அடுத்த மாதம் 18-ம் தேதி நடைபெற இருக்கும் ஐந்து சட்டப்பேரவைத் தொகுதிகளுக்கான இடைத்தேர்தலைப் புறக்கணிக்கப் போவதாக அதிமுக அறிவித்துள்ளது. தேர்தல் புறக்கணிப்புக்கு, ஆளும் கட்சியின் அராஜகம், வாக்குப் பதிவில் முறைகேடு, அதிகார துஷ்பிரயோகம், வாக்காளர்கள் பணத்தால் விலைபேசப்படுவது என்று பல காரணங்கள் அதிமுக செயற்குழுவால் கூறப்பட்டுள்ளது.
மக்களாட்சியில் ஒரு பொறுப்பான எதிர்க்கட்சியின் கடமையே, இதுபோன்ற ஜனநாயக விரோதச் செயல்களைத் தட்டிக் கேட்பதும் தடுப்பதும்தானே? ஆளும் கட்சியின் தவறுகளை மக்கள்மன்றத்தில் எடுத்துக்கூறி, அவர்களை அரசுக்கு எதிராக அணிதிரட்டி, தேர்தல் தில்லுமுல்லுகள் நடைபெறுவதைத் தனது தொண்டர் பலத்தால் தடுத்து, ஜனநாயகத்தைப் பேணிக் காக்க வேண்டிய கடமை எதிர்க்கட்சிகளுக்கு உண்டு. தவறு நடக்கிறது, நடக்கப் போகிறது என்று காரணம் காட்டி தேர்தலைப் புறக்கணிப்பது என்பது புறமுதுகு காட்டி ஓடுவதற்கு ஒப்பான விஷயமல்லவா?
நடந்து முடிந்த மக்களவைத் தேர்தலில், மிகக் குறைவான வாக்கு வித்தியாசத்தில்தான் அதிமுக கூட்டணி பல தொகுதிகளில் வெற்றி வாய்ப்பை இழந்திருக்கிறது. மொத்த வாக்குகளை எடுத்துக்கொண்டால் ஆளும் திமுக கூட்டணிக்கும், அதிமுக கூட்டணிக்குமான வாக்கு வித்தியாசம் 2009 மக்களவைத் தேர்தலில் 16 லட்சம் மட்டுமே. அதிமுக கூட்டணியில் தொண்டர்கள் பல இடங்களில் விலைபோகாமல் இருந்திருந்தால் தேர்தல் முடிவுகள் தலைகீழாக இருந்திருக்கும் என்று அதிமுக பொதுச் செயலாளரே பொதுக்குழுவில் கூறியிருப்பதையும் இங்கே நினைவுகூராமல் இருக்க முடியவில்லை.
இடைத்தேர்தல் நடைபெற இருக்கும் ஐந்து தொகுதிகளில் மூன்று தொகுதிகள் கடந்த சட்டப்பேரவைத் தேர்தலில், மதிமுகவையும் விடுதலைச் சிறுத்தைகளையும் தனது தோழமைக் கட்சிகளாகக் கொண்டிருந்த அதிமுக கூட்டணி வெற்றி பெற்ற இடங்கள். இளையான்குடி தொகுதியில் திமுக கூட்டணியின் சார்பில் வெற்றி பெற்ற முன்னாள் அமைச்சர் கண்ணப்பன் இப்போது அதிமுகவில் இணைந்துவிட்டிருக்கிறார். காங்கிரஸ் வெற்றி பெற்றிருந்த ஸ்ரீவைகுண்டம் தவிர, ஏனைய நான்கு தொகுதிகளிலும் அதிமுக அணி வெற்றி பெற எல்லா சாத்தியங்களும் இருந்தும் தேர்தலைப் புறக்கணிப்பது என்று அதிமுக முடிவெடுத்திருப்பதும், அதை அந்த அணியிலுள்ள ஏனைய கட்சிகள் ஏற்றுக்கொண்டிருப்பதும் அதிர்ச்சியை அளிக்கிறது.
