நாய், பூனைகளுக்கு பிரத்யேக விமான சேவை : அமெரிக்காவில் துவக்கப்பட்டது

இப்போது உள்ள பொருளாதார சீரழிவில், மனிதர்களை ஏற்றி செல்லும் விமான சேவையே கடும் சிக்கலில் இருக்கும்போது, அமெரிக்காவில் நாய் பூனைகளுக்காக தனியாக விமான சேவை துவங்கப்பட்டிருக்கிறது. 'பெட் ஏர்வேஸ்' என்ற பெயரில் துவங்கப்பட்டிருக்கும் இந்த புதிய விமான சேவை செவ்வாய் அன்று நியுயார்க்கில் துவங்கப்பட்டது. இந்த விமானம் வாஷிங்டன், சிகாகோ, டென்வர் மற்றும் லாஸ் ஏஞ்சல்ஸ் நகரங்களுக்கு செல்லும்.செல்லப்பிராணிகளுக்காக பிரத்யேகமாக துவங்கப்பட்ட இந்த விமான சேவை முதலில் நாய் மற்றும் பூனைகளை மட்டுமே ஏற்றி செல்லும் என்று அந்த நிறுவனம் அறிவித்திருக்கிறது. பொதுவாக எல்லா நாடுகளிலுமே பயணிகள் விமானங்களில் நமது செல்லப்பிராணிகளை ஏற்றுவது இல்லை. அவைகளை கார்கோவில் தான் ஏற்றி கொண்டு செல்ல வேண்டும். கார்கோவுக்கான இடம் விமானங்களின் அடிப்பாகத்தில் அமைந்திருப்பதால் அந்த இடம் ஒன்று அதிக வெப்பமாக இருக்கும். அல்லது அதிக குளிராக இருக்கும். இந்த சூழ்நிலை செல்லப்பிராணிகளுக்கு ஒத்துக்கொள்வதில்லை. எனவே அவைகளில் சில கடுமையான பாதிப்பிற்குள்ளாவதுண்டு. சில விமான கம்பெனிகள் மட்டும், நமது இருக்கைகளுக்கு கீழே வைத்துக்கொள்ளக்கூடிய வகையில் இருக்கும் சிறிய பிராணிகளை மட்டும் கொண்டு செல்ல அனுமதிக்கின்றன. இதனை கருத்தில் கொண்டு தான் அமெரிக்காவில் செல்லப்பிராணிகளான நாய் மற்றும் பூனைகளுக்காக பிரத்யேக விமான சேவையை அல்சா பின்டர் மற்றும் டான் வீசல் என்பவர்களால் துவங்கப்பட்டிருக்கிறது. இந்த விமான சேவைக்கு அங்கு பெரும் வரவேற்பு கிடைத்திருக்கிறது. இன்னும் மூன்று மாதங்களுக்கு விமானம் புக் ஆகி விட்டது என்கிறார் விமான கம்பெனி அதிகாரிகளில் ஒருவரான அய் தோக்னோட்டி. இப்போது ஒரு சில நகரங்களுக்கு மட்டுமே இயக்கப்படும் இந்த விமான சேவை இன்னும் இரு வருடங்களில் 25 நகரங்களுக்கு விரிவு படுத்தப்படுகிறது. இந்த விஷேச விமானத்தில் இருக்கைகளுக்கு பதிலாக ஷெல்ஃப் கள் தான் இருக்கும். அவைகளில், கூண்டுகளில் அடைக்கப்பட்ட செல்லப்பிராணிகள் வைக்கப்பட்டிருக்கும். இந்த விமானத்தில் பைலட் மற்றும் சிப்பந்திகள் மட்டுமே மனிதர்களாக இருப்பார்கள். சிப்பந்திகளும் கூட, பிராணிகளுடன் அன்பாக பழக கூடியவர்களாக இருப்பார்கள். ஒரு நகரத்தில் இருந்து இன்னொரு நகரத்திற்கு செல்லப்பிராணிகளை அனுப்ப டிக்கெட் கட்டணம் 149 டாலரில் ( சுமார் 7,150 ரூபாய் ) இருந்து துவங்குகிறது.

