இந்திய தொழில் உற்பத்தி வளர்ச்சி 3.8 சதவீதமாக குறைந்தது

புதுடில்லி : இந்தியாவின் தொழில் வளர்ச்சியை குறிக்கும் இன்டக்ஸ் ஆஃப் இன்டஸ்டிரியல் புராடக்ட்ஸ் ( ஐ ஐ பி ), மே 2008ல் 3.8 சதவீதமாக குறைந்து விட்டது. இது 2007 மே மாதத்தில் 10.6 சதவீதமாக இருந்தது. ஏற்கனவே ஏப்ரல் மாதத்தல்தான் இது 7 சதவீதத்தில் இருந்து 6.2 சதவீதமாக குறைந்திருந்தது. மேனுஃபேக்சரிங் புரடக்ஸன் குரோத்தும் மே மாதத்தில் 3.9 சதவீதமாக குறைந்திருக்கிறது. இது 2007 மே மாதத்தில் 11.3 சதவீதமாக இருந்தது. 2007 மே மாதத்தில் 9 சதவீதமாக இருந்த மின் உற்பத்தி வளர்ச்சி 2008 மே மாதத்தில் 2 சதவீதமாக குறைந்து விட்டது. சுரங்க உற்பத்தி வளர்ச்சி மட்டும் கடந்த வருடத்தை விட இந்த வருடம் உயர்ந்திருக்கிறது. மே 2007 ல் 3.8 சதவீதமாக இருந்த சுரங்க உற்பத்தி இந்த வருடம் மே மாதத்தில் 5.2 சதவீதமாக உயர்ந்திருக்கிறது.

நன்றி : தினமலர்

பணவீக்கம் 11.89 சதவீதமாக உயர்ந்தது

புதுடில்லி : ஜூன் 28ம் தேதியுடன் முடிந்த வாரத்தில் இந்தியாவின் பணவீக்கம் 11.89 சதவீதமாக உயர்ந்துள்ளது. இது இதற்கு முந்தைய வாரத்தில் 11.63 சதவீதமாக இருந்தது. ஒரு வாரத்தில் 0.26 சதவீதம் உயர்ந்திருக்கிறது. உணவுப்பொருட்கள், பழங்கள், காய்கறிகள், பருப்பு வகைகள், சிமென்ட், சமையல் எண்ணெய் போன்ற பொருட்களில் விலை உயர்ந்துள்ளதால் பணவீக்கம் உயர்ந்துள்ளதாக தெரிவிக்கப்பட்டிருக்கிறது. கடந்த வருடத்தில் இதே காலத்தில் பணவீக்கம் 4.42 சதவீதமாகத்தான் இருந்திருக்கிறது.விலை உயர்வை கட்டுப்படுத்த மத்திய அரசு எவ்வளவோ முயன்றும் இந்த வாரத்தில் சிமென்ட் மற்றும் சமையல் எண்ணெய் விலை உயர்ந்திருக்கிறது. இந்த வாரமும் பணவீக்கம் உயர்ந்திருப்பதால் வங்கிகளுக்கான ரெபோ ரேட்டை ரிசர்வ் வங்கி மேலும் உயர்த்தும் என்று தெரிகிறது. சமீபத்தில் தான் அது ரெபோ ரேட்டை 0.5 சதவீதம் உயர்த்தி இருந்தது.
நன்றி : தினமலர்

