டு அறிக்கை' நேற்று வெளியிடப்பட்டது. இதை ரங்கராஜனும், சுரேஷ் டெண்டுல்கரும் வெளியிட்டு, இதன் சிறப்பு அம்சங்கள் குறித்து நிருபர்களிடம் விளக்கி கூறியதாவது: நடப்பாண்டில்(2008-09) நாட்டின் மொத்த உள்நாட்டு உற்பத்தி 7.7 சதவீதமாக இருக்கும். கடந்தாண்டில் மொத்த உள்நாட்டு உற்பத்தி 9 சதவீதமாக இருந்தது. வரும் மார்ச் மாதத்திற்குள் பணவீக்கம் 8 சதவீதம் முதல் 9 சதவீதத்திற்குள் கட்டுக்குள் கொண்டுவரப்படும். பணவீக்கத்தை கட்டுப்படுத்த எடுக்கப்பட்டுள்ள கடும் நடவடிக்கை மற்றும் மாற்றியமைக்கப்பட்ட பொருளாதார கொள்கைகளின் மூலம் பணவீக்கம் கட்டுக்குள் கொண்டு வரப்படும். இருப்பினும் சர்வதேச அளவில் ஏற்பட்டுள்ள பொருளாதார தேக்கநிலையால், இந்திய பொருளாதாரத்தில் பாதிப்பு ஏற்பட்டுள்ளது. பொருளாதாரம் சரியான பாதையில் பயணிப்பதற்கு ஒருங்கிணைந்த கூட்டு நடவடிக்கைகள் அவசியமானதே. கடந்த நான்கு ஆண்டுகளாக மொத்த உள்நாட்டு உற்பத்தி 9 சதவீதம் என்ற அளவில் தொடர்ந்து இருந்து வந்தது. கடந்தாண்டில் விவசாய உற்பத்தி 4.5 சதவீதமாக இருந்தது. நடப்பாண்டில் இது 2 சதவீதத்தை மட்டுமே எட்டும். தொழில் வளர்ச்சி 7.5 சதவீதமாக இருக்கும். இவ்வாறு அவர்கள் கூறினர்.

நன்றி : தினமலர்