இதோ ஒரு வழிகாட்டி!

மேற்கு வங்க மாநில ஆளுநர் கோபாலகிருஷ்ண காந்தி புவி வெப்பமடைவதைக் குறைப்பதில் நல்லதொரு வழிகாட்டியாகத் திகழ்கிறார். இதை மற்றவர்களும் குறிப்பாக சாதாரண மக்களும் பின்பற்றத் தொடங்கினால் புவியின் வெப்பத்தைக் குறைப்பதுடன் கணிசமான அளவுக்கு ரூபாயையும் மிச்சப்படுத்தலாம்.

மின் விளக்குகளை எரியவிடுவதும், மோட்டார் வாகனங்களைப் பயன்படுத்துவதும், குளிர்சாதனப் பெட்டி போன்ற குளிரூட்டும் சாதனங்களைப் பயன்படுத்துவதும் நாகரிக வாழ்க்கையின் இன்றியமையாத அம்சங்களாகக் கருதப்பட்டாலும், பூமியைச் சுற்றியுள்ள ஓசோன் படலத்தில் ஓட்டை விழுவதற்கும் அதனால் புவி வெப்பம் அடைவதற்கும் அதுதான் காரணம் என்று அறிவியலாளர்கள் இப்போது இடைவிடாமல் அரற்றிக் கொண்டிருக்கிறார்கள்.

கீழை நாடுகளைவிட மேலை நாடுகளில் உள்ளவர்கள் அறிவாளிகள், புதிய புதிய கண்டுபிடிப்புகள் மூலம் மக்கள் இனிமையாக வாழ வழி செய்கிறார்கள், அவர்களுடைய அறிவியல் கண்டுபிடிப்புகள் பகுத்தறிவின் வெளிப்பாடுகள், அதனால் மனிதகுலம் அடைந்துவரும் நன்மைகளுக்கு அளவே இல்லை என்று புளகாங்கிதம் அடையாதவர்களே கிடையாது. ஆனால் ஒவ்வொரு கண்டுபிடிப்புக்கும் இயற்கையை நாசப்படுத்தும் சக்தி இருப்பதும், அதன் விளைவாக புவியில் உள்ள தாவரங்கள், மனிதர்கள் உள்ளிட்ட அனைத்து உயிரினங்களுக்கும் பெருத்த அச்சுறுத்தல் ஏற்பட்டிருப்பதும் மெல்ல மெல்லத் தெளிவாகிக் கொண்டிருக்கிறது.

இனி இந்த முன்னேற்றங்களை ஒரேயடியாகத் தூக்கி எறிந்துவிட்டு மாட்டுவண்டி காலத்துக்கு யாராலும் போக முடியாது. ஆனால் தீமைகளின் தீவிரத்தைக் குறைக்க சில நடவடிக்கைகளை உடனே எடுத்தாக வேண்டும். அதற்கு மேற்கு வங்க ஆளுநரும் மகாத்மா காந்திஜியின் பேரனுமான கோபாலகிருஷ்ண காந்தி வழிகாட்டி வருகிறார்.

ஆளுநர் வெளியே செல்லும்போது அவருடன் பயணிக்கும் மோட்டார் வாகனங்களின் எண்ணிக்கையைக் கணிசமாகக் குறைத்துவிட்டார். ஆளுநர் மாளிகையில் தேவையற்ற மின்சார சாதனங்களை நீக்குமாறு கூறிவிட்டார். அதிக அளவு மின்சாரத்தைத் துய்ப்பதும் வெப்பத்தை வெளியிடுவதுமான மின் விளக்குகளை அகற்றிவிட்டு, சுற்றுச் சூழலுக்குக் கேடு விளைவிக்காத மின்சார விளக்குகளைப் பொருத்தச் செய்தார். அதிக எண்ணிக்கையில் இருந்த குளிரூட்டிகளைக் குறைத்துவிட்டார். சுடுநீர் பெறுவதற்காக இருந்த மின்சார சூடேற்றிகளுக்குப் பதிலாக சூரிய சக்தியில் இயங்கும் சூடேற்றிகளைப் பயன்பாட்டுக்குக் கொண்டுவந்துள்ளார். தினமும் 2 மணி நேரம் மாலை நேரத்தில் ஆளுநர் மாளிகையில் மின்சார விநியோகத்தை நிறுத்தி வைத்து மின்சாரப் பயன்பாட்டை வெகு கணிசமாகக் குறைத்திருக்கிறார்.

அவர் ஆளுநராகப் பதவியேற்றபோது 2005-06-ல் ஆளுநர் மாளிகையில் கரியமில வாயு வெளியேற்றம் 408 டன்கள் என்று கணக்கிடப்பட்டிருக்கிறது; அதுவே, அவருடைய நடவடிக்கைகளுக்குப் பிறகு 335 டன்களாக இருக்கிறது.
இது சாதாரணமான சாதனை அல்ல. ஆடம்பரம், அதிகாரத்தை வெளிக்காட்டும் அனாவசியப் பகட்டு ஆகியவற்றைக் குறைத்துக் கொண்டாலே செலவும் குறையும், புவி வெப்பமடைவதும் கணிசமாகத் தணியும் என்பது இந்த உதாரணத்திலிருந்து அறிய முடிகிறது.