ஆளும் கட்சியின் செயல்பாடுகளில் மக்களின் அதிருப்தி உச்சகட்டத்தை நெருங்கிக் கொண்டிருக்கும் நேரம் இது. அரிசி விலை மட்டுமல்ல, அத்தியாவசிய உணவுப் பொருள்கள் எல்லாம் நடுத்தர வர்க்கத்தினரின் வருமான வரம்பை மீறி கட்டுக்கடங்காமல் அதிகரித்திருக்கும் நிலைமை.
இந்தச் சூழ்நிலையைச் சாதகமாக்கி, மக்களின் உணர்வுகளைப் பிரதிபலிக்க வேண்டிய எதிர்க்கட்சியான அதிமுக, ஆளும் கட்சியின் செயல்பாடுகளை விமர்சித்து மக்கள் மன்றத்தில் ஆதரவு கோர வேண்டிய எதிர்க்கட்சியான அதிமுக, தேர்தல் தில்லுமுல்லுகள், வாக்குகள் விலை பேசப்படுதல் போன்றவற்றை மக்கள் ஆதரவுடனும், தொண்டர்களின் ஆதரவுடனும் தடுத்து நிறுத்தும் ஜனநாயகக் கடமையை நிறைவேற்ற வேண்டிய எதிர்க்கட்சியான அதிமுக, போட்டிக்கு முன்பே பந்தயத்திலிருந்து விலகுவதாக அறிவித்திருப்பது, அந்தக் கட்சி செயலிழந்துவிட்டதைக் காட்டுகிறதா இல்லை கட்சித் தலைமையின் அசிரத்தையைக் காட்டுகிறதா என்று தெரியவில்லை.
வன்முறை, அராஜகம் போன்றவற்றைக் காரணம் காட்டி சென்னை மாநகராட்சித் தேர்தலை அதிமுக புறக்கணித்ததால் யாருக்கு என்ன லாபம் ஏற்பட்டது? தட்டிக் கேட்க ஆளில்லாத நிலையில் இதுபோன்ற அமைப்புகளில் என்ன நடக்கும் என்பதைச் சொல்லித்தான் தெரிய வேண்டுமா? தேசிய முற்போக்கு திராவிடக் கழகத்தின் வளர்ச்சிக்கு சென்னை மாநகராட்சித் தேர்தல் உதவியது என்றால், அந்தக் கட்சியை ஒரு வலுவான எதிர்க்கட்சியாக நிலைநிறுத்த இப்போதைய தேர்தல் புறக்கணிப்பு உதவும் என்பதில் என்ன சந்தேகம்? தேமுதிகவை அரவணைத்து வலுவான எதிர்க்கட்சிக் கூட்டணி அமைப்பது அல்லவா அதிமுகவின் ராஜதந்திரமாக இருந்திருக்க வேண்டும்?
தேர்தலை எதிர்கொள்ளும் தைரியம் இல்லாவிட்டால், மதிமுகவுக்கு அவர்கள் வென்ற தொண்டமுத்தூர் மற்றும் கம்பம் தொகுதிகளில் போட்டியிட்டுத் தங்கள் தொகுதிகளைத் தக்க வைத்துக் கொள்ளும் வாய்ப்பையாவது அதிமுக தந்திருக்க வேண்டும். பர்கூர் தொகுதியில் போட்டியிட்டு வென்று தனது மக்களவைத் தேர்தல் தோல்வியை ஈடுகட்ட பாமக தயாராக இருந்திருக்கும். இளையான்குடியில் கண்ணப்பன் மீண்டும் போட்டியிட்டிருந்தால் வெற்றி பெறும் வாய்ப்பு உண்டு. இதையெல்லாம் சிந்திக்காமல் புறக்கணிக்கிறோம் என்று பின்வாங்கினால், மக்கள் அதிமுகவைப் புறக்கணித்துவிட மாட்டார்களா?
