கச்சா எண்ணெய் விலை உயரவில்லை என்றால் மேலும் உற்பத்தி குறைக்கப்படும் : ஓபக்

சர்வதேச சந்தையில் கச்சா எண்ணெய் விலை கொஞ்சம் உயர்ந்திருக்கிறது. நியுயார்க் சந்தையில் யு.எஸ்.லைட் ஸ்வீட் குரூட் ஆயில் விலை பேரலுக்கு 2.80 டாலர் அதிகரித்து 63.84 டாலராகி இருக்கிறது. லண்டனின் பிரன்ட் நார்த் ஸீ குரூட் ஆயில் விலை பேரலுக்கு 2.72 டாலர் அதிகரித்து 60.07 டாலராகி இருக்கிறது. இதற்கிடையில் கச்சா எண்ணெய்கான விலை, ஓபக் எதிர்பார்க்கும் 70 டாலரில் இருந்து 90 டாலருக்குள் வரவில்லை என்றால் இன்னும் கொஞ்சம் உற்பத்தியை குறைக்க வேண்டியதுதான் என்று ஓபக் அமைப்பின் தலைவர் சாகிப் கேலில் தெரிவித்திருக்கிறார். அல்ஜீரியாவின் எனர்ஜி அமைச்சராகவும் ஓபக்கின் தலைவராகவும் இருக்கும் கேலில், அல்ஜீரியா தலைநகர் அல்ஜியர்ஸில் நடந்த எனர்ஜி இன்டஸ்டிரி செமினாரில் பேசியபோது, நாங்கள் எதிர்பார்க்கும் 70 டாலரில் இருந்து 90 டாலருக்கு விலை வரவில்லை என்றால், இன்னொரு முறை எண்ணெய் உற்பத்தியை குறைக்கவேண்டியதுதான் என்றார். இருந்தாலும் இதில் எல்லா நாடுகளிடேயும் கருத்து ஒற்றுமை ஏற்பட வேண்டும் ; ஏனென்றால் ஒவ்வொரு நாட்டுக்கும் சொந்த விருப்பு வெறுப்பு இருக்கிறது என்றார். உலக எண்ணெய் ஏற்றுமதியில் 40 சதவீதத்தை கொண்டிருக்கும் ஓபக் நாடுகள், நவம்பரில் இருந்து எண்ணெய் உற்பத்தியில் நாள் ஒன்றுக்கு 1.5 மில்லியன் பேரல்களை குறைத்து. 27.3 மில்லியன் பேரல்களை மட்டும் உற்பத்தி செய்வது என்று முடிவு செய்திருக்கிறார்கள்.

நன்றி : தினமலர்