அரசு அலுவலகங்கள், பள்ளிக்கூடங்கள், கல்லூரிகள், விடுதிகள், ஆலயங்கள், திருமண மண்டபங்கள், வங்கிகள், அரசுத்துறை நிறுவனங்கள், ரயில் நிலையங்கள், பஸ் நிலையங்கள் போன்ற இடங்களில் அந்தந்த இடங்களுக்குப் பொறுப்பான தலைமை நிர்வாகி முதல் கடைநிலை ஊழியர் வரை அனைவருமே உறுதி எடுத்துக் கொண்டு மின்சாரத்தைச் சேமிக்க நடவடிக்கைகளைத் தொடங்கினால் மின்சார விரயம் கணிசமாகக் குறையும். அதனால் தொழில்துறைப்பயன்பாடு, விவசாயத் தேவை போன்றவற்றுக்கு மின்சார வாரியத்தால் கூடுதல் மின்சாரத்தை அளிக்க முடியும்.

தமிழ்நாட்டின் அனைத்துப் பகுதிகளிலும் பஸ் போக்குவரத்தைச் சீர்படுத்தி பெரிய பஸ், மினி பஸ் ஆகியவற்றை எந்த நேரமும் இயக்குவதை உறுதி செய்தால் சொந்தமாக 2 சக்கர வாகனங்களை வாங்க வேண்டிய தேவை நடுத்தர வர்க்கத்தைச் சேர்ந்தவர்களுக்கு அறவே ஏற்படாது.

இதனால் பெட்ரோல் பயன்பாடு கணிசமாகக் குறைந்து நம் நாட்டுக்கு மிகவும் தேவைப்படும் அரிய அன்னியச் செலாவணி கோடிக்கணக்கில் மிச்சப்படும். மின்சார ஸ்கூட்டர்களின் விற்பனையை ஊக்குவிக்க அவற்றுக்கு வரிச்சலுகை, எளிய கடன் வசதி போன்றவற்றை அளித்து மோட்டார் வாகனத்துறையில் தேவையற்ற பெட்ரோல், டீசல் வண்டிகளின் எண்ணிக்கையைக் குறைக்க அரசு உதவலாம்.

வீடுகளிலும் கிணறுகளில் தண்ணீர் இறைக்கப்பயன்படும் மின்சார மோட்டார், மிக்ஸி, கிரைண்டர், ஏ.சி., தரையைப் பெருக்க வாக்குவம்-கிளீனர் போன்ற சாதனங்களின் பயன்பாட்டை குறைத்துக் கொண்டால் மின்சாரம் கணிசமாக மிச்சப்படும். சூரிய சக்தியால் இயங்கும் சாதனங்களை படிப்படியாக புழக்கத்துக்குக் கொண்டுவந்தால் மின்சாரம் வெகுவாக மிச்சப்படும். சிறுதுளிதானே பெரு வெள்ளமாகிறது.
நன்றி : தினமணி

அதிக வரி செலுத்துவதில் சச்சின் நெம்பர் 1

இந்திய கிரிக்கெட் வீரர்களில், அதிக வரி செலுத்துபவர்களில், பிரபல கிரிக்கெட் வீரர் சச்சின் டெண்டுல்கர் முதலிடத்தில் உள்ளார். தற்போது அதிகளவிலான விளம்பரங்களில் தோனி தோன்றினாலும், அதிகளவு வரி செலுத்துபவர்கள் பட்டியலில், சச்சின் டெண்டுல்கரே முதலிடம் வகிக்கிறார். இவரைத் தொடர்ந்து, தோனி இரண்டாமிடமும், சேவக் மூன்றாமிடமும், யுவராஜ் சிங் நான்காமிடமும் பெற்றுள்ளதாக, வருமான வரித்துறை தகவல்கள் தெரிவிக்கின்றன. இது குறித்து வருமான வரித்துறை தகவலில் கூறப்பட்டுள்ளதாவது: கடந்த 2006-07ம் ஆண்டு முதல் 2008-09ம் ஆண்டு வரையிலான மூன்று ஆண்டுகளில், ஒவ்வொரு ஆண்டும் எட்டு கோடி ரூபாய்க்கு மேல் வரி செலுத்தி உள்ளார் சச்சின். இவர், 2007-08ம் ஆண்டு, 8.7 கோடி ரூபாயும், 2008-09ம் ஆண்டு 8.1 கோடி ரூபாயும் வரி செலுத்தி உள்ளார்.
அதே போல், 2006-07ம் ஆண்டு மூன்றாமிடத்தில் இருந்த தோனி, கடந்தாண்டு 4.7 கோடி ரூபாய் செலுத்தியதன் மூலம், அதிக வரி செலுத்துபவர்கள் பட்டியலில் இரண்டாமிடம் பெற்றுள்ளார். ஆனால், 2007-08ம் ஆண்டு மூன்றாமிடத்தில் இருந்து ராகுல் டிராவிட், ஐந்தாமிடத்திற்கு தள்ளப்பட்டுள்ளார்.
இவ்வாறு அந்த தகவல்கள் தெரிவிக்கின்றன.

