லாபம் குறைந்து போனதால் 5 சதவீத ஊழியர்களை குறைக்கிறது யாகூ

உலகம் முழுவதும் இருக்கும் அதன் ஊழியர்கள் என்ணிக்கையில் 5 சதவீதத்தை குறைக்க யாகூ முடிவு செய்திருக்கிறது. செலவை குறைக்கும் நடவடிக்கையை எடுத்த பின்பும் அதன் நிகர லாபம் குறைந்திருப்பதால், மேலும் ஊழியர்களை குறைக்க அந்த நிறுவனம் முடிவு செய்திருக்கிறது. பொருளாதார நிலை இன்னும் மோசமாகத்தான் இருக்கிறது. எங்கள் வெப்சைட்களில் வெளியிடப்படும் டிஸ்ப்ளே விளம்பரம் மற்றும் தேடுதல் மூலம் பார்க்கப்படும் விளம்பரங்கள் மூலம் வந்து கொண்டிருந்த வருமானம், இந்த முதல் காலாண்டில் குறைந்திருக்கிறது. எனவே லாபமும் குறைந்து போனது என்கிறது யாகூ. கடந்த வருடத்தின் மார்ச் மாதத்துடன் முடிந்த காலாண்டில் 537 மில்லியன் டாலர் லாபம் சம்பாதித்திருந்த யாகூ, இந்த வருடத்தில் 118 மில்லியன் டாலர் லாபம் தான் சம்பாதித்திருக்கிறது. அதன் மொத்த வருவாயும் 13 சதவீதம் குறைந்து 1.58 பில்லியன் டாலராகி இருக்கிறது. எனவே குறைந்திருக்கும் லாபத்தை சரிக்கட்ட, உலகம் முழுவதிலும் இருக்கும் அதன் ஊழியர்கள் எண்ணிக்கையில் 600 முதல் 700 வரை ( அதாவது 5 சதவீதம் ) குறைக்கிறது. கடந்த வருடம் அக்டோபரில் தான் யாகூ, அதன் ஊழியர்கள் எண்ணிக்கையில் ஒரு சதவீதத்தை குறைத்தது.

நன்றி : தினமலர்