ஆசிய 'டாப்' நிறுவனங்களில் இந்திய நிறுவனங்கள் 'டாப்'

ஆசியாவின் சிறந்த நிறுவனங்கள் பட்டியலில் முதல் இரு இடங்களை இந்தியாவைச் சேர்ந்த சீமன்ஸ் இண்டியா மற்றும் யுனிடெக் ஆகியவை பிடித்துள் ளன. ஆசிய நாடுகளில் சிறந்து விளங்கும் 50 நிறுவனங்கள் பட்டியல் தயாரிக்கப்பட்டுள்ளது. பிரபல நிதித்தறை இதழ் 'பிசினஸ் வீக்' இதை தயார் செய்துள்ளது. இந்தியாவைச் சேர்ந்த டி.சி.எஸ்., டி.எல்.எப்., டெக் மகிந்திரா மற்றும் ஐ.டி.சி., உட்பட 10 நிறுவனங்கள் முன்னணியில் உள்ளன. பட்டியலில் சீனாவைச் சேர்ந்த எட்டு, ஹாங்காங்கைச் சேர்ந்த ஆறு நிறுவனங்கள் இடம்பெற்றுள்ளன. ஜெர்மனியில் பிரபல சீமன்ஸ் நிறுவனத்தின் இந்திய நிறுவனம் சீமன்ஸ் இண்டியா. அதுபோல, கட்டுமான சேவையில் உள்ள நிறுவனம் யுனிடெக். இந்த இரு நிறுவனங்களை அடுத்து, சீனாவைச் சேர்ந்த அலிபாபா டாட் காம் மற்றும் மோலிபோடினம், ஜப்பானைச் சேர்ந்த இம்பெக்ஸ் ஹோல்டிங் ஆகிய நிறுவனங்கள் அடுத்தடுத்த இடத்தைப் பிடித்துள்ளன. முதல் 20 இடங்களுக்குள் ஏழு இந்திய நிறுவனங்கள் இடம்பெற்றுள்ளன. மருந்து நிறுவனம் சிப்லா(ஆறாவது), ஏ.பி.பி., இண்டியா(12), டெக் மகிந்திரா(13), இந்துஸ்தான் சிங்க்(17), டி.எல்.எப்., (18), பெல்(27), ஐ.டி.சி.,(45) மற்றும் டி.சி.எஸ்., (50) ஆகிய நிறுவனங்கள் குறிப்பிடத்தக்கவை. வர்த்தக ரீதியாக இந்த நிறுவனங்களுக்கு எந்த அளவில் செல்வாக்கு உள்ளது என்பதை பிரதிநிதிகளின் ஒட்டெடுப்பு மூலம் இந்த பட்டியல் தயாரிக்கப்பட்டது. இதில் இடம்பெற்ற சில முன்னணி நிறுவனங்கள், உலக அளவில் கொடிகட்டிப்பறக்கின்றன என்பதும் குறிப்பிடத்தக்கது.

நன்றி : தினமலர்