நன்றி : தினமலர்

இந்தியாவின் வல்லரசுக் கனவு...

இந்தியாவின் மக்கள் தொகை 112 கோடியைத் தாண்டி பெருகிக் கொண்டே இருக்கிறது. அத்தனை பேருக்கும் உணவளிக்க வேண்டிய விவசாயத் துறை நாளுக்கு நாள் குறுகிக் கொண்டே போகிறது என்பதுதான் அதிர்ச்சி தரும் செய்தி.

முன்பு, பெரிய முதலீடு இல்லாமல் விவசாயம் செய்த நம் முன்னோர்கள், இன்று பசுமைப் புரட்சி விவசாயத்தால் பெரிய அளவில் மூலதனம் போட்டு செய்ய வேண்டிய தொழிலாகிவிட்டது விவசாயம். அதனால், லாபமில்லாத தொழிலாக மாறிவிட்ட விவசாயத்தின் மீது நம்பிக்கை இழந்த கிராமவாசிகள், விவசாயத்தை விட்டு நகரத்தை நோக்கிச் சென்ற வண்ணம் உள்ளனர்.
தமிழ்நாட்டில் ஒட்டுமொத்த நிலப்பரப்பு சுமார் 130 லட்சம் ஹெக்டேர். இதில், நீர்ப்பாசன வசதி இருப்பதாகக் கருதப்படுகிற நிலம் 33 லட்சம் ஹெக்டேர்தான். நீர்ப் பாசன வசதியற்ற, வானம்பார்த்த பூமியாக இருக்கும் நிலப்பரப்பு சுமார் 37 லட்சம் ஹெக்டேராகும்.

அதாவது, மொத்த நிலப்பரப்பான 130 ஹெக்டேரில் சுமார் 70 லட்சம் ஹெக்டேர்தான் விவசாயத்திற்குப் பயன்படுகிறது. ஆனால், கடந்த 20 ஆண்டுகளுக்கு முன்பு சுமார் 90 லட்சம் ஹெக்டேர் நிலம் விவசாயத்திற்கு பயன்படுத்தப்பட்டுள்ளது.

இதில் வேதனையான விஷயம் என்னவென்றால் உணவு தானியங்களைப் பயிர் செய்தால் அதிக நஷ்டம் வருகிறது என்பதால் விவசாயிகளுக்கு உணவு தானியமற்ற பணப்பயிர் என்று சொல்லக்கூடிய விவசாய உற்பத்திப் பொருள்களின் மீது நாட்டம் ஏற்பட்டுள்ளது.

1970-ம் ஆண்டு வரையிலும்கூட சுமார் 25 சத நிலங்கள்தான் இப்படி உணவு தானியமற்ற மற்றவற்றை உற்பத்தி செய்யும் நிலங்களாக இருந்தன. இப்போது சுமார் 45 சதமாக இது மாறிய அதேவேளையில், உணவு தானிய உற்பத்தியில் இருந்த விவசாய நிலங்கள் மூன்றில் இரண்டு பங்காகக் குறைந்து விட்டன.

காரணம், நாட்டின் தேவைக்கு ஏற்ப உணவு உற்பத்தியைப் பெருக்குகிறோம் என்று கூறி வீரிய விதைகள், மலட்டு விதை போன்றவற்றைப் பயன்படுத்தி, குறைந்த நிலத்தில் நிறைந்த விவசாயம் செய்தல் போன்ற இயற்கைக்கு மாறான செயல்பாட்டால், இன்று விளைநிலங்கள் எல்லாம் பாழ்பட்டுள்ளன. ரசாயன உரங்கள், பூச்சிக்கொல்லி மருந்துகள் போன்றவற்றால் விவசாய செலவு அதிகரித்ததே தவிர, விவசாயத்தால் லாபம் கிடைத்ததாகத் தெரியவில்லை என்கிறார்கள் விவசாயிகள்.

கிராமப்புறங்களில் விவசாயத்திற்குத் தேவையான நீர் ஆதாரம் இல்லாதது, பற்றாக்குறையான மின்சாரம், அனைத்து கிராமத்திலும் மும்முனை மின்சாரம் இல்லாதது போன்ற காரணங்களால் இன்று விவசாயம் சுருங்கி, பல கிராமங்களில் விவசாயம் இல்லாமல் விளை நிலங்கள் வெறிச்சோடிக்கிடக்கின்றன. விவசாயத்திற்கு மானியம் வழங்குகிறோம் என்ற பெயரில் விவசாயிகளை அரசின் கொத்தடிமைக் கடன்காரர்களாக மாற்றியதும் அரசின் இன்னொரு சாதனை.