நன்றி : தினமலர்

மீண்டும் உயர்ந்தது பங்கு சந்தை

சர்வதேச அளவில் பங்கு சந்தையில் ஏற்பட்ட வளர்ச்சியை அடுத்து இந்திய பங்கு சந்தையிலும் இன்று நல்ல முன்னேற்றம் ஏற்பட்டது. சென்சென்ஸ் 14,200 புள்ளிகளுக்கு மேலும் நிப்டி 4,200 புள்ளிகளுக்கு மேலும் சென்று முடிந்திருக்கிறது. இன்ஃப்ராஸ்டிரக்சர், மெட்டல், ஆயில் அண்ட் கேஸ் பங்குகள் 2.5 சதவீதத்தில் இருந்து 8 சதவீதம் வரை உயர்ந்திருந்தது. இன்போசிஸ் மற்றும் அம்புஜா சிமென்ட்ஸ் நிறுவனங்களை தவிர மற்ற எல்லா நிறுவனங்களுமே வளர்ந்திருந்தன. மாலை வர்த்தக முடிவில் மும்பை பங்கு சந்தையில் சென்செக்ஸ் 399.54 புள்ளிகள் ( 2.88 சதவீதம் ) உயர்ந்து 14,253.24 புள்ளிகளில் முடிந்திருக்கிறது. தேசிய பங்கு சந்தையில் நிப்டி 122.10 புள்ளிகள் ( 2.97 சதவீதம் ) உயர்ந்து 4,233.50 புள்ளிகளில் முடிந்திருக்கிறது. இன்றைய வர்த்தகத்தில் ஹின்டல்கோ, ஜெய்பிரகாஷ் அசோசியேட்ஸ், டிஎல்எஃப், ஹீரோ ஹோண்டா, பிஹெச்இஎல், ரிலையன்ஸ் பவர், மற்றும் ஐடியா செல்லுலார் ஆகிய நிறுவன பங்குகள் 6 முதல் 8.5 சதவீத வளர்ச்சியை அடைந்திருந்தது.

நன்றி : தினமலர்

2008 ல் வெளிநாட்டுவாழ் இந்தியர்கள் இந்தியாவுக்கு அனுப்பிய பணம் ரூ.2.5 லட்சம் கோடி

உலகம் கடும் பொருளாதார சிக்கலில் இருக்கும் போதும் கூட, வெளிநாட்டில் வேலை பார்க்கும் இந்தியர்கள் 2008 ம் ஆண்டு இந்தியாவுக்கு அனுப்பிய பணம் ( ரூ.2.5 லட்சம் கோடி ) 52 பில்லியன் டாலர் என்கிறது உலக வங்கி . இது, அதற்கு முந்தைய ஆண்டு அனுப்பப்பட்ட ( ரூ. 2.16 லட்சம் கோடி ) 45 பில்லியன் டாலரை விட 15 சதவீதம் அதிகம். உலக வங்கி சமீபத்தில் வெளியிட்ட ஒரு அறிக்கையில் இந்த விபரம் தெரிவிக்கப்பட்டிருக்கிறது. சாப்ட்வேர் ஏற்றுமதி மூலம் 2008ம் ஆண்டு இந்தியாவுக்கு 47 பில்லியன் டாலர் மட்டுமே கிடைத்திருக்கும் போது, வெளிநாட்டுவாழ் இந்தியர்கள் மூலம் 52 பில்லியன் டாலர் கிடைத்திருப்பதால், அந்நிய பணத்தை இந்தியாவுக்குள் கொண்டு வருவதில் முதல் இடத்தை அவர்களே பெறுகிறார்கள். ரிசர்வ் வங்கியின் எதிர்பார்ப்பை விடவும் இந்தியாவுக்குள் அதிகம் டாலர்கள் வெளிநாட்டு இந்தியர்களால் வந்திருக்கிறது. முன்னேறும் நாடுகளை பொறுத்தவரை, இந்தியா, சீனா மற்றும் மெக்ஸிகோ நாட்டவர்கள் தான் அதிக அளவில் வெளிநாடுகளில் சம்பாதித்து தங்கள் நாட்டுக்கு அதிகம் பணத்தை அனுப்புவதாக உலக வங்கி தெரிவித்திருக்கிறது.