தேர்தலில் போட்டியிடாமல் போனால் தொண்டர்களும் சோர்வடைந்து விடுவார்கள், மக்களும் மறந்து விடுவார்கள். தேர்தல் புறக்கணிப்பு என்பது ஒரு பொறுப்பான எதிர்க்கட்சிக்குப் பெருமை சேர்க்கும் விஷயமல்ல! அதிமுக தலைமை தனது முடிவை மறுபரிசீலனை செய்வது அந்தக் கட்சிக்கும் நல்லது, ஜனநாயகத்துக்கும் நல்லது.
நன்றி : தினமணி
ஜூலை 11 ம் தேதியுடன் முடிந்த வாரத்தில் இந்தியாவின் பணவீக்க விகிதம் மைனஸ் 1.17 ஆக உயர்ந்திருக்கிறது. இது, இதற்கு முந்தைய வாரத்தில் மைனஸ் 1.21 சதவீதமாக இருந்தது. மொத்த விற்பனை விலை அட்டவணை அடிப்படையில் கணக்கிடப்படும் இந்தியாவின் பணவீக்க விகிதம், கடந்த சில வாரங்களாகவே மைனஸ் நிலையில்தான் இருந்து வருகிறது. கடந்த வருடம் இதே காலகட்டத்தில் பணவீக்க விகிதம் 12.13 சதவீதமாக இருந்திருக்கிறது.
இந்தியாவின் மிகப்பெரிய பொதுத்துறை வங்கியான ஸ்டேட் பேங்க் ஆப் இந்தியாவில் மத்திய அரசுக்கு இருக்கும் பங்குகளை குறைத்துக்கொள்ள மத்திய அமைச்சரவையின் ஒப்புதலுக்காக மத்திய அரசு காத்திருப்பதாக நிதி செயலர் அசோக் சவுலா தெரிவித்தார். மத்திய அமைச்சரவையின் ஒப்புதலை பெற்ற பின்னரே இது குறித்த மசோதா பார்லிமென்ட்டில் சமர்ப்பிக்கப்படும் என்றார் அவர். இப்போது ஸ்டேட் பேங்க் ஆப் இந்தியாவில் மத்திய அரசுக்கு 59.41 சதவீத பங்குகள் இருக்கின்றன. அதை 55 சதவீதமாக குறைத்துக்கொள்ள இருப்பதாக தெரிகிறது. ஏற்கனவே இதுகுறித்து ஜனவரி மாதத்தில் பேசிய ஸ்டேட் பேங்க் ஆப் இந்தியாவின் சேர்மன் ஓ.பி.பாத், ஸ்டேட் பேங்க் கின் பங்குகளை விற்பதன் மூலம் 200 கோடி முதல் 400 கோடி டாலர் வரை திரட்ட முடிவு செய்திருப்பதாக சொன்னார்.
ஆபரணத் தங்கம் நேற்று சவரனுக்கு 16 ரூபாய் உயர்ந்து, 11,104 ரூபாய்க்கு விற்பனையானது. ஆபரணத் தங்கத்தின் விலை ஏறுவதும், இறங்குவதுமாக நிலையில்லாமல் இருந்தது. ஆனால், கடந்த சில நாட்களாக தங்கம், சவரன் 11 ஆயிரம் ரூபாய்க்கு விற்பனையாகி வருகிறது. கடந்த 18ம் தேதி ஒரு கிராம் ஆபரணத் தங்கம் 1,376 ரூபாய்க்கும், சவரன் 11,008க்கும் விற்றது. கடந்த 20ம் தேதி சவரனுக்கு 64 ரூபாய் வரை உயர்ந்து, சவரன் 11,080 ரூபாய்க்கு விற்பனையானது. நேற்று முன்தினம் ஒரு கிராம் 1,386 ரூபாய்க்கும், சவரன் 11,088 ரூபாய்க்கும் விற்றது. நேற்று காலை தங்கத்தின் விலையில் மாற்றம் எதுவும் இல்லை. மாலையில் சவரனுக்கு 16 ரூபாய் உயர்ந்து, 11,104 ரூபாய்க்கும், கிராம் 1,388க்கும் விற்பனையானது. கடந்த ஐந்து நாட்களில் மட்டும் சவரனுக்கு 104 ரூபாய் அதிகரித்தது குறிப்பிடத்தக்கது.