விவசாய விளைபொருளுக்கு போதிய விலை நிர்ணயம் இல்லாததால், ரூ. 10 ஆயிரம் முதலீட்டில் அறுவடை செய்யப்படும் ஒரு விளைபொருள், சந்தையில் வெறும் ரூ. 4 ஆயிரத்துக்கு விற்கப்பட்டால் எப்படி விவசாயம் லாபகரமாக இருக்கும்? எந்த விவசாயிதான் தொடர்ந்து நஷ்டத்திற்கு ஒரு தொழில் செய்ய முடியும்? ஒவ்வொரு சாகுபடியின்போதும் இந்நிலை நீடிப்பதால், சூதாட்டத்தில் என்றாவது ஒரு நாள் ஜெயித்து லாபம் கிடைக்கும் என்ற நிலைக்கு விவசாயிகள் தள்ளப்பட்டுள்ளனர்.

விவசாயிகளுக்கு சலுகை என்ற பெயரில் மாறி, மாறி கடன் கொடுத்து அவர்களை கடைசிவரை கடன்காரர்களாக அசிங்கப்படுத்துவதைவிட, விவசாய விளைபொருள்களுக்கு போதிய விலை நிர்ணயம் கிடைக்கச் செய்தாலே விவசாயிகள் லாபமடைவார்கள். நாட்டில் விவசாயத் தொழில் செழித்தோங்கும். விவசாயிகள் கூனிக்குறுகி மற்றவர்களிடம் கையேந்தி நிற்காமல் கெüரவமாக இருப்பார்கள்.

உரம் தயாரிக்க முன்வரும் நிறுவனங்களுக்கு ரூ. 1.25 கோடி மானியம் வழங்கப்படும் என அரசு அறிவித்துள்ளது. இது வரவேற்கக்தக்கது என்றாலும், இதன் மூலம் விவசாயமோ, விவசாயிகளோ பயனடைவதைவிட ஒரு சில நிறுவனங்களும் அதன் உரிமையாளர்களுமே பயனடைவார்கள் என்பது தான் உண்மை.

இந்நிலையில், இந்த மானியத்தை நேரடியாக விவசாயிகளுக்கு வழங்கினால் அவர்கள் தனியாக இயற்கை உரம் மற்றும் செயற்கை உரங்களைப் பெற உதவியாக இருக்கும். விவசாயிகள் முழுமையாகப் பயனடைவார்கள். முதலாளி வர்க்கங்களை காப்பாற்றக் காட்டும் ஆர்வத்தில் 50 சதம்கூட விவசாய மற்றும் நடுத்தர மக்களைக் காப்பாற்ற அரசு முன் வருவதில்லை. மேலும் அவர்களை நசுக்கி வருகிறது என்றே கூறலாம்.

விவசாயத்தைப் பெருக்க ஆக்கப்பூர்வமான, நடைமுறைக்கு சாத்தியப்படும் நிலைகளை உருவாக்கி, கிராமப்புறங்களில் விவசாயம் செழிக்க வைக்க, விவசாய விளைபொருள்களுக்கு அரசு உரிய விலை நிர்ணயம் செய்து ஊக்கப்படுத்த வேண்டும். இல்லாவிட்டால் இந்தியா வல்லரசாகும் என்பது வெறும் கனவாகப் போய்விடும்.