நன்றி : தினமலர்

புதிய விமானங்களை வாங்குவதை தள்ளி வைக்க ஏர் - இந்தியா முடிவு

ரூ.7,200 கோடி நஷ்டம் அடைந்து, கடும் நிதி நெருக்கடியில் இருக்கும் ஏர் - இந்தியா நிறுவனத்தின் நிதி தேவையை பூர்த்தி செய்ய பங்குகளை விற்பது மற்றும் குறைந்த கால கடன் பெறுவது போன்ற நடவடிக்கைகளை மத்திய அரசு எடுத்து வருகிறது. அத்துடன் அது ஆர்டர் செய்திருக்கும் புது விமானங்களை இப்போது பெறாமல், பெறுவதை தள்ளி வைக்கவும் முடிவு செய்திருக்கிறது. ஏர் - இந்தியாவின் நிலை குறித்தும் அதனை காப்பாற்ற மத்திய அரசு என்ன நடவடிக்கைகளை எடுக்கிறது என்பது குறித்து எழுந்த கேள்விக்கு பதிலளித்த மத்திய சிவில் விமான போக்குவரத்து அமைச்சர் பிரபுல் படேல் இதனை தெரிவித்தார். புது விமானங்களுக்காக செய்திருக்கும் ஆர்டரை மாற்றி அமைப்பது, அல்லது ரத்து செய்வது, லாபம் வராத விமான வழித்தடங்களில் விமானங்களை இயக்குவதை குறைப்பது, ஊழியர்கள் எண்ணிக்கையை குறைப்பது, ஊக்க தொகையை குறைப்பது போன்ற நடவடிக்கைகளை எடுத்து வருவதாக பிரபுல் படேல் தெரிவித்தார்.

நன்றி : தினமலர்

ஏறியது பங்கு சந்தை

கடந்த வாரத்தில் 10 சதவீத புள்ளிகளை இழந்திருந்த மும்பை பங்கு சந்தை, இன்று இழந்த புள்ளிகளில் கொஞ்சத்தை மீட்டது. சென்செக்ஸ் 450 புள்ளிகளுக்கு மேலும் நிப்டி 135 புள்ளிகளுக்கு மேலும் உயர்ந்திருந்தது. அமெரிக்க மற்றும் ஆசிய பங்கு சந்தைகளில் ஏற்பட்ட வளர்ச்சியும் இந்திய பங்கு சந்தையில் சாதகமான சூழ்நிலையை உருவாக்கியது. எல்லா துறை பங்குகளும் இன்று நல்ல லாபத்தில் விலை போனது. மெட்டல், ரியால்டி, இன்ஃப்ராஸ்டிரக்சர், பேங்கிங் மற்றும் ஆயில் அண்ட் கேஸ் பங்குகள் அதிகம் விற்பனை ஆயின. ஹெச்டிஎப்சி பேங்க் பங்குகள் மட்டுமே இறங்கியிருந்தது. மாலை வர்த்தக முடிவில் மும்பை பங்கு சந்தையில் சென்செக்ஸ் 453.38 புள்ளிகள் ( 3.38 சதவீதம் ) உயர்ந்து 13,853.70 புள்ளிகளில் முடிந்திருக்கிறது. தேசிய பங்கு சந்தையில் நிப்டி 137.35 புள்ளிகள் (3.46 சதவீதம்) உயர்ந்து 4,111.40 புள்ளிகளில் முடிந்திருக்கிறது. டிஎல்எஃப், ரிலையன்ஸ் இன்ஃப்ராஸ்டிரக்சர், ஜெய்பிரகாஷ் அசோசியேட்ஸ், ஐசிஐசிஐ பேங்க், ஹெச்டிஎப்சி, சுஸ்லான் எனர்ஜி, யூனிடெக் மற்றும் ரிலையன்ஸ் கேப்பிட்டல் நிறுவனங்கள்தான் அதிகம் லாபம் பார்த்தன. அவைகள் 7 முதல் 11.5 சதவீத வளர்ச்சியை பெற்றிருந்தன.