சர்வதேச சந்தையில் பத்திரங்களை வெளியிட்டு 33.5 கோடி டாலரை ( சுமார் 1,619 கோடி ரூபாய் ) திரட்ட டாடா பவர் நிறுவனம் முடிவு செய்திருக்கிறது. அதன் எதிர்கால திட்டங்களுக்காக இந்த பணம் திரட்டப்படுவதாக அந்த நிறுவனம் தெரிவித்திருக்கிறது. ஒவ்வொன்றும் 22.58 டாலர் என்ற விலையில் 1,48,38,110 குளோபல் டெபாசிடரி ரிசிப்ட்களை ( ஜிடிஆர் ) அது வெளியிடுகிறது. இதன் மொத்த தொகை 33.5 கோடி டாலர் என்று பாம்பே ஸ்டாக் எக்சேஞ்க்கு அது அளித்த அறிக்கையில் தெரிவித்திருக்கிறது. இதன் மூலம் திரட்டப்படும் பணம், ஏற்கனவே இருக்கும் அதன் மின் உற்பத்தி நிலையங்களின் முதலீட்டு செலவினங்களுக்காகவும், கட்டிக்கொண்டிருக் கும் மின் உற்பத்தி நிலையங்களுக்காகவும் செலவு செய்யப்பட இருக்கிறது. நேற்று தான் டாடா ஸ்டீல் நிறுவனம் ஜிடிஆர் மூலம் 25 கோடி டாலரை திரட்டிக்கொள்ள அதன் போர்டு அனுமதி அளித்திருந்தது. இப்போது டாடா பவர் ஜிடிஆர் மூலம் 33.5 கோடியை திரட்ட இருப்பதாக அறிவித்திருக்கிறது. ஜிடிஆர் மூலம் பணம் திரட்டப்படுவதால், அதன் மூலம் நல்ல திறமையான முதலீட்டாளர்கள் கிடைப்பார்கள் என்று சொன்ன டாடா பவர் எக்ஸிகூடிவ் டைரக்டர் ( நிதி ) எஸ்.ராமகிருஷ்ணன். ஜிடிஆர் வெளியீட்டிற்காக டாடா பவர் நிறுவனம், லக்ஸம்பர்க் பங்கு சந்தை யில் லிஸ்ட் செய்யப்பட்டிருக்கிறது.