கட்டுரையாளர் :என். கணபதி

நன்றி : தினமணி

கம்பெனிகளின் காலாண்டு முடிவால் தொடர்கிறது பங்குச் சந்தை ஏற்றம்

சிறப்பான காலாண்டு முடிவுகள் தான் சந்தை நிலவரத்தை நிர்ணயிக்கின்றன. வியாழனும், வெள்ளியும் சந்தையில் மின்னியதற்கு காரணம் காலாண்டு முடிவுகள் தான். பெரிய சாப்ட்வேர் கம்பெனிகள் அனைத்தும் நல்ல காலாண்டு முடிவுகளைத் தருவது தொடர்கிறது. டாலருக்கு எதிரான ரூபாயின் மதிப்பும் சிறிது நாட்களாக 48 அளவிலேயே நிற்பதும், சாப்ட்வேர் கம்பெனிகளுக்கு ஒரு சாதகமான அம்சம். ஆதலால், சந்தை வியாழனன்று மும்பை பங்குச் சந்தை 219 புள்ளிகள் மேலே சென்று முடிவடைந்தது.
வெள்ளியன்று காலையில் சிறிது டல்லாக இருந்த பங்குச் சந்தை மதியத்திற்கு மேலே சென்றது. ஆட்டோ, கட்டுமானத்துறை, மெட்டல் ஆகிய துறைப் பங்குகள் மேலே சென்றன. குறிப்பாக ஆட்டோ பங்குகள் பறந்தன; வங்கிப் பங்குகள் கீழே சரிந்தன.
ஏன் சரிந்தது? : அடுத்த வாரம் ரிசர்வ் வங்கியின் காலாண்டு மானிடரி பாலிசி அறிவிப்புகள் வருகின்றன; ஆதலால் தானா? வெள்ளியன்று இறுதியாக மும்பை பங்குச் சந்தை 148 புள்ளிகள் கூடி 15,378 புள்ளிகளுடனும், தேசிய பங்குச் சந்தை 44 புள்ளிகள் கூடி 4,568 புள்ளிகளுடனும் முடிவடைந்தது. சந்தை மறுபடி ஜம்மென 15 ஆயிரத்தைத் தாண்டி சென்றிருக்கிறது.
புதிய வெளியீடுகள்: சமீபத்திய மகிந்த்ரா ஹாலிடே ரிசார்ட் புதிய வெளியீடு ஒன்பது தடவைகளுக்கு மேல் செலுத்தப் பட்டது ஞாபகமிருக்கலாம். அந்த கம்பெனியின் பங்குகள் சென்ற வாரம் பட்டியலிடப்பட்ட பிறகு 30 சதவீதம் கூடியுள்ளது. இது மற்ற கம்பெனிகளுக்கு மகிழ்ச்சி அளிக்கும் விஷயம். வைத்திருப்பவர்களுக்கு இதுவரை 30 சதவீதம் லாபம் கிடைத்துள்ளது. ராஜ் ஆயில் மில் வெளியீடு முடிவு தேதி அன்று முழுதாகச் செலுத்தப்பட்டது. சிறிய முதலீட்டாளர்கள் பகுதி ஒரு தடவைக்கும் கீழாகத்தான் செலுத்தப்பட்டிருந்தது. இருந்தாலும், எண்ணெய் விலை கூடி வருவதால் பட்டியலிடப்படும் போது பிரிமியத்தில் பட்டியலிப்படலாம் என்று கூறப்படுகிறது. அடுத்த வாரம் அதானி பவர் வருகிறது. பெரிய வெளியீடாக இருப்பதால் எப்படி செலுத்தப்படுகிறது என்பது மிகவும் முக்கியமான விஷயம்.
ஒரே மார்க்கெட் பிரிமியம்: கொஞ்ச நாளாக புதிய வெளியீடுகளுக்கான க்ரே மார்க்கெட் பிரிமியம் இல்லாமல் இருந்தது. தற்போது மறுபடி தலைதூக்க ஆரம்பித்துள்ளது. வரவிருக்கிற அதானி பவருக்கு 8 முதல் 12 ரூபாய் வரையும், என்.எச்.பி.சி., வெளியீட்டிற்கு 11 முதல் 13 ரூபாய் வரையும் பிரிமியம் இருப்பதாகக் கூறப்படுகிறது.
பணவீக்கம்: சென்ற வார பணவீக்கம் மைனஸ் 1.21 சதவீதமாக இருந்தது. அது 0.04 சதவீதம் குறைந்து மைனஸ் 1.17 சதவீதமாக உள்ளது. பொருட்களின் விலை 100 சதவீதத்திற்கு மேலே கூடியுள்ளது. ஆனால், பணவீக்கம் அசைவதாக இல்லை.
கூடி வரும் நேர்முக வரிகள்: இந்த வருடத்தின் முதல் காலாண்டு முடிவில் நேர்முக வரி கலெக்ஷன் 3.65 சதவீதம், சென்ற வருடம் இதே காலாண்டை விடக் கூடியுள்ளது ஒரு நல்ல அறிகுறி.
காலாண்டு முடிவுகள்: விப்ரோ சென்ற வருடம் இதே காலாண்டை விட 12 சதவீதம் அதிகமாக லாபம் ஈட்டியுள்ளது. இது தவிர ஹெச்.டி.எப்.சி., கனரா வங்கி, மாருதி, ஐ.டி.சி., மாரிகோ, பார்தி டெலிகாம் ஆகிய கம்பெனிகளும் நல்ல காலாண்டு முடிவுகளைத் தந்துள்ளன. செலவுகளைக் கட்டுப்படுத்தினால் சேமிக்க முடியும் என்பதற்கு கம்பெனிகளின் இந்த காலாண்டு முடிவுகள் ஒரு எடுத்துக்காட்டு. இது கம்பெனிகளுக்கும் பொருந் தும்; வீட்டுக்கும் பொருந்தும். கம்பெனிகளே செலவுகளைக் கட்டுப்படுத்தும் போது, வீட்டிலும் கட்டுப்படுத்தி இன்னும் சேமிக்கலாம் அல்லவா? செய்ய ஆரம்பியுங்கள்.
வெளிநாடு முதலீட்டு நிறுவனங்கள்: வெளிநாடு முதலீட்டு நிறுவனங்கள் பங்குகளை வாங்குவது மறுபடி அதிகரித்துள்ளது, பங்குச் சந்தை கூடுவதற்கு ஒரு காரணம்; இது தொடருமென எதிர்பார்க்கப் படுகிறது. ஏனெனில், உலகளவில் அவர்கள் வருமானங்கள் பார்ப்பதற்கு இந்தியா ஒரு நல்ல சந்தை.
அடுத்த வாரம் எப்படி இருக்கும்? : உலகளவில் பங்குச் சந்தைகளின் ஏற்றம், நல்ல காலாண்டு முடிவுகள் போன்றவை சந்தையை தூக்கிச் சென்றிருக்கின்றன. மேலும், சந்தையை 15 ஆயிரம் புள்ளியில் நிறுத்தியும் வைத்திருக்கின்றன. சந்தையின் ஏற்றம் தொடரும்.
-சேதுராமன் சாத்தப்பன்

