மே மாதத்தில் மாருதி சுசுகி வெளியிடும் இன்னுமொரு சிறிய கார்

இந்தியாவில் பயணிகள் கார் விற்பனையில் முதல் இடத்தில் இருக்கும் மாருதி சுசுகி நிறுவனம், பல சிறிய கார் மாடல்களை வைத்திருக்கிறது. அந்த வரிசையில் மேலும் ஒரு சிறிய காரை இந்த வருடம் மே மாதத்தில் அது வெளியிடு கிறது. ஏற்கனவே ஆறு சிறிய கார் மாடல்களை வைத்திருக்கும் மாருதி சுசுகி நிறுவனம், இந்த மே மாதத்தில் ஏழாவதாக ரிட்ஸ் என்ற மாடல் காரை வெளியிடுகிறது. பெரும்பாலான நாடுகளில் ஸ்பிளாஸ் என்ற பெயரில் வெளிவரும் இந்த புதிய ரக கார், இந்தியாவில் ரிட்ஸ் என்ற பெயரில் வெளிவருகிறது. மாருதியின் ஸ்விப்ட் காரைப்போலவே இருக்கும் ரிட்ஸ், 3.7 மீட்டர் நீளம் உள்ள கார். ஐரோப்பிய சந்தையில் இருந்து வேகன் - ஆர் மாடலை எடுக்க திட்டமிட்டிருக்கும் சுசுகி நிறுவனம், அதற்கு பதிலாக ரிட்ஸ் ஐ அறிமுகப்படுத்துகிறது. வேகன் - ஆர் மாடலை விட இது 18 சென்டிமீட்டர் நீளமுள்ளது. மாருதி சுசுகி மாடல்களில், முதன் முதலில் கே 12 எம் இஞ்சின் பொறுத்தப்பட்டு வெளிவரும் மாடல் இதுதான்.
நன்றி : தினமலர்