கடந்த சில நாட்களாக பங்கு சந்தையில் இருந்த ஏற்ற நிலையால் சென்செக்ஸ் 15,000 புள்ளிகளுக்கு மேலும் நிப்டி 4,500 புள்ளிகளை ஒட்டியும் சென்றிருந்தது. பெரும்பாலான நிறுவன பங்குகளின் மதிப்பு உயர்ந்திருந்தது. இந்த சந்தர்ப்பத்தை பயன்படுத்தி லாபம் சம்பாதிக்க நினைத்த முதலீட்டாளர்கள் இன்று பங்குகளை அதிக அளவில் விற்பனை செய்ததால் பங்கு சந்தை குறியீட்டு எண்கள் இறங்கி விட்டன. கேப்பிடல் குட்ஸ், ஐ.டி.,ஆட்டோ நிறுவன பங்கு மதிப்பு சரிந்திருந்தது. ஆனால் ரியாலிட்டி பங்கு மதிப்பு கொஞ்சம் உயர்ந்திருந்தது. மும்பை பங்கு சந்தையில் இன்று வர்த்தக நேரத்தில் அதிகபட்சமாக 15,369.42 புள்ளிகள் வரையிலும் குறைந்த பட்சமாக 14,786.58 புள்ளிகள் வரையிலும் சென்றிருந்த சென்செக்ஸ், வர்த்தக முடிவில் 219.37 புள்ளிகள் ( 1.47 சதவீதம் ) குறைந்து 14,840.63 புள்ளிகளில் முடிந்திருக்கிறது. அதேபோல் தேசிய பங்கு சந்தையில் வர்த்தக நேரத்தில் அதிகபட்சமாக 4,557.95 புள்ளிகள் வரையிலும் குறைந்த பட்சமாக 4,380.45 புள்ளிகள் வரையிலும் சென்றிருந்த நிப்டி வர்த்தக முடிவில் 66.75 புள்ளிகள் ( 1.49 சதவீதம் ) குறைந்து 4,402.35 புள்ளிகளில் முடிந்திருக்கிறது. இன்று மும்பை பங்கு சந்தையில் கேப்பிடல் குட்ஸ் இன்டக்ஸ் 1.98 சதவீதமும், ஐடி இன்டக்ஸ் 1.78 சதவீதமும், ஆட்டோ இன்டக்ஸ் 1.78 சதவீதமும் இறங்கியிருந்தன. ஹெச்டிஎஃப்சி ( 5.51 % ), கிராசிம் இன்டஸ்டிரீஸ் ( 3.41 %), பெல் ( 3.38 % ), ஜெய்பிரகாஷ் அசோசியேட்ஸ் ( 2.86 % ) மற்றும் டாடா ஸ்டீல் ( 2.86 % ) ஆகிய நிறுவன பங்கு மதிப்பு குறைந்திருந்தன. ஓஎன்ஜிசி ( 4.36 % ), டிஎல்எஃப் ( 1.51 % ), ஸ்டெர்லைட் இன்டஸ்டிரீஸ் ( 0.93 % ), என்டிபிசி ( 0.72 % ), மற்றும் டாடா மோட்டார்ஸ் ( 0.29 % ) நிறுவன பங்குகள் உயர்ந்திருந்தன.
சோதனையில் இருந்து விலக்கு பெற்ற முன்னாள் ஜனாதிபதி அப்துல் கலாமை புதுடில்லி விமான நிலையத்தில், மரபை மீறி சோதனையிட்ட கான்டினென்டல் ஏர்லைன்ஸ் இன்று அவரிடம் மன்னிப்பு கோரியுள்ளது. நேற்று அது அளித்த அறிக்கையில், எங்களது சட்டதிட்டப்படி வி.ஐ.பி., என்றோ வி.வி.ஐ.பி., என்றோ பிரித்து பார்த்து சோதனையிட அனுமதி இல்லை. எனவே இது வழக்கமான நடைமுறைதான் என்று தெரிவித்திருந்தது. ஆனால் இந்த நடவடிக்கைக்கு இந்தியா முழுவதிலும் இருந்து கடும் எதிர்ப்பு கிளம்பியதாலும், மத்திய அரசு சட்ட ரீதியாக கடும் நடவடிக்கை எடுக்க இருப்பதாக அறிவித்திருந்ததாலும் இன்று அது கலாமிடம் மன்னிப்பு கோரி இருக்கிறது. இது குறித்து அந்த நிறுவனம் அளித்த அறிக்கையில், அப்துல் கலாமை சோதனையிட்டு, அவமானப் படுத்தி, அதன் மூலம் இந்திய மக்களின் மனதை புண்படுத்த வேண்டும் என்பது எங்களது நோக்கமில்லை. எனவே நாங்கள் அப்துல் கலாமிடம் மன்னிப்பு கோருகிறோம். அவர் தொடர்ந்து எங்கள் விமானத்தில் பயணம் செய்வார் என்று நம்புகிறோம் என்று தெரிவித்திருக்கிறது.