நன்றி : தினமலர்

ஆர்டர் செய்த போயிங் விமானங்களை ஏர் - இந்தியா வாங்கப்போகிறதா ?

கடும் நிதி நெருக்கடியால் ஊழியர்களுக்கான சம்பளத்தை தாமதமாக கொடுப்பது, விமான ரூட்களை குறைப்பது, கடைசியாக மத்திய அரசிடம் இருந்து நிதி உதவி கேட்கும் நிலை வரை போயிருக்கும் ஏர் - இந்தியா, உடனடியாக அதன் செலவினங்களில் இருந்து 12 பில்லியன் டாலர்களை ( சுமார் 57,600 கோடி ரூபாய் ) மிச்சப்படுத்த வேண்டியதிருக்கிறது. எனவே அது ஆர்டர் செய்து இன்னும் வாங்காமல் இருக்கும் 68 போயிங் விமானங்களை வாங்குவதா வேண்டாமா என்ற கடும் குழப்பத்தில் ஏர் - இந்தியா இருக்கிறது. விமான போக்குவரத்து துறை வரலாற்றில் இதுவரை வேறு எந்த நிறுவனமும் கொடுத்திருந்த ஆர்டரை ஏர் - இந்தியா, போயிங் நிறுவனத்திடம் கொடுத்திருந்தது. ஆனால் அந்த ஆர்டரை கேன்சல் செய்வதா, அல்லது பெற்றுக் கொள்வதை தாமதப்படுத்தலாமா அல்லது பெற்றுக்கொண்டு விடுவதுதானா என்று இன்னும் ஏர் - இந்தியா முடிவு செய்யவில்லை என்று தெரிகிறது. இது குறித்து போயிங் இந்தியாவின் தலைவர் தினேஷ் கேஸ்கர் தெரிவிக்கையில், ஏர் - இந்தியா கொடுத்திருக்கும் ஆர்டர் குறித்து இதுவரை எங்களிடம் எதுவும் தெரிவிக்கவில்லை. எனவே அவர்கள் எங்களது மிகப்பெரிய வாடிக்கையாளராகத்தான் இன்னமும் இருக்கிறார்கள் என்றார். அவர் மேலும் தெரிவிக்கையில், இந்தியாவின் மொத்த உள்நாட்டு உற்பத்தி திருப்தி அளிக்கும் வகையில் இருப்பதால் இந்திய பொருளாதாரம் வளர்ந்து வருவதைத்தான் அது காட்டுகிறது. எனவே இன்னும் 20 ஆண்டுகளில் இந்தியாவுக்கு 100 பில்லியன் டாலர் ( சுமார் 4,80,000 கோடி ரூபாய் ) மதிப்புள்ள 1,000 விமானங்கள் தேவைப்படும் என்றார். இப்போது சிக்கலில் இருக்கும் இந்திய விமான போக்குவரத்து துறை இன்னும் ஒன்பது அல்லது ஒரு வருட காலத்திற்குள் சரியாகிவிடும் என்றார் கேஸ்கர். ஏர் - இந்தியா தவிர, இந்தியாவின் மிகப்பெரிய தனியார் விமான கம்பெனியான ஜெட் ஏர்வேஸ் 7 போயிங் விமானங்களுக்கு ஆர்டர் செய்திருந்தது. ஆனால் அதை பெற்றுக்கொள்வதை தள்ளிப்போட்டிருக்கிறது.

நன்றி : தினமலர்

எங்கே போய் முடியுமோ?

மக்களவைப் பொதுத் தேர்தலில் மகத்தான வெற்றி பெற்று ஆட்சியில் அமர்ந்த ஐக்கிய முற்போக்குக் கூட்டணி சமீபகாலமாக எதிர்பாராத சிக்கல்களில் சிக்கித் தவிப்பதைப் பார்த்தால், எந்தவித முன்யோசனையோ, ராஜதந்திர அணுகுமுறையோ இல்லாமல், தூண்டிலில் சிக்கும் மீனாக இந்தியா மாட்டிக் கொள்கிறதோ என்று சந்தேகிக்க வேண்டி இருக்கிறது. வெளிவிவகாரத்துறை அடுத்தடுத்து குளறுபடிகளைச் செய்வது கவலையைத் தருகிறது.