2030ல் உலக அளவில் பெட்ரோலிய தேவை 50 சதவீதம் அதிகரிக்கும்

வியன்னா : இப்போதில் இருந்து 2030ம் வருடத்திற்குள் உலக அளவில் பெட்ரோலிய தேவை 50 சதவீதம் அதிகரிக்கும் என்று ஓபக் ( பெட்ரோல் ஏற்றுமதி நாடுகள் அமைப்பு ) தெரிவித்திருக்கிறது. முன்னேறி வரும் நாடுகளில் கார்களின் பயன்பாடு பெருமளவு அதிகரித்திருப்பதால் பெட்ரோலுக்கான தேவை 50 சதவீதம் அதிகரிக்கும் என்று அது கருத்து தெரிவித்திருக்கிறது. ஓபக் அமைப்பின் 2008 வருடத்திற்கான அறிக்கையில், 2030ல் இப்போதாய தேவையை விட 50 சதவீதம் அதிகமாக பெட்ரோலிய தேவை இருக்கும் என்பதால் அதனை சமாளிக்க நம்மிடம் இருக்கும் எண்ணெய் கிணறுகளில் இருந்து புது தொழில் நுட்பத்தை பயன்படுத்தி அதிக அளவில் கச்சா எண்ணெய் எடுக்க வேண்டும் என்று சொல்லியிருக்கிறது. டாலரின் மதிப்பு குறைந்திருப்பதாலும் பெட்ரோல் சப்ளை குறித்து வர்த்தகர்களால் பரப்பப்படும் தவறான தகவல்கள் போன்றவற்றால்தான் இப்போது கச்சா எண்ணெய் விலை உயர்ந்திருப்பதாக ஓபக் தெரிவித்திருக்கிறது. எனினும் கச்சா எண்ணெய் விலை கடுமையாக உயர்ந்திருப்பது குறித்து அது கவலை தெரிவித்திருக்கிறது. கடந்த ஆண்டுகளில் கச்சா எண்ணெய்க்கு குறைந்த அளவே விலை இருந்ததால், ஓபக் நாடுகளால் எண்ணெய் உற்பத்தியை அதிகப்படுத்த அதில் அதிக அளவில் முதலீடு செய்ய முடியாமல் போய் விட்டது. எனவே தான் சீனா போன்ற பொருளாதாரத்தில் வேகமாக வளர்ந்து வரும் நாடுகளின் எண்யெண்ய் தேவைக்கு தகுந்தபடி சப்ளை செய்ய முடியாமல் போனது. கடந்த வருடங்களில் தேவைக்கு அதிகமாகவே கச்சா எண்ணெய் எடுக்கப்பட்டிருப்பதாகவும் வரும் காலங்களில் எவ்வளவு எடுக்க வேண்டும் என்று செப்பரில் நடக்கும் கூட்டத்தில் முடிவு செய்யப்படும் என்றும் தெரிவித்திருக்கிறது. இருந்தாலும் 2012 வாக்கில் கச்சா எண்ணெய்யின் தேவையில் நாள் ஒன்றுக்கு 31 மில்லியன் பேரல்கள் குறையும் என்று எதிர்பார்ப்பதாக ஓபக் தெரிவித்திருக்கிறது. ஐரோப்பா மற்றும் அமெரிக்கா, பெட்ரேலை நம்பி இருக்கும் நிலையில் இருந்து மாறும் முயற்சியில் ஈடுபட்டுள்ளதால் அங்கு பெட்ரோலிய பொருட்களுக்கான தேவை குறையும் என்று ஓபக் நினைக்கிறது.
நன்றி : தினமலர்

பங்கு சந்தையில் நல்ல முன்னேற்றம் : 614 புள்ளிகள் உயர்ந்தன

மத்திய அரசுக்கு அளித்து வந்த ஆதரவை கம்யூனிஸ்டுகள் நேற்று விலக்கிக்கொள்வதாக அறிவித்திருந்ததால் மத்திய அரசு கவிழ்ந்து விடுமோ என்ற அச்சம் நேற்று இருந்தது. அதனால் நேற்று பங்கு சந்தையில் சென்செக்ஸ் 176 புள்ளிகள் குறைந்திருந்தது. ஆனால் இன்று, கம்யூனிஸ்டுகள் விலகினாலும் நாங்கள் ஆதரவு தருகிறோம் என்று சமஜ்வாடி கட்சியினர் சொல்லி விட்டதால் ஆட்சி கவிழாது என்ற எண்ணம் மக்களிடையே தோன்றி விட்டது. இதனாலும் சர்வதேச சந்தையில் கச்சா எண்ணெய் விலை பேரலுக்கு 5 டாலருக்கு மேல் குறைந்து விட்டதாலும் இன்று மும்பை பங்கு சந்தையில் காலை வர்த்தகம் துவங்கியதுமே சென்செக்ஸ் உயர துவங்கி விட்டது. வர்த்தகம் துவங்கிய இரு நிமிடங்களி லேயே சென்செக்ஸ் 441.84 புள்ளிகளும்தேசிய பங்கு சந்தையில் நிப்டி 129.85 புள்ளிகளும் உயர்ந்திருந்தன. பின்னர் இன்று முழுவதும் உயர்ந்துகொண்டே இருந்த சென்செக்ஸ், மதியத்திற்கு பின் வேகமாக உயர துவங்கியது. மாலை வர்த்தக முடிவில் மும்பை பங்கு சந்தையில் சென்செக்ஸ் 614.61 புள்ளிகள் ( 4.60 சதவீதம் ) உயர்ந்து 13,964.26 புள்ளிகளில் முடிந்தது. தேசிய பங்கு சந்தையில் நிப்டி 168.55 புள்ளிகள் ( 4.23 சதவீதம் ) உயர்ந்து 4,157.10 புள்ளிகளில் முடிந்தது. இன்று முழுவதும் காளைகளின் ஆதிக்கமே மேலோங்கி இருந்தது. அதாவது பங்குகள் பெருமளவு வாங்கப்பட்டன. இன்று சென்செக்ஸ் 14 ஆயிரத்தை நெருங்கியும் நிப்டி 4150க்கு மேலும் வந்துவிட்டதால் முதலீட்டாளர்கள் மகிழ்ச்சி அடைந்துள்ளனர் நன்றி : தினமலர்