நன்றி : தினமலர்

பருப்பு, அரிசி விலை: ஓட்டல்களில் விலை உயர்வு

உணவு தயாரிப்பு மூலப் பொருட்களான பருப்பு, சர்க்கரை உள்ளிட்ட பொருட்களின் விலை தமிழகத்தில் ஜெட் வேகத்தில் உயர்ந்துள்ளதால், ஓட்டல்களில் சாப்பாடு, டிபன் வகைகளின் விலையை ஆகஸ்ட் 15 முதல் உயர்த்த வேண்டிய நிலைக்கு தள்ளப்பட்டுள்ளதாக ஓட்டல் உரிமையாளர்கள் தெரிவித்தனர். ஓட்டல் உரிமையாளர்கள், நஷ்டத்தில் இருந்து தப்பிக்கும் வகையில், கடந்த மாதமே அரசு சாப்பாடு தவிர, மற்ற சாப்பாடு வகைகளில் 1 ரூபாய் முதல் 5 ரூபாய் வரை விலை ஏற்றத்தை சப்தம் இன்றி அரங்கேற்றி உள்ளனர். தற்போது துவரம் பருப்பு கிலோ 100 ரூபாயை தாண்டும் நிலையில், உளுந்தம் பருப்பு கிலோ 65 ரூபாய்க்கு விற்கப்படுகிறது. நாளை முதல் வெளிநாடுகளுக்கான அரிசி ஏற்றுமதி தடை நீக்கப்படும் என்ற தகவல் பரவி வருவதால், அரிசி விலை மீண்டும் உயரும் நிலை உருவாகி உள்ளது. அரிசி, துவரம் பருப்பு விலையில் உயர்வு ஏற்படும் என்ற தகவல் ஓட்டல் உரிமையாளர்களுக்கு முன்னரே தெரிய வந்ததால், தங்களின் இரண்டு மாத தேவைக்கான மூலப்பொருட்களை இருப்பு வைத்துள்ளனர். இந்த விலை உயர்வு மேலும் தொடரும் பட்சத்தில், ஆகஸ்ட் 15 சுதந்திர தினம் முதல், உணவு பண்டங்களின் விலையை பல மடங்கு அதிகரிக்க வேண்டிய நிலைக்கு ஓட்டல் உரிமையாளர்கள் தள்ளப்பட்டுள்ளனர்.
இது குறித்து நடுத்தர நகர ஓட்டல் உரிமையாளர் ஒருவர் கூறியதாவது: பருப்பு வகை, மளிகை சாமான்களின் விலையில் கடும் உயர்வு ஏற்பட்டுள்ளது. இந்த விலை உயர்வில் இருந்து எங்கள் தொழிலை காப்பாற்ற வேண்டிய நிர்பந்தம் எங்களுக்கு ஏற்பட்டுள்ளது. தற்போது அளவு சாப்பாடு 28 ரூபாய்க்கும், ஸ்பெஷல் சாப்பாடு 35 ரூபாய்க்கும், டிபன் வகைகளில் இரண்டு இட்லி 10 ரூபாய், ப்ளைன் தோசை 12 ரூபாய், வடை 7 ரூபாய், பொங்கல் 18 ரூபாய்க்கு விற்கப்படுகிறது. வரும் ஆகஸ்ட் முதல் தேதிக்குள் மூலப்பொருட்களின் விலையில் சரிவு ஏற்படாத பட்சத்தில், டிபன் வகைகளின் விலையில், வகைகளுக்கு தக்கபடி 2 முதல் 7 ரூபாய் வரையும், சாப்பாடு விலை 5 முதல் 10 ரூபாய் வரை உயர்த்துவதை தவிர வேறு வழியில்லை என்றார்.

நன்றி : தினமலர்

லண்டன் நிகழ்ச்சிக்காக மீண்டும் முகத்தை பிளாஸ்டிக் சர்ஜரி செய்த மைக்கேல் ஜாக்ஸன்

உலகத்திலேயே அதிக தடவைகள் பிளாஸ்டிக் சர்ஜரி செய்தது மைக்கேல் ஜாக்ஸன்தான். முகத்தை பலமுறை பிளாஸ்டிக் செய்ததால் அவரது முகத்தில் முகப்பருக்களும் சிராய்ப்புகளும் அதிகமாக இருந்ததால் அது அசிங்கமாக இருக்கிறது என்று எண்ணி வருந்திய மைக்கேல் ஜாக்ஸன், அதனை மாற்றி அமைக்க விரும்பினார். எனவே மீண்டும் என்னிடம் வந்து முகத்தை பிளாஸ்டிக் சர்ஜரி செய்து, வழக்கமான முகத்திற்கு மாறிக்கொண்டார் என்றார், அவருக்கு சுமார் 25 வருடங்களாக பிளாஸ்டிக் சர்ஜனாக இருக்கும் டாக்டர். அர்னால்ட் கிளீன். லண்டனில் நடக்க இருந்த இசை நிகழ்ச்சியில் கலந்து கொள்ளும் முன் இந்த ஆப்பரேஷனை செய்து கொள்ள மைக்கேல் ஜாக்ஸன் விரும்பினார் என்றார் அவர். சி என் என் டி.வி.க்கு அளித்த பேட்டியில் டாக்டர். கிளீன் இவ்வாறு தெரிவித்திருக்கிறார்.ஆனால் மைக்கேல் ஜாக்ஸனின் மூக்கு கீழே விழுந்து விட்டது என்று வந்த வதந்தியை மறுத்துள்ளார். அவரது மூக்கு எடுக்கப்படவில்லை. ஆனால் அவரது மூக்கு மிக சிறியதாக இருக்கும் என்றார் அவர். கடந்த மாதம் 25ம் தேதி மைக்கேல் ஜாக்ஸன் மர்மமான முறையில் இறந்து போனார்.

நன்றி : தினமலர்