சர்வதேச அரங்கில் இந்தியாவுக்கென்று தனி மரியாதையை ஏற்படுத்தித் தந்தார் பண்டித ஜவாஹர்லால் நேரு. வளரும் நாடாகவே இருந்தாலும் சர்வதேச அரங்கில் இந்தியாவின் கருத்து என்ன என்று மேற்கத்திய நாடுகளாலும் ஆப்பிரிக்க, ஆசிய நாடுகளாலும் அக்கறையுடன் கவனிக்கப்பட்ட காலம் ஒன்று உண்டு. அமெரிக்கா தலைமையிலான மேற்கத்திய நாடுகள் ஒரு அணியாகவும் சோவியத் யூனியன் தலைமையிலான சமதர்ம நாடுகள் மற்றொரு அணியாகவும் பிரிந்தபோது, இரு அணிகளையும் சாராத புதிய அணியை (அணி சாரா நாடுகள் அணி) ஏற்படுத்தி அதற்குத் தலைமையேற்கும் தகுதியை இந்தியாவுக்கு ஏற்படுத்தித் தந்தார் பண்டித நேரு.

நேருஜியின் இந்தப் பாரம்பரியத்தை லால் பகதூர் சாஸ்திரி, இந்திரா காந்தி உள்ளிட்டோரும் காப்பாற்றி வந்தனர். இப்போது முதலாளித்துவ நாடுகள் வரிசையும் சோஷலிச நாடுகளின் வரிசையும் கலைந்துவிட்டதால் அணிசாரா நாடுகளின் வரிசைக்கு நியாயமாகக் கிடைத்திருக்க வேண்டிய முக்கியத்துவம் இல்லாமல் போய்விட்டது. பயங்கரவாதிகளை ஊக்குவித்து எப்போதும் நமக்கு பிரச்னைகளை ஏற்படுத்துவதையே கடமையாகக் கருதிச் செயல்படும் பாகிஸ்தானுடன் சமாதானம் பேசினால்கூட ஆபத்தில்தான்போய் முடியும் என்றால் என்ன சொல்வது?

எகிப்தில் நடந்த இந்திய - பாகிஸ்தான் பிரதமர்களுக்கு இடையிலான சந்திப்புக்குப் பிறகு வெளியிட்ட அறிக்கையை இந்திய அதிகாரிகள் சரியாகப் படித்துப்பார்க்காமல் ஒப்புதல் தந்தது எப்படி? இப்போது இதை ""வெறும் காகிதம்தான், சட்டபூர்வ ஆவணம் இல்லை'' என்கிறார் வெளியுறவுத்துறை இணை அமைச்சர் சசி தரூர். அவருடைய விளக்கத்தைக் கேட்டு அழுவதா, சிரிப்பதா என்று தெரியவில்லை.

பாகிஸ்தானில் லாகூர் நகரில் இலங்கை கிரிக்கெட் வீரர்கள் பயங்கரவாதிகளால் தாக்கப்பட்டது, போலீஸ் அகாதெமி தாக்கப்பட்டது ஆகிய இரு சம்பவங்களின் பின்னணியிலும் இந்திய அரசுக்குப் பங்கு இருக்கிறது என்று இப்போது நாகூசாமல் கூற ஆரம்பித்திருக்கிறார்கள் பாகிஸ்தானியர்கள். போதாக்குறைக்கு பலுசிஸ்தானில் பாகிஸ்தான் அரசுக்கு எதிராக நடைபெறும் ஆயுதக் கலவரங்களின் பின்னணியிலும் இந்திய அரசின் உளவுத்துறை ("ரா') இருப்பதாகக் குற்றம் சாட்டுகிறார்கள். கூட்டறிக்கையிலேயே, ""பலுசிஸ்தான் குறித்து இருதரப்பும் ஆழ்ந்து கவலைப்படுவதாக'' ஒரு வரியைச் சேர்த்திருக்கிறார்கள்! எத்தனை விஷமமான வார்த்தை இது? இதை எப்படி இந்திய அதிகாரிகள் அனுமதித்தார்கள்?

அமெரிக்க அரசுடன் செய்துகொண்ட அணுசக்தி ஒத்துழைப்பு ஒப்பந்தத்தை இந்திய ராஜதந்திரத்துக்குக் கிடைத்த மாபெரும் வெற்றி என்று கூறி, சில மாதங்களுக்கு முன்னால் நாடாளுமன்றத்திலும் வெளியிலும் காங்கிரஸ் தலைவர்கள் ஆர்ப்பரித்தார்கள். உலகின் பிற நாடுகள் எல்லாம், ""இந்தியாவுக்கு மட்டும் சலுகையா?'' என்று பொறாமையுடன் கேட்பதாகக்கூட பெருமைப்பட்டுக்கொண்டார்கள். இப்போதோ அணு ஆயுதப் பரவல் தடைச் சட்டத்தில் (என்.பி.டி.) கையெழுத்திட்டால் மட்டுமே அணுசக்தி தொடர்பான நடவடிக்கைகளில் இனி ஒத்துழைப்பு என்று அமெரிக்கர்கள் நம் கழுத்தில் சுருக்கு மாட்டிவிட்டார்கள்.