கம்யூனிஸ்டுகள் விலகியதால் இனி இந்தியாவில் வேகமான பொருளாதார வளர்ச்சி இருக்கும் : மெரில் லிஞ்ச்

புதுடில்லி : இந்தியாவை ஆளும் ஐக்கிய முற்போக்கு கூட்டணிக்கு கொடுத்து வந்த ஆதரவை நேற்று கம்யூனிஸ்டுகள் விலக்கிக்கொண்டன. கம்யூனிஸ்டுகளின் விலகி விட்டதால் இனிமேல் இந்தியாவில் வேகமான பொருளாதார வளர்ச்சி இருக்கும் என்று பிரபல நிதி நிர்வாக நிறுவனமான மெரில் லிஞ்ச் கருத்து தெரிவித்திருக்கிறது. மேலும் இதனால் அமெரிக்காவுடன் இந்தியா அணுசக்தி ஒப்பந்தம் செய்து கொள்ளவும் வழி பிறக்கும் என்று அது தெரிவித்திருக்கிறது. இதன் விளைவு பங்கு சந்தையில் உடனடியாக தெரிய வரும். ( இன்று மும்பை பங்கு சந்தையில் சென்செக்ஸ் 614.61 புள்ளிகளும் தேசிய பங்கு சந்தையில் நிப்டி 168.55 புள்ளிகளும் உயர்ந்திருந்தன.) இன்சூரன்ஸ் துறையில் வெளிநாட்டினருக்கு இருந்த உச்சவரம்பு உயர்த்தப்படும். இந்தியாவில் ரீடெய்ல் வர்த்தகத்தில் வெளிநாட்டு நேரடி முதலீட்டுக்கு அனுமதி அளிக்கப்படும் என்று மெரில் லிஞ்ச் நிறுவனம் அதன் வாடிக்கையாளர்களுக்கு அனுப்பிய அறிக்கையில் சொல்லியிருக்கிறது. காங்கிரஸூக்கு கடந்த நான்கு ஆண்டுகளாக ஆதரவு அளித்து வந்த கம்யூனிஸ்டுகள், அமெரிக்காவுடன் இந்தியா அணுசக்தி ஒப்பந்தம் செய்துகொள்வதற்கு எதிர்ப்பு தெரிவித்து நேற்று ஆதரவை விலக்கிக்கொண்டது. மேலும் பார்லிமென்டில் பெரும்பான்மையை நிரூபிக்குமாறும் கேட்டிருக்கிறது. கம்யூனிஸ்டுகள் விலகிக்கொண்டாலும் சமஜ்வாடி கட்சியினர் காங்கிரஸூக்கு ஆதரவு அளிக்க முன் வந்துள்ளதால், ஆட்சிக்கு ஆபத்து இல்லை என்று சொல்லப்படுகிறது.

நன்றி : தினமலர்

உணவு பொருட்கள் விலை உயர்ந்தது ஏன்? உலக வங்கி அறிக்கையில் புதிய தகவல்

நியூயார்க்: 'பயோ எரிபொருள் உற்பத்தி அதிகரிப்பே உலக அளவில் உணவுப் பொருட்கள் விலை 75 சதவீதம் உயர காரணம்' என, உலக வங்கி தெரிவித்துள்ளது. 'உணவுப் பொருட்கள் விலை பெருமளவு அதிகரிக்க பயோ எரிபொருள் உற்பத்தி காரணம் இல்லை. பயோ எரிபொருள் உற்பத்தியால் 3 சதவீத அளவுக்கு வேண்டுமானால், விலை அதிகரித்திருக்கலாம்' என, அமெரிக்கா தெரிவித்தது. அதிபர் புஷ்ஷோ, 'இந்தியா மற்றும் சீனாவில் உணவுப் பொருட்களின் தேவை அதிகரித்ததே, விலை உயர்வுக்கு காரணம்' என்றார். இந்நிலையில், உலக வங்கி வெளியிட்டுள்ள அறிக்கையில் கூறப்பட் டுள்ளதாவது: உலக அளவில் உணவுப் பொருட்களின் விலை அதிகரிக்க, பயோ எரிபொருள் உற்பத்தி அதிகரிப்பே காரணம். இதனால் தான், 75 சதவீத அளவுக்கு விலை கூடியுள்ளது. சர்வதேச அளவில் புகழ்பெற்ற பொருளாதார நிபுணர்களைக் கொண்டு நடத்தப் பட்ட ஆய்வில் இந்தத் தகவல் தெரியவந்துள்ளது. உணவுப் பொருட்கள் விலை அதிகரிப்பால், உலக அளவில் 100 கோடி மக்கள் வறுமைக் கோட்டிற்கு கீழே தள்ளப்பட்டுள்ளனர். வங்கதேசம் மற்றும் எகிப்து உட்பட சில நாடுகளில் வன்முறைகள் நிகழ்ந்துள்ளன. வளரும் நாடுகளில் உள்ளவர்களின் வருவாய் அதிகரித்ததால், உணவுப் பொருட்கள் நுகர்வு எதுவும் கூடவில்லை. ஐரோப்பிய யூனியன் நாடுகள் மற்றும் அமெரிக்காவில், பயோ எரிபொருள் உற்பத்தியை அதிகரிக்க நடவடிக்கை எடுத்ததே, உணவுப் பொருள் குறைந்து, விலைவாசி உயர காரணம். பயோ எரிபொருளுக்கு அதிக முக்கியத்துவம் கொடுக்கப் பட்டதால், உணவு சப்ளை பாதிக்கப் பட்டு விலைவாசி உயர்ந்து விட்டது. இவ்வாற்று உலக வங்கி அறிக்கையில் தெரிவிக்கப்பட்டுள்ளது.

நன்றி : தினமலர்

பணவீக்கம் மேலும் உயர்வு

புதுடில்லி: ஜூன் 21ம் தேதியுடன் முடிவடைந்த வாரத்தில், பணவீக்கம் 11.63 சதவீதமாக அதிகரித்துள்ளது.இது, அதற்கு முந்தைய வாரம் இருந்த அளவான 11.42 சதவீதத்தை விட 0.21 சதவீதம் அதிகம். கடந்த ஆண்டு இதே காலகட்டத்தில் பணவீக்கம் 4.32 சதவீதம். பழங்கள், காய்கறிகள், தானிய வகைகள், இரும்பு, உருக்கு, சமையல் எண்ணெய் போன்றவற்றின் விலை உயர்வே பணவீக்க அதிகரிப்புக்குக் காரணம்.பணவீக்கம் மேலும் அதிகரித்துள்ளதால், வங்கிகளுக்கு வழங்கும் குறுகில கால கடன்களுக்கான வட்டி வீதத்தையும், ரொக்க கையிருப்பு வீதத்தையும் ரிசர்வ் வங்கி மேலும் அதிகரிக்கும் என, பொருளாதார நிபுணர் ஒருவர் கூறியுள்ளார். பணவீக்கத்தைக் கட்டுப்படு ரிசர்வ் வங்கி ஏற்கனவே, வங்கிக் கடன்களுக்கான வட்டி வீதத்தையும், ரொக்க கையிருப்பு வீதத்தையும் 0.5 சதவீதம் அதிகரித்தது என்பது குறிப்பிடத்தக்கது

நன்றி : தினமலர்