இந்தியாவுக்கு வந்தார் அமெரிக்க வெளிவிவகார அமைச்சர் ஹிலாரி கிளின்டன். இந்தியாவில் ஐந்து நாள்கள் சுற்றுப்பயணம் மேற்கொண்ட ஹிலாரி கிளின்டன் நமது வெளியுறவு அமைச்சருடன் செலவிட்டது வெறும் ஒரு மணி நேரம் மட்டுமே. அதுவும் இந்திய அமெரிக்க அணுசக்தி ஒப்பந்தம் பற்றி மட்டும்தான் பேசினார் என்று தெரிகிறது. ஜி - 8 மாநாடு அணு ஆயுதப் பரவல் தடைச் சட்டத்தில் கையெழுத்தால் மட்டுமே ஒத்துழைப்பு என்று கூறுகிறதே என்று பத்திரிகையாளர்கள் கேட்டதற்கு மழுப்பலாக ஒரு பதிலைத் தந்து தப்பித்துக் கொண்டிருக்கிறார் ஹிலாரி.

எதை எதையோ சொல்லி, நம்மை நம்ப வைத்து வகையாக மாட்டி விட்டார்கள். நீங்கள் வல்லரசாக மாறுவது இருக்கட்டும். முதலில் அணிசாராக் கொள்கையைக் கைவிட்டுவிட்டு எங்களுக்கு அடிமை சாசனம் எழுதித் தாருங்கள் என்று சொல்லாமல் சொல்கிறது அமெரிக்கா. நம்பி மோசம் போனோம் என்று ஒத்துக்கொள்ளவும் முடியாமல், தவறைத் திருத்தும் தைரியமும் இல்லாமல் தவிக்கிறோமே, இது எங்கே போய் முடியுமோ தெரியவில்லையே!
நன்றி : தினமணி

இந்தியாவில் நாள் ஒன்றுக்கு ஒரு ஜாகுவார் மற்றும் லேண்ட்ரோவர் கார் விற்பனை ஆகிறது

ஜூன் 28ம் தேதி இந்தியாவின் விற்பனைக்கு வந்த டாடா மோட்டார்ஸின் சொகுசு கார்களான ஜாகுவார் மற்றும் லேண்ட் ரோவர், நாள் ஒன்றுக்கு ஒரு கார் வீதம் விற்பனை ஆவதாக தெரிவித்திருக் கிறது. இந்த இரு மாடல்களிலும் இதுவரை 15 கார்களை, தெற்கு மும்பை வொர்லியில் இருக்கும் ஷோரூமிலும், 12 கார்களை தானேயில் இருக்கும் ஷோரூமிலும் விற்பனை செய்திருக்கிறது. இந்தியாவில் விற்பனைக்காக கொண்டு வந்திருக்கும் லேண்ட்ரோவர் கார்கள் ஒவ்வொன்றும் ரூ.63 லட்சத்தில் இருந்து ரூ.89 லட்சம் வரை விலையில் இருக்கின்றன. ஜாகுவார் கார்கள் ரூ.63 லட்சத்தில் இருந்து ரூ.92 லட்சம் வரை விலையில் இருக்கின்றன. எல்லாம் மும்பையில் எக்ஸ் - ஷோ ரூம் விலை. சந்தை நிபுணர்களின் எதிர்பார்ப்பையும் மீறி இவ்வளவு கார்கள் விற்பனை ஆகி இருப்பது டாடா மோட்டார்ஸூக்கு திருப்தி அளித்திருக்கிறது. டாடா மோட்டார்ஸ் இதுவரை மொத்தம் 27 சொகுசு கார்களை விற்பனை செய்திருக்கும் நிலையில், அதன் போட்டி நிறுவனமான ஜெர்மனியின் போர்சி, மாதத்திற்கு 10 முதல் 13 கார்களைத் தான் ( அதுவும் ரூ.65 லட்சத்திற்கு மேல் விலையில் இருப்பவை ) இங்கு விற்பனை செய்கிறது. ரூ.80 லட்சம் விலையில் இருக்கும் ஜெர்மனியின் மெர்சிடஸ் பென்ஸ் கார்கள் இங்கு மாதத்திற்கு 10 க்கும் குறைவாகத்தான் விற்பனை ஆகிறது. ஆனால் பிஎம்டபிள்யூவின் 7 சீரியஸ் மற்றும் மெர்சிடஸ் பென்ஸின் எஸ் கிளாஸ் கார்கள் மாதத்திற்கு 30 முதல் 40 வரை இங்கு விற்பனை ஆகிறது.

நன்றி : தினமலர்